Wednesday, July 22, 2015

ကြားအင်အားစုတွေကို သိမ်းသွင်းနိုင်သူက နိုင်သည်

 
ဒီရက်ပိုင်း သတင်းတွေ တက်လာတဲ့အထဲမှာ လာမယ့်ရွေးကောက်ပွဲအတွက် ဒီချုပ်ကနေ ၀င်ရောက် ယှဉ်ပြိုင်ကြမယ့် ကိုယ်စားလှယ်လောင်းတွေရဲ့ အမည်တွေကို တွေ့နေရတယ်။ လူတွေက အားရ၀မ်းသာနဲ့ တင်ပေးနေကြတာ။ ပညာရှင် အသိုင်းအ၀ိုင်းက အဖွဲ့ချုပ်ကိုယ်စားလှယ်တွေအဖြစ် ၀င်ရောက်အရွေးချယ်ခံကြမည် ဆိုသည့်သတင်း။ အားရစရာ။ ပြည်သူများအတွက် ရွှင်လန်းအားတက်စရာ သတင်းများဖြစ်သည်။
အယူအဆတခုရှိသည်။ ငါ လို့ပြောရမည်အင်အားစုနဲ့ ရန်သူ အင်အားစုတို့ ယှဉ်ပြိုင်ကြရာမှာ ဘက်သဘောအရ အဲဒီ ဘက် ၂ ဘက်တည်းကိုချည်း ပုံသေချ တွက်ထား၍မရ။ ရန် - ငါ အင်အားစုတွေထဲမှာ မပါတဲ့ ကြားအင်အားစုဆိုတာရှိသည်။ ထိုကြားအင်အားစုကို စည်းရုံးသိမ်းသွင်းနိုင်သူက အနိုင်ရသည် ဆိုသည့်အယူအဆ။ ယခု ဗမာပြည်အနေအထားနှင့်ဆိုလျင် ဒီမိုကရေစီလိုလားသည့် လူမျိုးပေါင်းစုံပြည်သူလူထုနှင့် စစ်အုပ်စု။ လာမည့် ရွေးကောက်ပွဲတွင် ဒီမိုကရေစီလိုလားသည့် လူမျိုးစုံပြည်သူလူထုအတွက် ဒီချုပ်က ကိုယ်စားပြုနေပေလိမ့်မည်။ စစ်အုပ်စုကိုတော့ ပြည်ခိုင်ဖြိုးက ကိုယ်စားပြုလိမ့်မည်။
ဗမာပြည်အား စစ်တပ်က အာဏာသိမ်းလာပြီးကတည်းက စစ်အုပ်စုသည် ဗမာပြည်အား ၎င်းတို့၏ မိဆိုင်ဖဆိုင် အမွေပစ္စည်းလို သဘောထားလာခဲ့သည်။ စစ်ဗျူရိုကရေစီနှင့် စစ်ဗိုလ်လူတန်းစားကို ဗဟိုပြုထူထောင်ပြီး တိုင်းပြည်၏ အာဏာနှင့် တိုင်းပြည်၏ အနာဂတ်ကို သူတို့ချည်းသာ ဆိုင်သည်ဟု ယူဆခဲ့ကြသည်။ တိုင်းပြည်၏ အာဏာအ၀န်းအ၀ိုင်းထဲသို့လည်း မည်သည့် လူစိမ်းကိုမျှ အ၀င်မခံ။ စစ်ဗိုလ်နှင့် စစ်ဗိုလ်ထွက်များကသာ ချုပ်ကိုင်ထားလိုသည့် အာသီသကိုလည်း တွေ့နေရသည်။ ထိုသည်ကို နှစ်ရှည်လများ ကျင့်သုံးလာသည့်အခါ စစ်ဗိုလ်နှင့် စစ်ဗိုလ်လူထွက်များ၏ အ၀န်းအ၀ိုင်းသည် ရေပတ်လည်ဝိုင်းထားသည့် ကျွန်းသဖွယ်ဖြစ်လာသည်။ တိုင်းပြည်နှင့် တသီးတခြားဖြစ်လာကာ အထီးကျန်လာခဲ့သည်။ ထို့အပြင် နိုင်ငံရေးစည်းဝိုင်းများ၏ သဘောသဘာဝအတိုင်း ၎င်းတို့၏ နိုင်ငံရေးအတွင်းစည်းတွင်လည်း အာဏာခွပ်စောင်းခုတ်မှုများရှိလာသည်။ နိုင်ငံရေးအရ စစ်အုပ်စု၏အာဏာနိုင်ငံ အတွင်းစည်းကို ရောက်နေသူများနှင့် အာဏာနိုင်ငံရေးအပြင်စည်းအကြား ခွပ်စောင်းခုတ်မှုများ။ ထိုအပြင် အောက်ခြေအင်အားစုနှင့် အထက်အဖွဲ့အစည်းကြား။ ၂၀၁၀ နောက်ပိုင်း စစ်အုပ်စု၏ အာဏာအတွင်းစည်းကို အပိုင်း ၃ ပိုင်းခွဲခဲ့သည်မှစ၍ စစ်အုပ်စုအတွင်းစည်းတွင် အင်အားစု ၃ စု သိသိသာသာ ကွဲထွက်လာသည်။ စစ်အုပ်စု၏ အတွင်းစည်းထဲမှာကိုပင် တွဲ - ခွဲ - တိုက် လုပ်နေသည်များကို မသိမသာရော သိသိသာသာရော ပေါ်ထွက်လာသည်ကို ကျနော်တို့ မြင်နေကြရသည်။ ဆိုလိုသည်မှာ စစ်အုပ်စုသည် ကြားအုပ်စုကို သိမ်းသွင်းနိုင်ခြင်းမရှိသည့်အပြင် အခြေအနေပိုင်းအရ ပကတိဘာဝအပိုင်းအရ ၎င်းတို့၏အတွင်းစည်းညီညွတ်ရေးပင် ဖရိုဖရဲဖြစ်နေသည်။ လက်တွေ့ နိုင်ငံရေး လှုပ်ရှားမှုများတွင်လည်း ပြည်ခိုင်ဖြိုးသည် ကြားလူများကို စည်းရုံးသည်ထက် သူတို့အတွင်း ကွဲနေသည် အုပ်စု ၃ စု၏ အပြန်အလှန်ညီညွတ်ရေးကိုပင် မတည်ဆောက်နိုင်လောက်အောင်ဖြစ်နေရသည်အနေအထား။
ဘက်တဖက်တွင် ဒီချုပ်ရှိသည်။ ဒီချုပ်သည် မူလ စတင်ဖွဲ့စည်းစဉ်ကပင် ကျယ်ပြန့်သည့် အင်အားစုများကို ကိုယ်စားပြုခဲ့သည်။ ရှစ်လေးလုံး ဒီမိုကရေစီအရေးတော်ပုံအတွင်း ပါဝင်ခဲ့သည့် တပ်မှူးဟောင်းများ၊ တတ်သိပညာရှင်များနှင့် ဖွဲ့စည်းထားခဲ့သည်။ ဒီချုပ်စတင်ဖွဲ့စည်းစဉ်ကတည်းက လူမျိုးစုံပြည်သူလူထု၏ တခဲနက်ထောက်ခံမှုကို ရရှိနေသည်မှာ ယနေ့အထိဖြစ်သည်။ Road Map လွန် နိုင်ငံရေးကာလ ဒီချုပ်ပါဝင်ခဲ့သည့် ရွေးကောက်ပွဲများတွင် ကိုယ်စားလှယ်များနှင့် ပါတ်သက်သည့် ပေါ်လစီများကို သတိထားမိသည်။ ၂၀၁၂ ကြားဖြတ်ရွေးကောက်ပွဲတွင် ဒီချုပ်ကိုယ်စားလှယ်များကို တိုင်းရင်းသားများ၊ အမျိုးသမီးများ၊ လူငယ်များအား ဦးစားပေး ရွေးချယ်ခဲ့သည်။ ယခု ဒီချုပ်က သူ့ပါတီဝင်တွေကိုချည်းမဟုတ်ပဲ ဒီချုပ်ကိုယ်စားလှယ်အဖြစ် ရွေးကောက်ပွဲဝင်ရောက် ယှဉ်ပြိုင်မည့် ကိုယ်စားလှယ်များအား ကျယ်ကျယ်ပြန့်ပြန့် ဖွင့်ပေးခဲ့သည်။ ဒီချုပ်ပါတီဝင်မဟုတ်သော်လည်း အရည်အချင်းရှိသူများအား ဒီချုပ်ကိုယ်စားလှယ်လောင်းများအဖြစ် ရွေးကောက်ပွဲဝင်နိုင်ရန် လမ်းဖွင့်ပေးခဲ့သည်။ ထိုသည်၏ နောက်ဆက်တွဲအဖြစ် ပညာရှင်အများအပြားနှင့် အခြားသောအင်အားစုများ ဒီချုပ် ကိုယ်စား လှယ်လောင်းများအဖြစ် စာရင်းတင်သွင်းလာသည်ကို တွေ့ခဲ့ရခြင်းဖြစ်သည်။ ဤသည်ကို ကျနော်က ကြားအင်အားစုများအား သိမ်းသွင်းသည်ဟု ယူဆနေသည်။ လုပ်နိုင်ခဲ့ပြီ။ ကြားအင်အားစုတွေကို ဒီချုပ် သိမ်းသွင်းနိုင်ခဲ့ပြီ။ ကြားအင်အားစုတွေကို ဒီမိုကရေစီအင်အားစုများမှ သိမ်းသွင်းနိုင်ခဲ့ပြီ။ ဘက် ၂ ဘက် ယှဉ်ပြိုင်နေသည့် ကွင်းထဲသို့ ကြားအင်အားစုကို ကိုယ့်ဘက်သို့ စည်းရုံးစုစည်းနိုင်ခဲ့ပြီ။ ထို့ကြောင့် ရန် - ငါ အချိုးအစား အရ ဒီမိုကရေစီအင်အားစုများဘက်မှာ အင်အားအသာစီးရမှုဆီသို့ မုချရောက်ရှိလာပေလိမ့်မည်။ ဒီမိုကရေစီ အင်အားစုများနှင့် ပြည်သူအပေါင်း ရွှင်လန်းအားတက်ကြစေ - စစ်အုပ်စု ကြောက်ဒူးတုန်စေ။

ညိုထက် (လမ်းသစ်ဦး)
၂၁ - ၇ - ၂၀၁၅

No comments:

Post a Comment

Related Posts Plugin for WordPress, Blogger...