Sunday, May 17, 2015

ငရုပ်ကောင်းမြို့နယ် ကျောက်မီးသွေးအဆိပ်သင့်တော့မှာလား ?



" ကျောက်မီးသွေးစွမ်းအင်သုံး လျှပ်စစ်ဓာတ်အားပေး စက်ရုံအလိုမရှိ  (NoCoal Power Station ) "
" ကျွန်ုပ်တို့ရွာကို ပြောင်းရွှေ့မပေးနိုင်ပါ (We will Not Display Our Village ) "  စာသားပါ ပလတ်စတစ်လောင်းထားသော A4 မိတ္တူစာရွက်ဖြူများကို အိမ်အ၀င်တံခါးများ ၊ အိမ်ရှေ့ရှိ သစ်ပင်များတွင် ကပ်ထားကြသည်မှာ တရုတ်သရဲဇာတ်ကားများထဲတွင် သရဲများအန္တရာယ်ကိုကြောက်ရွံ့၍
တရားစက္ကူ စာရွက်များကို ကပ်ထားသည်နှင့်အလားသဏ္ဍာန်တူနေသည်။


ဧရာဝတီတိုင်း၊ပုသိမ်ခရိုင်၊ငရုပ်ကောင်းမြို့နယ်ခွဲအတွင်းကျောက်မီးသွေးစက်ရုံတည်တည်ဆောက်ရန်အတွက်
၂၀၁၅ ခုနှစ် ဇန်န၀ါရီလအတွင်း
မြေနေရာများလာရောက်တိုင်းတာခြင်းကိုပြုလုပ်ခဲ့ပြီးနောက်
ကျောက်မီးသွေးစက်ရုံကို အလိုမရှိကန့်ကွက်သည့်အနေဖြင့် ၎င်းစာရွက်များကို
အိမ်တိုင်းစေ့ကပ်ထားခြင်းဖြစ်ကြောင်းသိရသည်။



ကျောက်မီးသွေးစက်ရုံတည်ဆောက်ရန် ရည်ရွယ်ထားသောနေရာသည်
ငရုပ်ကောင်းမြို့နယ်ခွဲအတွင်းရှိ နံသာပွတ်ကျေးရွာ ကျွေချိုင်ကျေးရွာ
အနီးတွင်ဖြစ်ပြီး ပြီးခဲ့သော မတ်လအတွင်း ထပ်မံ၍လာရောက်တိုင်းတာမှုများ ၊
မြေနေရာတိုင်းတာမှုများကို ပြုလုပ်ခဲ့ကြောင်း
နံသာပွတ်ကျေးရွာဒေသခံများကဆိုကြသည်။

" ကျောက်မီးသွေးစက်ရုံဆောက်မယ်ဆိုတာ ပြီးခဲ့တဲ့ နှစ်ကတည်းက
ကြားတယ်။ဒါပေမဲ့ ဘာမှထူးထူးခြားခြားမရှိသေးဘူး။အခုနှစ်မှာတော့
မြေလာကြည့်တာတွေ တိုင်းတာတွေ လာလုပ်တယ်။ဒါကြောင့် ကန့်ကွက်မှုတွေကို
ဧရာဝတီတိုင်းအစိုးရအဖွဲ့ နဲ့ လူကြီးတွေသိအောင်လုပ်ရတာ " ဟု
နံသာပွတ်ကျေးရွာမှ ဦးကိုအေးကဆိုသည်။



ငရုပ်ကောင်းမြို့နယ်ခွဲအတွင်းတည်ရှိသော နံသာပွတ်ကျေးရွာ ၊
ကျွေချိုင်ကျေးရွာအပါအ၀င် ကျေးရွာအုပ်စု ၁၃ အုပ်စုမှ ကျေးရွာပေါင်း ၆၄
ရွာတွင် လူဦးရေ ၃၉၀၀၀ ကျော်နေထိုင်ပြီး ကျောက်မီးသွေးဓာတ်အားသုံး
လျှပ်စစ်စက်ရုံတည်ဆောက်မည့် စီမံကိန်းကို တည်ဆောက်မည်ဆိုသော
သတင်းများကြားရချိန်မှစ၍ ဦးကိုအေးတို့မိသားစုအပါအ၀င်အခြားဒေသခံများပါ
စိုးရိမ်နေရတယ်ဟုဆိုသည်။



အဆိုပါကျေးရွာများသည် ပင်လယ်ကမ်းခြေဘေးတွင်တည်ရှိကြပြီး သီဟိုခြံများ ၊
အုန်းပင်ခြံများ ၊ ကွမ်းသီးပင်များစိုက်ပျိုးထားသော
ဥယျာဉ်ခြံမြေပေါင်းများစွာရှိပြီး ရာသီဥတုကောင်းမွန်သဖြင့်
စိုက်ပျိုးသမျှဖြစ်ထွန်းလေ့ရှိသည်ဟု ဒေသခံများကဆိုကြသည်။


" စက်ရုံဆောက်ရင် ရာသီဥတုပျက်စီးမယ်။ကျွန်တော်တို့
အဘိုးအဘွားတွေလက်ထက်ကတည်းက လုပ်ကိုင်းစားသောက်လာတဲ့
ဥယျာဉ်ခြံမြေတွေပျက်စီးမယ်။ရွာတွေပြောင်းရွှေ့ရမယ်။ဒီလိုမျိုးအဖြစ်မခံနိုင်ဘူး။ဒါကြောင့်
ဒီစီမံကိန်းကို ဘယ်လိုနည်းနဲ့ပဲဖြစ်ဖြစ်ကန့်ကွက်သွားမယ် " ဟု
ကျွေချိုင်ကျေးရွာဒေသခံတစ်ဦးကဆိုသည်။



ငရုပ်ကောင်းမြို့နယ်အတွင်းတည်ဆောက်မည့် ကျောက်မီးသွေးစက်ရုံကို
ဧရာဝတီတိုင်းအစိုးရအဖွဲ့မှ ဒေသခံပြည်သူများကို
ပွင့်လင်းမြင်သာမှုရှိစွာဖြင့် အသိပေးပြောဆိုမှုတစ်စုံတစ်ရာမှ
မရှိခဲ့သေးကြောင်း ဒေသခံများကဆိုကြသည်။



ကျောက်မီးသွေးစက်ရုံတည်ဆောက်မည့် စီမံကိန်းနှင့်ပတ်သက်၍ မည်သည့်ကုမ္ပဏီမှ
တာဝန်ယူတည်ဆောက်မည်၊မည်သည့် နိုင်ငံနှင့်ပူးပေါင်းလုပ်ဆောင်မည်ကိုလည်း
အသိပေးမှုတစ်စုံတစ်ခုမှမရှိသေးပဲ
မြေနေရာလာကြည့်ခြင်း၊တိုင်းတာခြင်းများကို ဒေသခံတို့၏
ဥယျာဉ်ခြံမြေများအတွင်းလာရောက်လုပ်ဆောင်မှုများပြုလုပ်လျှက်ရှိကြောင်းဒေသခံများကဆိုသည်။

" စီမံကိန်းတစ်ခုတည်ဆောက်မယ်ဆိုရင်
ပြည်သူနဲ့ကျေလည်မှုရအောင်အရင်ဆွေးနွေးပါ။ဆွေးနွေးလို့ ပြေလည်ပြီ
သဘောတူပြီဆိုမှ နောက်ပိုင်းအရာတွေကို ဆက်လက်လုပ်ဆောင်ရမယ်။မဟုတ်ရင်တော့
မြေကြီးတိုင်းတာတို့၊ အပေါက်လာဖောက်တာတို့ကို လုံးဝလက်ခံမှာမဟုတ်ဘူး "
ဟု ဦးကိုအေးကဆိုသည်။



ငရုပ်ကောင်းမြို့နယ်အတွင်းတည်ဆောက်မည့် ကျောက်မီးသွေးစက်ရုံစီမံကိန်း
နှင့် ပတ်သက်၍ နိုင်ငံတကာ စံချိန်စံချိန်စံညွှန်းဥပဒေ ၊ သဘာဝပတ်ဝန်းကျင်
ပျက်စီးမှု နှင့် ရေမြေလေ ၊ ရာသီဥတုဆိုင်ရာပျက်စီးမှုများ နှင့်
လူထုအကျိုးပြုမှုများကို သိရှိရန်အတွက် ဂျပန်နိုင်ငံရှိ ကျောက်မီးသွေးသုံး
ဓာတ်အားစက်ရုံများကို လေ့လာရန်အတွက် ဒေသခံ ၁ ဦးအား
ဧရာဝတီတိုင်းဝန်ကြီးချုပ် မှ တွေ့ဆုံခေါ်ယူခဲ့သည်ဟု
ဂျပန်နိုင်ငံသို့လေ့လာရေး သွားရောက်ရန်အတွက် ဖိတ်ခေါ်ခံရသူ
ကျွေချိုင်ကျေးရွာမှ ဦးကြည်အေးကဆိုသည်။



" လေ့လာမှုသက်သက် အနေနဲ့ခေါ်တာပါ။
ဒေသခံပြည်သူ့ကိုယ်စားလှယ်အနေနဲ့ခေါ်တာမဟုတ်ပါဘူး။ဒေသခံ
ကိုယ်စားလှယ်အနေနဲ့ဆိုရင် ကျွန်တော်လည်းမလိုက်ပါဘူး။ဂျပန်ကို သွားဖို့
အတွက် ၀န်ကြီးချုပ်ဦးသိန်းအောင်ကိုယ်တိုင် ပုသိမ်မြို့က
သူ့ရုံးခန်းကိုခေါ်ဖိတ်ခဲ့ပါတယ်။ပတ်စပို့ကိစ္စ၊ဗီဇာကိစ္စကိုလည်း
သူတို့ကပဲလုပ်ပေးမယ်လို့ပြောပါတယ်။အားလုံးပေါင်း ကျွန်တော်အပါအ၀င် ၈
ဦးသွားမယ်လို့ပြောတယ် " ဟု ဦးကြည်အေးကဆိုသည်။



ကျောက်မီးသွေးစက်ရုံစီမံကိန်း နှင့် ပတ်သက်ပြီး ဂျပန်နိုင်ငံသို့
လေ့လာရေးလုပ်ရန်အတွက် လူခေါ်ဆိုမှု နဲ့ ပတ်သက်ပြီး ဒေသခံများအနေဖြင့်
မည်သူ့ကိုမျှ မလိုက်စေချင်ပဲ ၊ စီမံကိန်းကို ကန့်ကွက်ရေး
မတည်ဆောက်ရေးအတွက် ကို ပဲဦးစားပေးစေချင်သည်ဟုဒေသခံများကဆိုကြသည်။
အကြောင်းမှာ ဂျပန်နိုင်ငံသို့ လေ့လာရေးခေါ်ဆိုခံရသူများအနေဖြင့်
စိတ်ပြောင်းပြီး စီမံကိန်းကို တစ်ဦးတစ်ယောက်သဘောထားဖြင့်
လက်ခံမိမှာကိုလည်း စိုးရိမ်ပူပန်နေကြသည်။

" ကန့်ကွက်တယ်ဆိုရင် ကန့်ကွက်တယ်ပဲပေါ့။အဲတော့ လေ့လာရေးခေါ်လည်း
ဘာမှလိုက်သွားစရာမလိုဘူး။
အခုလို အစိုးရတာဝန်ရှိသူတွေက လုပ်နေတဲ့ လုပ်ရပ်ဟာ ကျွန်တော်တို့ဒေသလေးက
လူတွေကို သပ်လျှိုသွေးခွဲနေတာလို့ခံစားရတယ်။မညီမညွတ်ဖြစ်ရင်
စီမံကိန်းအကောင်အထည်ဖော်ဖို့ အတွက်အဆင်ပြေသွားနိုင်တယ် " ဟုဆိုသည်။

စီမံကိန်းတစ်ခု အကောင်အထည်ဖော်တည်ဆောက်ရာတွင် ဒေသခံတို့၏
သဘောတူညီမှု၊အကျိုးစီးပွား၊ရပိုင်ခွင့်နှင့်
အခြေခံလူ့အခွင့်အရေးမည်မျှရှိသင့်သည်ကို
ပွင့်လင်းမြင်သာစွာချပြရန်လိုအပ်ပြီး ဒေသခံတို့၏ သဘောတူညီမှုရရှိမှ
သာလျှင် စီမံကိန်းကိုအကောင်ထည်ဖော်ဆောင်ရွက်ရမည်ဖြစ်ကြောင်း
နိုင်ငံသားပညာရေး နည်းပြဆရာ(Civic Educator) ဦးမန်းသိုက်ထွန်းကဆိုသည်။

" စီမံကိန်းအကောင်အထည်ဖော်ဖို့အတွက် ဒေသခံတွေအချင်းချင်း
မညီမညွတ်ဖြစ်အောင်လုပ်မယ်။မက်လုံးတွေပေးမယ်။ဒါတွေကို သတိထားဖို့လည်း
လိုအပ်တယ်။အားလုံးက သဘောတူညီစွာနဲ့လက်မခံဘူး ကန့်ကွက်တယ်ဆိုရင် ဥပဒေအရ
စက်ရုံဆောက်လို့မရပါဘူး " ဟု ဆိုသည်။


မြန်မာနိုင်ငံတွင် ရှမ်းပြည်နယ်အတွင်းရှိ တီကျစ်ကျောက်မီးသွေးရုံ ၊
နောင်ချို ကျောက်မီးသွေးစက်ရုံ နှင့် တနသာင်္ရီတိုင်း
ကော့သောင်းမြို့နယ်အတွင်းရှိ ကျောက်မီးသွေးစက်ရုံအပါအ၀င်စုစုပေါင်း
ကျောက်မီးသွေးစက်ရုံ ၃ ရုံတည်ရှိပြီး တီကျစ်စက်ရုံမှာ မီဂါဝပ် ၁၂၀
ထုတ်လုပ်နိုင်သောစက်ရုံဖြစ်ပြီး မိဂါဝပ် ၄၀ ထွက်ရှိသည်။
နောင်ချိုကျောက်မီးသွေးစက်ရုံမှာ ၁၅ မိဂါဝပ်ထုတ်လုပ်နိုင်ပြီး
ကော့သောင်းမြို့နယ်အတွင်းရှိ ကျောက်မီးသွေးစက်ရုံမှာ ၈
မီဂါဝပ်ထုတ်လုပ်နိုင်ကြောင်းသိရသည်။

ကျောက်မီးသွေးသုံးစက်ရုံတည်ဆောက်ခြင်းကြောင့်
ဆာလဖာဒိုင်အောက်ဆိုဒ်ဓာတ်ငွေ နှင့် ကာဗွန်ဒိုင်အောက်ဆိုဒ်
ဓာတ်ငွေ့များထွက်ပေါ်ပြီး သဘာဝပန်းဝန်းကျင်ရှိ
အပင်များပျက်စီးခြင်း၊လေထုညစ်ညမ်းခြင်းများဖြစ်ပေါ်ပြီး
အသက်ရှုမ၀ရောဂါဖြစ်ပွားခြင်း၊အဆုတ်ရောဂါများဖြစ်ပွားခြင်းတို့ ကို
တီကျစ်ကျောက်မီးသွေးစက်ရုံအနီးရှိ ဒေသခံများခံစားရကြောင်း
သဘာဝပတ်ဝန်းကျင်ပညာရှင် ဦးစောမိုးမြင့်ကပြောသည်။

ဂျပန်နိုင်ငံရှိကျောက်မီးသွေးဓာတ်အားသုံးစက်ရုံများ၏ ပေ၂၀၀ ၀န်းကျင်တွင်
စက်ရုံမှထွက်သော ကာဗွန်ဒိုင်အောက်ဆိုဒ် နှင့်
ဆာလဖာဒိုင်အောက်ဆိုဒ်များကို စုပ်ယူရန်အတွက်
ကာကွယ်ရေးဇုံများကိုတည်ဆောက်ထားပြီး စက်ရုံဝန်ထမ်း သုံပြုံနှစ်ပုံတွင်
သဘာဝပတ်ဝန်းကျင်ထိန်းသိမ်းရေးပညာရှင်များကို ခန့်အပ်ထားကြပြီး
မြန်မာနိုင်ငံတွင် အခြားနိုင်ငံများနည်းတူ
သဘာဝပတ်ဝန်းကျင်ပျက်စီးမှုမရှိစေရန်အတွက်
လုပ်ဆောင်နိုင်မည်လားဆိုသောမေးခွန်းလည်းထုတ်ရန်လိုအပ်သည်ဟု
သတ္တုတွင်းဝန်ကြီးဌာနအငြိမ်းစား ဦးစောမိုးမြင့်ကဆိုသည်။

"ငရုပ်ကောင်းမြို့နယ်မှာတည်ဆောက်မဲ့ ကျောက်မီးသွေးစက်ရု့က
မီဂါဝပ်ထောင်ဂဏန်းလောက်ရှိမယ်လို့ပြောနေကြတယ်။တကယ်တမ်း အဲဒေသရဲ့
ဓာတ်အားလိုအပ်မှုက ၅၀ရာခိုင်နှုန်းလောက်ပဲရှိပါတယ်။ဘေးထွက်ဆိုးကျိုးများတဲ့
အတွက် ကျောက်မီးသွေးဓာတ်အားသုံးစက်ရုံကိုမဆောက်စေချင်ဘူး" ဟု ဆိုသည်။

ငရုပ်ကောင်းမြို့နယ်သည် ပင်လယ်ကမ်းခြေနှင့်နီးစပ်၍
လေအားလျှပ်စစ်ထုတ်လုပ်ရေး ၊ နေရောင်ခြည်သုံး လျှပ်စစ်စွမ်းအင်သုံး
ရရှိရေးတို့ကို သက်ဆိုင်ရာတာဝန်ရှိသူများအနေဖြင့်
ကြိုးစားသင့်ကြောင်းမှတ်ချက်ပြုပြောကြားသည်။

ယခုအချိန်အတွင် ကျောက်မီးသွေးစက်ရုံတည်ဆောက်မည့်လော သို့မဟုတ်
မတည်ဆောက်တော့ဘူးလောဆိုသည်ကို သည်းသည်းကွဲကွဲမသိရသေးသော်လည်း
ကျေးရွာဖွံ့ဖြိုးရေးလမ်းဟုဆိုကာ ဒေသခံရွာသားတို့၏ နှစ်ပေါင်း ၆၀
ခန့်ရှိသော အုန်းပင်ကြီးများကို ဘူဒိုဇာများဖြင့်ထိုးဖြတ်ပြီး
ဆယ်ဘီးသွားကားလမ်းမကြီးမများလာရောက်ဖောက်နေပြီဖြစ်သည်။

 




နိုင်ငံတကာမှ ကျောက်မီးသွေးဓာတ်အားပေးစက်ရုံတည်ဆောက်ခြင်းသည်
သဘာဝပတ်ဝန်းကျင်ကို ထိခိုက်ပျက်စီးစေ၍ တားဆီးပိတ်ပင်ကန့်ကွက်နေချိန်တွင်
ငရုတ်ကောင်းမြို့နယ်အတွင်း ရှိ နှစ်ရှည်ပင်အုန်းခြံကြီးများ ၊
ကွမ်းသီးပင်များ နှင့် ဒေသခံတို့၏ စိုက်ခင်းများဆီသို့
ကျောက်မီးသွေးဓာတ်အားပေးစက်ရုံတည်ရောက်ရှိလာမည်ကို
စိုးရိမ်ကြောက်ရွံ့ပူပန်နေကြပြီဖြစ်သည်။




ထို့ကြောင့် " ကျောက်မီးသွေးစွမ်းအင်သုံး လျှပ်စစ်ဓာတ်အားပေး စက်ရုံအလိုမရှိ  (NoCoal Power Station ) "



" ကျွန်ုပ်တို့ရွာကို ပြောင်းရွှေ့မပေးနိုင်ပါ (We will Not Display OurVillage ) "
စာသားပါ စာရွက်များကို အိမ်တံခါးအ၀များ ၊ လမ်းဘေးသစ်ပင်များတွင် ကန့်ကွက်ကြောင်း
ကပ်ထားကြခြင်းဖြစ်သည်။

ဖိုးစိုးသူ

ယခုသတင်းကို သတင်းဌာနတစ်ခုသို့ ပို့ဖူးပါတယ်။
ဆယ်ရက်ကျော်ကြာခဲပြီဖြစ်လို့ အွန်လိုင်းမှာ တင်လိုက်ပါတယ် ။
အခုဆိုရင် ပုသိမ်မြို့နယ် အတွင်းက ငရုပ်ကောင်းမြို့နယ်ခွဲမှာ ကျောက်မီးသွေးစက်ရုံကို
တိုင်းဒေသကြီးအစိုးရက နောက်မဆုတ်ပဲတည်ဆောက်တော့မယ်လို့လည်းသိရပါတယ်။

No comments:

Post a Comment

Related Posts Plugin for WordPress, Blogger...