Monday, November 3, 2014

တရားစီရင်ရေး၊ စီးပွားရေးနှင့် ပွင့်လင်းမြင်သာမှု

DAGON CITY ကြော်ငြာဆိုင်းဘုတ်ကို တွေ့ရစဉ်
 DAGON CITY ကြော်ငြာဆိုင်းဘုတ်ကို တွေ့ရစဉ်

မြန်မာနိုင်ငံတွင် တရားစီရင်ရေးမဏ္ဍိုင် ယိုင်လဲပျက်စီးယိုယွင်းနေခြင်းကို မည်သူမှ မငြင်းနိုင်ပါ။ စစ်အစိုးရ အဆက်ဆက် ဆိုရှယ်လစ်ခေတ်မှစပြီး ဗိုလ်ချုပ်သန်းရွှေလက်ထက်အဆုံး တရားစီရင်ရေးသည် အုပ်ချုပ်သူများ၏ အလိုကျ မည်သူ့ကို ထောင်ချမည်၊ မည်သူ့ကို လွှတ်မည်၊ မည်သူ့ကိုတော့ ဘယ်လိုပုဒ်မဖြင့် တရားစွဲမည်တို့ကို ရဲနှင့် တရားသူကြီးများက မဆုံးဖြတ်ဘဲ အထက်က အမိန့်နှင့်သာ ဆုံးဖြတ်သည့် ဓလေ့သည် အမြစ်တွယ်လာပြီး
တရားသူကြီးများနှင့် ရဲများပါ အုပ်ချုပ်သူအစိုးရအလိုကျ မတပ်သင့်သည့်ပုဒ်မများတပ်၊ အမှုထင်ရှားသော်လည်း အထက်ကလွှတ်ဆိုလျှင်လွှတ် အမှုမထင်ရှား၊ သက်သေမခိုင်လုံလည်း အထက်က ထောင်ချဆိုလျှင်ချ၊ ထောင်ချသည့်အခါ၌လည်း ဥပဒေကြောင်းအရ ၂ နှစ်လောက်သာကျမည့်အမှုကို ၁၀နှစ် အနှစ်၂၀ ချ ဆိုလျှင် မျက်စိမှိတ်ချရသည့် ရုပ်သေးအဖွဲ့ဝင်များအဖြစ် ယနေ့အထိ အစွဲမကျွတ်သေးတာကို တွေ့ရသည်။

သာဓကအားဖြင့် သာသာနာရေးဝန်ကြီးဟောင်းဦးဆန်းဆင့်ကို ရုံးထုတ်သည့်အခါ သတင်းထောက်များနှင့် လုံးဝ ထိ တွေ့ခွင့် မရအောင် တရားရုံးဝင်းအတွင်းသို့ သတင်းထောက်များကို ဝင်ခွင့်မပေးဘဲ ဝင်းကို ပိတ်ထားခြင်း၊ အရပ်ဝတ်ထောက်လှန်းရေးများဖြင့် ဦးဆန်းဆင့်ကို အဝေးမှဓါတ်ပုံရိုက်ယူ၍ မရစေရန် တင်းကြပ်စွာ လူများဖြင့် ကာရံပိတ်ဆို့ထားခြင်း၊ အာမခံပေးနိုင်သော အမှုဖြစ်သော်လည်း အာမခံပေးရန် တရားသူကြီးမှ ငြင်းလိုက်ခြင်းတို့သည် ယင်းတရားသူကြီး၏ ကိုယ်ပိုင်ဆုံးဖြတ်ချက်ဖြစ်ရန် ခဲယဉ်းသည်။ အထက်အာဏာပိုင်အဖွဲ့အစည်းမှ တိုက်ရိုက်ညွှန်ကြားချက်အရ ဖြစ်နိုင်ခြေများသည်။ အဘယ့်ကြောင့်ဆိုသော် ကျန်းမာရေးမကောင်းသည့်သူတဦးက ဆေးမှတ်တမ်းများနှင့်တကွ အထောက်အထား အပြည့်အစုံနှင့် တင်ပြမှုကို ငြင်းပယ်လိုက်ခြင်းသည် တစ်ခုခု မှားယွင်းနေကြောင်း ထင်ရှားစေသည်။ အာမခံမပေးနိုင် လောက်အောင် အမှုမှာနိုင်ငံတော်ပုန်ကန်မှု မဟုတ်ဘဲ အဂတိလိုက်စားမှုဖြင့် စွဲထားသောသာမန်အမှုသာ ဖြစ်သည်။ ဘာကြောင့် အာမခံမပေးနိုင်သနည်း။ ဦးဆန်းဆင့်ကို အဂတိလိုက်စားမှုဖြင့် တရားစွဲဆိုထားခြင်း အပေါ်ယံအကြောင်းပြချက် ဖြစ်ဖို့များပြီး အဓိကနိုင်ငံရေး မကြေလည်မှုကြောင့်ဟု ယူဆမိသည်။ အဘယ့်ကြောင့်ဆိုသော် ပထမဆုံးရုံးထုတ်သောနေ့တွင် ဦးဆန်းဆင့်က “သူနှင့် သမ္မတကြီးတို့ သဘောချင်း မတိုက်ဆိုင်” ဆိုသည့် စကားကိုအစောင့်အကြပ်များက တွန်းတွန်းထိုးထိုးဝိုင်းဝန်း ပိတ်ဆို့ပြီး အတင်းအကြပ် ကားပေါ်တွန်းတင်နေစဉ်တွင် ပြောကြားသွားခဲ့ခြင်းကြောင့် ဖြစ်သည်။ အစိုးရအဖွဲ့ဝင် ဗိုလ်ချုပ်ဟောင်းများ အကြား တစ်ယောက်နှင့် တစ်ယောက် အတွင်းသိများဖြစ်သဖြင့် အတွင်းသတင်းများ မပေါက်ကြားစေရန် ထိန်းချုပ်ပိတ်ပင်ထားခြင်းသည် ဖြစ်နိုင်ခြေ များစွာရှိသည်။ မည်သို့ပင်ဖြစ်စေ ထိုလုပ်ရပ်သည် တရားမဲ့ လုပ်ရပ်သာဖြစ်သည်။ တရားဥပဒေအုပ်စိုးမှု ချို့ယွင်းနေကြောင်း သက်သေပြချက် တစ်ခုလည်းဖြစ်သည်။ အဂတိလိုက်စားမှုနှင့် အရေးယူခံထားရသူတစ်ဦးအား လုံခြုံရေးတင်းကြပ်စွာချပြီး ပြည်သူနှင့် အဆက်ဖြတ် ထားခြင်း၊ တရားရုံးတွင် အများပြည်သူကြားနာခွင့်မရအောင် ပိတ်ပင်ထားခြင်းတို့သည် လူ့လွတ်လပ်ခွင့်ကို ဗြောင်ချိုးဖေါက်လိုက်ခြင်းပင်ဖြစ်သည်။

ထို့ပြင် ဗကသအဖွဲ့ဝင် မဖြူနှင်းထွေးကိုလည်း တရုတ်ဝမ်ပေါင်ကုမ္ပဏီမှ အလုပ်သမားနှစ်ဦးကို ပြန်ပေးစွဲမှုဖြင့် ဖမ်းဆီးထားရာမှာ လည်း အာမခံလျှောက်ထားခြင်းကို စစ်ကိုင်းတိုင်းဒေသကြီး ယင်းမာပင်ခရိုင် တရားရုံးက ပယ်ချခဲ့သည်။ လူအများစုက လွှတ်ပေးရန်တောင်းဆိုနေသော ကျောင်းသူတစ်ဦးကို အာမခံမပေးနိုင်လောက် အောင် ဘာကြောင့်များ တင်းခံနေရသနည်း။ ထိုကျောင်းသူလေးသည် မည်မျှအန္တရာယ်ကြီးသူဖြစ်နေ၍ အာမခံ မပေးနိုင်သနည်း တခုခုတော့ရှိမည်ပင်ဖြစ်သည်။ သူတို့အလုပ်သမားနှစ်ဦးကို ဖမ်းဆီးထားသည့်ရွာသားများကို ဝမ်ပေါင်ကုမ္ပဏီကအမှုရုတ်သိမ်းပေးသော်လည်း အစိုးရတရားရုံးမှ မဖြူနှင်းထွေးကို တရားစွဲ၍ အာမခံပင် မပေးဘဲထားခြင်းသည် ကျောင်းသားများကို ဆူပူလာအောင် ဆွပေးနေသည့်အင်အားစုများ ရှိနေပြီးလားဟု တွေးစရာဖြစ်လာခဲ့သည်။ ထိုသို့ဆူပူစေလိုလျှင် နောက်ကွယ်မှ မည်သည့်ရည်ရွယ်ချက်များထားရှိသနည်းကို ဆန်းစစ်ကြည့်ကြဖို့လိုပေသည်။

မန္တလေးရှိ တရားရုံးတွင် လိုအပ်သည့် စားပွဲကုလားထိုင်၊ လက်နှိပ်စက်၊ ပရိဘောဂ မှန်သမျှ ရှေ့နေများက လှူရသည်ဟု သိရသည်။ မန္တလေးတိုင်းတရားသူကြီး ဦးလှဝင်းလက်ထက်တွင် သူ့အား သိန်း ၁၀၀ လှဝင်းဟု အမည်တွင်သည့်အထိ လာဘ်စားသည့်နေရာတွင် ကျော်ကြားသည်ဟု ဆိုကြသည်။ တရားရုံးမှာ အာမခံ လျှောက်လျှင် အမှူတွဲကိုယူပြီး တိုင်းတရားသူကြီးထံ သွားပြရသည်ဟု ဆိုသည်။ ပုဒ်မ ၁၈ နှင့် ၅၀၅ (ခ) တို့ဆိုလျှင် မြို့နယ်တရားသူကြီးက အမိန့်မချဘဲ လွှတ်တော်အမိန့်စောင့်ရကြောင်း ဗြောင်ပြောသည်ဟု သိရသည်။ ထိုကိစ္စများကို ဟုတ်မဟုတ် စစ်ဆေးပြီး တရားဥပဒေနှင့်အညီဖြစ်ရန် ဆောင်ရွက်ဖို့ လိုပေသည်။ တရားသူကြီးများအနေနှင့် ရဲတပ်လိုက်သောပုဒ်မသည် အမှုနှင့်အကျုံးဝင်ခြင်း ရှိမရှိကို စစ်ဆေးခြင်း၊ အကျုံးဝင်ပါက လက်ခံပေးခြင်း၊ အကျုံးမဝင်ပါက ပယ်ချခြင်း ပြုလုပ်နိုင်ခွင့်ရှိဖို့လိုသည်။ ထို့အတူ အမှုစစ်ဆေးရာတွင်လည်းကောင်း၊ အာမခံပေးရာတွင်လည်းကောင်း တရားသူကြီးမှ ကိုယ်ပိုင်ဥာဏ်ဖြင့် စဉ်းစားပြီး တရားဥပဒေ ပြဋ္ဌာန်းချက်နှင့်အညီ လွတ်လပ်တရားမျှတစွာ ဆုံးဖြတ်နိုင်ခွင့် ယနေ့အချိန်ထိ မရှိသေးသည်မှာ ဝမ်းနည်းစရာဖြစ်သည်။ “တရားစီရင်ရေးမဏ္ဍိုင်သည် အုပ်ချုပ်ရေးအောက်မှာ ရှိနေတယ်” ဟု သူ့အနေနှင့်ခံစားရကြောင်း ရေးလွှတ်တော်ကိုယ်စားလှယ် ဒေါ်မိသန်းမြင့်က ပြောသည်။ ကွန်ဟိန်းလွှတ်တော် ကိုယ်စားလှယ် ဒေါ်နန်းဝါနုကလည်း အုပ်ချုပ်ရေးက တရားစီရင်ရေးအပိုင်းကို ဝင်မစွက်ဖက်ဘဲ သူ့လုပ်ပိုင်ခွင့်နှင့် သူရှိစေချင်ကြောင်းပြောခဲ့သည်။

စက်တင်ဘာလ၊ ၃၀ ရက်နေ့တွင် ပြည်ခိုင်ဖြိုးအမတ်သူရဦးအောင်ကိုက “နိုင်ငံရဲ့တတိယမဏ္ဍိုင်ဖြစ်တဲ့ တရားစီရင်ရေးမဏ္ဍိုင်ဟာ တည်ဆဲတရားဥပဒေနဲ့အခြေခံဥပဒေကို ရိုးသားဖြောင့်မတ်စွာ လိုက်နာကျင့်သုံးဖို့လို တယ်” ဟု လွှတ်တော်ထဲတွင်ပြောသွားခဲ့သည်။ သူက “တရားစီရင်ရေးဟာ ပက်ကျိလိုနှေးကွေးလွန်းပြီး တချို့အမှုတွေမှာ စီရင်ချက်ချဖို့ကို နှစ်များစွာကြာသည့်အတွက် ငွေကုန်လူပန်းစိတ်ပန်းဖြစ်ရတယ်” ဟု ဆိုသည်။ သူက ဆက်လက်၍ “တရားရုံးတွေကို ယုံကြည်မှုနည်းလာတာကြောင့် အဲ့ဒီကိစ္စဟာ တရားဥပဒေ စိုးမိုးရေးကိုပါ ထိခိုက်လာနိုင်တယ်” ဟု သတိပေးခဲ့သည်။

ဒေါ်အောင်ဆန်းစုကြည်က ဥက္ကဋ္ဌအဖြစ် ဆောင်ရွက်နေသော တရားဥပဒေစိုးမိုးရေးနှင့် တည်ငြိမ်အေးချမ်းရေး ကော်မတီက တရားရုံးများကို စောင့်ကြည့်ဖို့ လွတ်လပ်သည့် တရားဥပဒေ စိုးမိုးရေးစင်တာတွေ ပြည်နယ်နှင့် တိုင်းတွေမှာဖွင့်ဖို့အဆိုပြုထားသည်ကို ပြည်ထောင်စုတရားလွှတ်တော်ချုပ် တရားသူကြီး ဦးစိုးညွန့်က အခြေခံ ဥပဒေနှင့်မကိုက်ညီဟု ကန့်ကွက်ခဲ့သော်လည်း လွှတ်တော်က အတည်ပြုခဲ့ခြင်းသည် အကျင့်ပျက် ခြစားနေသည့် တရားစီရင်ရေးမဏ္ဍိုင်ကြီးကို တည့်မတ်နိုင်မည့် တိုးတက်မှုတစ်ရပ်အဖြစ် ကြိုဆိုရမည် ဖြစ်သည်။ တရားဥပဒေစိုးမိုးရေးနှင့် တည်ငြိမ်အေးချမ်းရေးကော်မတီက တိုင်ကြားစာ ၇၀၀၀ ခန့် ရရှိခဲ့သည်။ ပြည်သူများ ပေးပို့ကြသည့် တိုင်ကြားစာများထဲတွင် တရားရေးနှင့်ပတ်သက်သည့်တိုင်ကြားစာ ပေါင်း ၃၅၀၀ ရှိပြီး လယ်မြေနှင့်ပတ်သက်သည့် တိုင်ကြားစာက ဒုတိယလိုက်ကာ ၂၅၀၀ ခန့် ရှိနေသည်ကို တွေ့ရသည်။ ယင်းတို့သည် အခြားတိုင်ကြားစာများထက် များနေသည်မှာ အံ့သြစရာတော့ မဟုတ်ပါ။

နောက်တစ်ခု တင်ပြချင်သည်မှာ တရားစွဲဆိုမှု အကြောင်းပင်ဖြစ်သည်။ အခြေခံဥပဒေအရ ပြည်သူများကို သူတို့ရဲ့ လုပ်ပိုင်ခွင့်များ ပေးထားပါသည်။ မည်သူ့ကိုမျှ မတရားလုပ်၍ မရအောင် အခြေခံဥပဒေက အကာကွယ်ပေးထားခြင်း ဖြစ်သည်။ ထိုအခါ မတရားအလုပ်ခံရလျှင် ယင်းသို့ မတရားလုပ်ခံရသူက မတရားလုပ်သူကို တရားစွဲပိုင်ခွင့်ရှိသည်။ သို့ရာတွင် လက်တွေ့တွင်မူ ရဲနှင့် အစိုးရအဖွဲ့အစည်းများကသာ ပြည်သူများထဲမှ သူတို့နှင့်ထိပ်တိုက်ဖြစ်လာသူများကိုသာ တရားစွဲခွင့်ရှိနေပြီး မတရားခံရသောပြည်သူများက ပြန်လှန်တရားစွဲဆိုရန် တိုင်ကြားသည့်အခါ အမှုပင် ဖွင့်ခွင့်မရှိသော အခြေအနေသို့ ဆိုက်ရောက်နေခြင်းသည် တရားဥပဒေစိုးမိုးမှု အမှန်တကယ်မရှိဘဲ စနစ်ဟောင်း၏ အရိပ်မဲကြီးလွှမ်းမိုးနေစဲဖြစ်ကြောင်းဖေါ်ပြနေခဲ့သည်။ ဥပမာအားဖြင့် မဟာသန္တိသုခကျောင်းတိုက်မှာ သီတင်းသုံးနေသော လန်ဒန်ဆရာတော် ဦးဥတ္တရ၊ ဦးတေဇိန္ဒ၊ ဦးသုန္ဒရ၊ ဦးနန္ဒိယနှင့် ဦးပညာဝရတို့ကို ပြည်ထဲရေး၊ သာသနာရေးနှင့် နိုင်ငံတော်သံဃာ့မဟာနာယကအဖွဲ့မှ ပြီးခဲ့သည့် ဇွန်လ ၁၀ ရက်နေ့ ညက ၀င်ရောက်ဖမ်းဆီးပြီး သာသနာတော် ညှိုးနွမ်းစေမှု ပုဒ်မ ၂၉၅(က)နှင့် တရားစွဲဆိုခဲ့သည်။

သူတို့ကို မတရားချုပ်နှောင်ထားမှုကြောင့် နိုင်ငံတော်သံဃာ့မဟာနာယကအဖွဲ့ဥက္ကဋ္ဌ အပါအဝင်သံဃာ အပါး ၂၀ ကို တရားစွဲဖို့ မရမ်းကုန်းမြို့နယ်တရားရုံး၌ လန်ဒန်ဆရာတော် ဦးဥတ္တရက  လျှောက်ထားရာတွင် မြို့နယ် တရားသူကြီးက ပယ်ချခဲ့သည်။ လန်ဒန်ဆရာတော် ဦးဥတ္တရအပါအဝင် သံဃာတော် ၅ ပါးတို့သည် အင်းစိန်ထောင်တွင် မတရားဖမ်းဆီးအချုပ်နှောင်ခံရသည့်အပြင် အတင်းအဓမ္မ သင်္ကန်းချွတ်ခံရသည့်အထိ စော်ကားသိက္ခာချခံရသူများဖြစ်သည်။ ထိုသို့တရားဥပဒေမဲ့ မတရားပြုခံရသည့်အပြင် တာမွေမြို့နယ်တရားရုံး၌ သာသနာတော် ညှိုးနွမ်းစေမှုနှင့် တရားစွဲဆိုခံထားရသည်။ အစိုးရက ထောက်ပံ့အားပေးပြီး အစိုးရ အလိုကျ လိုက်ရပ်တည်ပေးသည့် မဟနအဖွဲ့က တိုင်ကြားသည်ကို အလျင်စလို ပြုလုပ်ပေးသော်လည်း မတရားခံရသည့်သူများက ပြန်လှန်တရားစွဲသည့်အခါ အမှုကို လက်မခံဘဲ ပယ်ချခြင်းသည် တရားဥပဒေ ကျင့်စဉ်နှင့် ဆန့်ကျင်နေခဲ့သည်။ ဖြစ်သင့်သည်မှာ တိုင်ကြားသူရှိလျှင် အမှုစစ်ဆေးပေးခြင်းသည် တရားရုံး အလုပ်ဖြစ်သော်လည်း အစိုးရနှင့်အလွမ်းသင့်သူများ တိုင်ကြားလျှင် အရေးယူဆောင်ရွက်ပေးပြီး ထိုသူတို့နှင့် ဆန့်ကျင်ဖက်မှ တိုင်ကြားလာလျှင် ပယ်ချနေခြင်းသည် ယနေ့အကျင့်ပျက်နေသော တရားရေးဌာန၏ စရိုက်လက္ခဏာ တစ်ခုပင်ဖြစ်သည်။ ရဲဌာနများသည်လည်း ထိုနည်းလည်းကောင်းပင်။ အစိုးရဌာနဖြစ်စေ၊ အာဏာပိုင်အဖွဲ့မှဖြစ်စေ၊ တပ်မှဖြစ်စေ တရားစွဲလျှင် ချက်ချင်းရသည်။ ချက်ချင်းအရေးယူသည်။ အစွဲခံရသူများ အချုပ်ခံရသည်၊ ထောင်ကျသည်။ သို့ရာတွင် ထိုသူများက ပြန်လှန် တရားစွဲပိုင်ခွင့် မရှိချေ။ ထိုအခါ မတရားမှုတို့သည် တိုးပွါးလာပြီး မျှတသည့်ကြားနာစစ်ဆေးမှုမရှိဘဲ ပြည်သူတို့ခေါင်းငုံခံရသည့် အာဏာရှင် စနစ်နှင့် ထူးမခြားနားဖြစ်နေသည်။ မျှတသည့်တရားစီရင်ရေး ဖြစ်လာရန် တရားခံဖြစ်နေသူမှ ပြန်လှန် တရားစွဲခွင့်ကိုလည်းပေးရမည်ပင်။ ထို့မှသာ မည်သူ မှန်သည် မှားသည် ကွဲပြားလာမည့်အပြင် မတရားတဖက်သပ် တရားစွဲမှုများကိုလည်း ဟန့်တားထားနိုင်မည်ဖြစ်သည်။

စီးပွားရေးနှင့် ပွင့်လင်းမြင်သာမှု
မကြာခင်က အုတ်အော်သောင်းနင်းဖြစ်သွားခဲ့သည့် ရန်ကုန်မြို့သစ်စီမံကိန်းသည် လက်သိပ်ထိုးစီးပွားရေး လုပ်ငန်းများ တွင်ကျယ်နေမှု အကင်းမသေသေးကြောင်း မီးမောင်းထိုးပြသခဲ့သည်။ အစိုးရမှ ဤစီမံကိန်းကို ရပ်ဆိုင်းလိုက်ခြင်းသည် ကောင်းမွန်သော ဆုံးဖြတ်ချက်ပင် ဖြစ်သည်။ ဧကများစွာပါဝင်သော မြို့သစ် စီမံကိန်းသည် ရုံးခန်းပင်မရှိသော ကုမ္ပဏီတခုလက်ထဲသို့ ဝကွက်အပ်လိုက်မည့်သဘော ရန်ကုန်တိုင်း ဝန်ကြီးချုပ်က ဦးမြင့်ဆွေ တင်ပြခဲ့ခြင်းသည် မည်မျှအကျင့်ပျက် ချစားနေကြောင်း ပေါ်လွင်ခဲ့သည်။ ထို့အတူ ဦးထောင်ဗိုလ်ကုန်းဆင်းရှိစစ်တပ်ပိုင်မြေဧက ၂၀ ခန့်ကို MARGA Group မာဂါအုပ်စုမှ ဒဂုံမြို့DAGON CITY အမည်ဖြင့် စတင်ဆောက်လုပ်နေပြီဖြစ်သည်။ ထိုတပ်ပိုင်မြေတွင် ဆောက်လုပ်ခွင့်ကို မည်သူကပေးပြီး မည်မျှ အကျိုးခံစားခွင့်ရသည်ကိုမူမသိရသေးပေ။ ရုတ်တရက် ဆာ့ချပန်းဆိုသူက ယင်းပရိုဂျက်ကို ရရှိသွားခဲ့သည်။

ပြည်တွင်းစစ်တွင်ကျဆုံး၊ ဒုက္ခိတဖြစ်ခဲ့ကြသည့်ရဲဘော်များ၊ သူတို့၏မိသားစုများအတွက် မည်မျှအကျိုးခံစားခွင့် ရမည်နည်း။ ကောင်းစားသွားသူများတွင် အောက်ခြေရဲဘော်မိသားစုများ ပါဝင်နိုင်မည်မဟုတ်ဟုထင်သည်။

မြန်မာနိုင်ငံတွင် စီးပွါးရေးလုပ်ငန်းများ ပွင့်လင်းမြင်သာမှုရှိဖို့လိုသလို လွတ်လပ်စွာ ယှဉ်ပြိုင်နိုင်ခွင့်ရှိဖို့လည်း လိုပေသည်။ ရန်ကုန်မြို့သစ်စီမံကိန်းနှင့် ဒဂုံမြိ်ု့စီမံကိန်းမှာလက်သပ်ထိုးလုပ်ဆောင်ခဲ့သော လုပ်ငန်းများသာ ဖြစ်သည်။ လွတ်လပ်စွာယှဉ်ပြိုင်မှုမရှိသဖြင့်တိုင်းပြည်မှရသင့်သလောက်ဈေးရချင်မှရခဲ့ပေလိမ့်မည်။
ဦးသိန်းစိန်အစိုးရသည် စစ်အာဏာရှင်စနစ်အရိုးစွဲနေမှုကို အမြစ်ကစ ပြုပြင်ပြောင်းလဲမှု ပြုလုပ်ရာတွင် အခက်အခဲပေါင်းများစွာကို ကျော်ဖြတ်ရပေလိမ့်မည်။ ထိုအခက်အခဲများတွင် အထက်က ပေါ်လစီချပေး လိုက်သော်လည်း ကြိုးနီစနစ်ကြောင့် အောက်ခြေသို့ မရောက်နိုင်ဘဲ လမ်းခုလပ်တွင် တစ်နေသဖြင့် အလုပ် မတွင်ကျယ်မှုများ ရှိသလို အထက်ပိုင်းတွင်ပင် ယခင်စနစ်ဟောင်းအတိုင်း မည်သူ့ကိုမျှအရေးမစိုက်ဘဲ အာဏာသုံး၍ ကိုယ်လုပ် လိုသည်ကို တဇွတ်ထိုးလုပ်လိုသည့် ရှေးရိုးသမားများနှင့် လွန်ဆွဲမှုများလည်း ကြုံတွေ့ ရမည်ဖြစ်သည်။ အရေးကြီးဆုံးအချက်မှာ ပြဋ္ဌာန်းထားသည့် တရားဥပဒေကို တိတိကျကျ လိုက်နာစေရန် လိုအပ်သော နည်းဥပဒေများ ပြဋ္ဌာန်းပြီး တရားဥပဒေစိုးမိုးရေးကို အာရုံစိုက်ပြုလုပ်ကာ တဖက်မှလည်း ခေါက်ရိုးကျိုးနေသော အကျင့်ပျက်တရားသူကြီးများကို လူသစ်လူကောင်းများနှင့် အစားထိုးပြီး အုပ်ချုပ်ရေး ယန္တရားက တရားစီရင်ရေးယန္တရားကို ဝင်ရောက်စွက်ဖက် အမိန့်ပေးမှုများကို ရှောင်ရှားနိုင်မည် ဆိုလျှင် မြန်မာနိုင်ငံသည် တရားဥပဒေစိုးမိုးလာပြီး ပြည်သူများ စိတ်၏ချမ်းသာခြင်း ကိုယ်၏ကျန်းမာခြင်းတုိ့ဖြင့် နေထိုင်နိုင်ကြပေလိမ့်မည်။

၂၀၁၄ ခုနှစ်၊ အောက်တိုဘာလ၊ ၃၁ ရက်နေ့ထုတ် ဟစ်တိုင်ဂျာနယ် အတွဲ၁ lအမှတ် ၄၉ ပါ ကျနော့်ဆောင်းပါး "တရားစီရင်ရေး၊ စီးပွားရေးနှင့် ပွင့်လင်းမြင်သာမှု" ကို အားလုံးဖတ်ရအောင် ဒီနေရာမှာ တင်ပေးလိုက်ပါတယ်။

အားလုံးကိုလေးစားလျက်။

ထွန်းအောင်ကျော် (၇၄ မျိုးဆက်)

No comments:

Post a Comment

Related Posts Plugin for WordPress, Blogger...