Friday, September 5, 2014

စစ်တက္ကသိုလ် နှစ် ၆၀ပြည့် (သို့မဟုတ်) အပေါ်လွှာစစ်လူတန်းစားများ မွေးဖွားရာဒေသ

 
၂၀၁၄ ခုနှစ် စက်တင်ဘာလ ၁ရက် နေ့ထုတ်အဓိပတိဂျာနယ်တွင်ဖေါ်ပြခဲ့သည့်ကျနော့်ဆောင်းပါကို တင်ပေးလိုက်သည်။

The Defence Services Academy (DSA) ကို မြန်မာများက မေမြို့စစ်တက္ကသိုလ်ဟု ခေါ်ကြသည်။  ထိုတက္ကသိုလ်သည် မြန်မာနိုင်ငံ၏ အနာဂါတ်စစ်ဗိုလ်လောင်းများကို မွေးထုတ်ပေးသည့် အဓိကစစ်တက္ကသိုလ် ဖြစ်သည်။ ကြည်း၊ရေ၊ လေဌာနသုံးခုလုံးအတွက် စစ်အရာရှိများကို မွေးထုတ်ပေးသည့် စစ်တက္ကသိုလ်ကြီး ဖြစ်သည်။ ကာကွယ်ရေးဝန်ကြီးဌာနမှ ယင်းစစ်အကယ်ဒမီကျောင်းကြီးကို ကြီးကြပ်သည်။  ထိုစစ်တက္ကသိုလ်ကြီးမှ ဘွဲ့ကြို ဝိဇ္ဇာဘာသာတွဲ၊ သိပ္ပံဘာသာတွဲနှင့် ကွန်ပျုတာသိပ္ပံဘာသာရပ်တို့ကို သင်ကြားပေးသည်။  ၂၀၀၇ ခုနှစ် ၄၉ အပတ်စဉ်အထိ ထိုစစ်တက္ကသိုလ်သည် ယောက်ျားလေးများကိုသာ လက်ခံသင်ကြားပေးခဲ့သည်။
စစ်တက္ကသိုလ်မှ ကျောင်းဆင်းဘွဲ့ရများသည် ဌာနသုံးခုထဲမှ တစ်ခုခုကို ရွေးချယ်ပြီး လက်ခံသည့် ဌာနသို့ ဝင်ရောက်အမှုထမ်းရသည်။ မြန်မာ့တပ်မတော်၏ ထိပ်တန်းစစ်အရာရှိများသည် ဤစစ်တက္ကသိုလ် ကျောင်းထွက်များဖြစ်သည်။

နောက်ခံသမိုင်း
DSA  ကို ရှမ်းပြည်မြောက်ပိုင်း။ ဗထူးမြို့တွင် ၁၉၅၄ ခုနှစ်၌ စတင်တည်ထောင်ခဲ့သည်။ ထိုမှတဆင့် ဗြိတိသျှတို့ မေလတွင် သွားရောက်အနားယူရာမြို့ဖြစ်သည့်မေမြို့သို့ ၁၉၅၇ ခုနှစ် ဇွန်လတွင် ပြောင်းရွေ့ခဲ့သည်။ နောင်တွင် ပြင်ဦးလွင်ဟု ခေတ်ဆန်ဆန် မှည့်ခေါ်လာခဲ့သည်။ ပထမဦးဆုံး မေမြို့စစ်တက္ကသိုလ် ကျောင်းအုပ်ကြီးမှာ သီရီပျံချီ ဗိုလ်မှူးကြီးကျော်စိုးဖြစ်သည်။ လက်ရှိ ကျောင်းအုပ်ကြီးမှာ ဗိုလ်မှူးချုပ် အောင်လင်းဒွေး ဖြစ်သည်။

ပထမဆုံးစစ်တက္ကသိုလ်ဗထူးမြို့ဖွင့်ပွဲအခန်းအနားတွင် နိုင်ငံတော်ဝန်ကြီးချုပ် ဦးနု ပြောကြားခဲ့သောမိန့်ခွန်း
ပထမဆုံးစစ်တက္ကသိုလ်ဖွင့်ပွဲ မိန့်ခွန်းကို နိုင်ငံတော်ဝန်ကြီးချုပ် ဦးနုက ရှမ်းပြည်လောက်ဆောက်မြို့နယ်ရှိ တပ်မြေ၌ ပြောကြားခဲ့သည်။ ထိုတပ်မြေကို ဗိုလ်မှူးကြီးဗထူးကို ဂုဏ်ပြုသောအားဖြင့် ဗထူးမြို့ဟု မြို့ဖွင့်ပွဲကျင်းပသည့်နေ့တွင် အမည်ပေးခဲ့သည်။ ဦးနုပြောကြားသည့်အချိန်သည် မြန်မာနိုင်ငံကြီး ပြည်တွင်းစစ်မီး တောက်လောင်နေသော ကာလ ဖြစ်သဖြင့် စစ်တပ်ကို လူထုက အားကိုးအားထားပြုနေသော ကာလဖြစ်သဖြင့် ထိုစဉ်က စစ်သားများသည် ကယ်တင်ရှင်များ ဖြစ်နေခဲ့ကြသည်။ ထို့ကြောင့် နောင်အခါတွင် ထိုပြည်သူတို့က ပုံ၍အားကိုးခဲ့သော စစ်တပ်သည် ပြည်သူကို ကျွန်ပြုအုပ်ချုပ်သောအဖွဲ့အစည်းကြီး ဖြစ်လာခဲ့ပြီး ကျားကြောက်လို့ရှင်ကြီးခိုး၊ ရှင်ကြီးကျားထက်ဆိုး ဆိုသည့် ကိန်းသို့ ဆိုက်လာခဲ့ရခြင်းဖြစ်သည်။
ဦးနုပြောကြားချက်များထဲမှ အောက်ပါအချက်များသည် မှတ်သားစရာများပါပြီး မည်သည့် ရည်ရွယ်ချက်ဖြင့် မြန်မာ့တပ်မတော်ကို နိုင်ငံခေါင်းဆောင်များက တည်ထောင်ခဲ့ကြသည်ကို သမိုင်းလေ့လာသူများ ခန့်မှန်းနိုင်ရန် အတွက် ကောက်နှုတ်ဖေါ်ပြလိုက်ပါသည်။ ဦးနုက-
“ဒီအခမ်းအနားဟာ ပြည်ထောင်စုမြန်မာနိုင်ငံတော်ရဲ့ ရာဇဝင်မှာ အရေးကြီးတဲ့အခန်းသစ်တစ်ခု ဖွင့်ပေးတဲ့အခန်းအနားလို့ ဆိုနိုင်ပါတယ်။ ဘာပြုလို့လဲဆိုတော့ တိုင်းသစ်၊ ပြည်သစ် တည်ဆောက်တဲ့နေရာမှာ ပြည်သူလူထုရဲ့ ဗလငါးတန်ဟာ အရေးကြီးသလို တိုင်းပြည်တစ်ခုလုံးရဲ့ စစ်တပ်အင်အားဟာလည်း အရေးကြီးပါတယ်။ .................... ကျွန်တော်တို့နိုင်ငံကို ပြည်ပက ကျူးကျော်ဝင်ရောက် တိုက်ခိုက်စရာ လုံးဝမရှိပါဘူး။ နို့ပေတဲ့ပြည်တွင်း ငြိမ်းချမ်းရေး အမြန်ဆုံး ပြန်လည်ရရှိနိုင်ရန်နဲ့ အဲဒီရရှိပြီးသော ငြိမ်းချမ်းရေးကို တည်တံ့ခိုင်မြဲအောင် လုပ်ဖို့အတွက် လုပ်ငန်းကြီးများအနက် စစ်ဘက်နက်လက်အင်အား တောင့်တင်းခြင်းဟာ အရေးကြီးဆုံး လုပ်ငန်းကြီး ဖြစ်ပါတယ်။ .........နိုင်ငံရဲ့စစ်အင်အားတောင့်တင်းဖို့ရန် စစ်ဗိုလ်စစ်သား လုံလောက်ရုံနဲ့မရ၊ တိုးတက်ထွန်းကားနေတဲ့ သေနင်္ဂဗျူဟာ စစ်ပညာရပ်ကို စနစ်တကျ သင်ကြားပေးဖို့လဲ အထူးလိုတယ်”  ဟု စစ်တပ်၏ ခေတ်မှီတိုးတက်လာရေးကို ရည်ရွယ်ပြီးပြောကြားခဲ့သည်။ ဆက်လက်၍ သူက-
“အခြားနိုင်ငံတွေမှာလို ခေတ်မှီတဲ့စစ်တက္ကသိုလ်ကြီးတွေကို သီးခြားဖွင့်လှစ်လို့ မဖြစ်ပါဘူး။ နိုင်ငံရဲ့ငွေကြေး အရသာ မဟုတ်ပါဘူး၊ တစ်လုံး တစည်းတည်း စုပေါင်းပြီးဖွင့်လှစ်ရတဲ့ အကျိုးအာနိသင်တွေလဲ တော်တော်များများ ရှိပါတယ်၊ နိုင်ငံရဲ့လက်နက်ကိုင် စစ်ဌာနကြီး၃ခုကို တစုတလုံးတည်းပူးပေါင်းပြီး လေ့ကျင့်စေခြင်းဟာ တစ်ဦးနှင့်တဦး ပိုမိုရင်းနှီးစေရုံသာမက သင်ကြားမှုဟာလဲ စနစ်တစ်မျိုးထဲ ဖြစ်တဲ့အတွက်၊ စစ်ပညာအမျိုးမျိုးကို တညီတညွတ်တည်း သင်ယူနိုင်ကြပါတယ်၊ သီးခြားစစ်တက္ကသိုလ်များဖွင့်လှစ်မယ်ဆိုရင်၊ တဘက်နဲ့တဘက် ဆက်သွယ်မှု နည်းပါးသွားရုံ တင်မက၊ သင်ကြားတဲ့နေရာမှာလဲ တညီတညွတ်တည်း ရှိချင်မှရှိမယ်၊ ဒါတွင် မကသေးဘူး၊ တဦးနှင့်တဦး တဖက်နှင့်တဖက် မလိုလားအပ်တဲ့ ပြိုင်ဆိုင်မှုများ ပေါ်ပေါက်လာစရာ အကြောင်းရှိပါတယ်”ဟု ပြောခဲ့သည်။
ဤနေရာတွင် ဦးနုသည် ခေါင်းဆောင်တစ်ဦးအနေနှင့် မဟာအမှားကြီးကို ပြုလုပ်မိခဲ့သည်ဟု မြင်ပါသည်။ ထိုသို့မှားခဲ့ရခြင်းသည် စစ်တပ်ဦးစီးဗိုလ်ချုပ်ကြီးနေဝင်းကို ယုံကြည်အားကိုးလွန်းခြင်းကြောင့် ဖြစ်သလို စစ်တက္ကသိုလ်တွင် နိုင်ငံ၏လက်နက်ကိုင်စစ်ဌာနကြီး ကြည်း၊ ရေ၊ လေ ၃ ခု ကို တစုတလုံး တည်းပူးပေါင်းပြီး လေ့ကျင့်စေခြင်းကြောင့်လည်း ဖြစ်သည်။ ထိုအချက်ကြောင့် မြန်မာ့တပ်မတော်တစ်ခုလုံးကို ကြည်းတပ်က လက်ဝါးကြီးအုပ်ပြီး ထင်တိုင်းချယ်လှယ်ခွင့်ကို ပေးလိုက်တာဖြစ်သွားလိမ့်မည်ဟု ဦးနုကမြင်မထားမိခဲ့ချေ၊ ထို့အပြင် နိုင်ငံ၏ငွေကြေးမတောင့်တင်းမှုကြောင့်လည်း ဤဌာနသုံးခုကို ပေါင်းလုပ်စေခဲ့ခြင်းဖြစ်သည့်အတွက် နိုင်ငံ၏ ကံကြမ္မာပဲဟု အပြစ်ပုံချရမလိုပင် ဖြစ်သည်။ တိုးတက်သည့်နိုင်ငံများ၌ ကြည်း၊ ရေ၊ လေ သီးခြားတက္ကသိုလ်များ ရှိခြင်းကြောင့် ဤတက္ကသိုလ်ကျောင်းဆင်းများတွင် ကိုယ်ပိုင်ရပ်တည်ချက်များ ရှိသည်။ တက္ကသိုလ်အချင်းချင်း ယှဉ်ပြိုင်မှုရှိသည့်အတွက် သူ့ထက်ငါသာအောင် ကြိုးစားကြသည့်အတွက် တိုးတက်လာကြသည်။ သင်ကြားမှု မတူခြင်းသည် ပြဿနာမဟုတ်ပါ။ တိုက်လေယဉ်မောင်းသည့် လေသူရဲနှင့် မြေပြင်တွင် ကုန်းကြောင်း တိုက်နေသည့် စစ်ဗိုလ်နှင့် လေ့ကျင့်သင်ကြားမှုသည် မည်သို့မှ တူညီနိုင်မည်မဟုတ်ပေ။
ဤကဲ့သို့ ကွဲပြားနေမှုသည် လက်နက်ကိုင်အုပ်စုသုံးစုထဲမှ တစ်စုစုက နိုင်ငံတော်ကို သစ္စာဖေါက်ဖျက်ပြီး စစ်အာဏာသိမ်းမည်ဆိုလျှင် ကျန်နှစ်စုက သဘောမတူလျှင် အာဏာသိမ်းခွင့်မရှိစေရန် အင်အားချိန်ခွင်လျှာ ထိန်းထားခြင်းဖြစ်သည်ကို မြင်နိုင်ဖို့ လိုသည်။ မြန်မာနိုင်ငံ၌ ဤကဲ့သို့ ချိန်ခွင်လျှာ မရှိတော့သည့်အတွက် တပ်မတော်စစ်ဦးချုပ်တိုင်းသည် ကြည်းတပ်က ဗိုလ်ချုပ်တွေကသာ လက်ဝါးကြီးအုပ်ထားနိုင်ခဲ့ပြီး ကျန်သည့် လေတပ်နဲ့ ရေတပ်ဗိုလ်ချုပ်များအပေါ် မောက်မာနိုင်ခြင်းသည် မထူဆန်းပါ။ မြန်မာနိုင်ငံ၏တပ်မတော်တွင် တပ်ကို ကိုင်ထားနိုင်သည့် ကြည်း၊ ရေ၊ လေဗိုလ်ချုပ်ကြီးများကို အာဏာတူပေးမထားဘဲ ကြည်းတပ်ကိုသာ အာဏာကုန်ပေးထားသည့်အတွက် မတရားမှုများကို လက်နက်ကိုင်အင်အားစုအတွင်း မည်သို့မျှ တားဆီးရန် အင်အားမရှိခဲ့ခြင်း ဖြစ်သည်။ ထို့ကြောင့် ဦးနုပြောခဲ့သည့် သုံးခုပေါင်းပေးပြီး ညီညွတ်ခိုင်းထားသည့် မူလပေါ်လစီ အမှားကြောင့် တပ်လုပ်သမျှ ပြည်သူတွေဘက်က ရပ်တည်ပေးမည့် လက်နက်ကိုင်တပ်မျိုး ထွက်ပေါ်မလာခြင်း ဖြစ်သည်။
ဆက်လက်၍ ဦးနုက “ပြည်ထောင်စုကြီး၏ အဖျက်သမားများကို လက်သံပြောင်ပြောင်နဲ့ တီးနိုင်တာတခုထဲနဲ့ တပ်မတော်ကို ကျွန်တော်ဒီလောက်မချီးကျူးနိုင်ပါဘူး၊ နို့ပေမဲ့ ဒီထက်ပိုပြီး ချီးကျူးစရာကောင်းတဲ့ အချက်ကြီး ရှိပါသေးတယ်၊ ဒီအချက်ဟာ တခြားမဟုတ်ပါဘူး တပ်မတော်ဟာ ဒီမိုကရေစီအစဉ်အလာကြီးကို ခိုင်ခိုင်ခန့်ခန့် ချမှတ်နေတဲ့အချက်ကြီးပဲ ဖြစ်ပါတယ်။ ဒီမိုကရေစီအစဉ်အလာဆိုတာ သာမညကြည့်ရင် ဒီလောက် အရေးကြီးတယ်လို့ မသိကြဘူး၊ နို့ပေမဲ့ ဒီမိုကရေစီ အစဉ်အလာမရှိတဲ့ နိုင်ငံတွေကိုကြည့်မှ ဒီအစဉ်အလာဟာ ဘယ်လောက်တန်ဘိုးရှိတယ်ဆိုတာ သိနိုင်ပါတယ်။  ဒီမိုကရေစီအစဉ်အလာမရှိတဲ့ နိုင်ငံတွေမှာ စစ်တပ်က အာဏာရှင်ဆန်ဆန်ဖြစ်လာ၊ လူထုက ဝိုင်းမြှောက်ပေး၊ နောက်ပြီး စစ်တပ်က သူပုန်ထ အာဏာသိမ်း၊ အဲတာမျိုးတွေနဲ့ပဲ စခန်းသွားတတ်ကြပါတယ်။ နောက်တဖန် အဲဒီတပ်ထဲမှာပဲ၊ တဖက်က စစ်တပ်အင်အားစုတွေက အားမွေးပြီး သူပုန်ထ၊ အာဏာသိမ်းနဲ့ ဂျာအေးသူ့အမေရိုက်တဲ့ ကိန်းမျိုးကိုတွေ့ရပါတယ်”
“အဲသည်လိုစစ်တပ်ကို မိန်းမရွှင်လို သဘောထားပြီး ကိုယ်လိုချင်သလိုလုပ်နေကြတဲ့အတွက် အဲဒီနိုင်ငံအချို့ဟာ မြေမျက်နှာပြင်လို တည်ငြိမ်ခြင်းမရှိဘဲ ရေမျက်နှာပြင်လို လှုပ်ရှားလျက်ရှိကြပါတယ်။ ကျွန်တော်တို့ တပ်မတော်ကတော့ တဖက်ကသူပုန်တွေကိုတိုက်နေတုံး အခြားတဖက်က Democratic Tradition ခေါ်တဲ့ ဒီမိုကရေစီအစဉ်အလာကြီးကို ခိုင်ခိုင်ခံ့ခံ့ အားသွန်ပြီးတော့ တည်ဆောက်လျက်ရှိပါတယ်။”
ဦးနု၏မိန့်ခွန်းတွင် သူတပ်မတော်ကို မည်မျှယုံကြည်သည်၊ မည်မျှအားကိုးပြီး ဒီမိုကရေစီစနစ်ကြီးကို စောင့်ရှောက် သော တပ်မတော်ကြီးအဖြစ် မြင်ခဲ့သည် မျှော်မှန်းခဲ့သည်တို့ကို သူ၏မိန့်ခွန်းက သူဖြစ်စေချင်သော တပ်မတော်၏ ပုံရိပ်ကိုဖေါ်ပြနေခဲ့သည်။ သို့ရာတွင် သူယုံကြည်ကိုးစားခဲ့သော တပ်မတော်စစ်ဦးစီးချုပ် ဗိုလ်ချုပ်နေဝင်း၏ သစ္စာဖေါက်ဖျက်မှုကြောင့် သူမြင်ထားတဲ့သော အခြားဒီမိုကရေစီ ကင်းမဲ့ဆိတ်သုန်းနေသည့် နိုင်ငံများလို မြန်မာနိုင်ငံသည် ဒီမိုကရေစီနှင့် ဆန့်ကျင်ဖက်စစ်အာဏာရှင်နိုင်ငံဘဝသို့ လျောကျရောက်ရှိ သွားခဲ့ရပေသည်။

စစ်တက္ကသိုလ်၏ရည်မှန်းချက်
ဤအကယ်ဒမီ၏ အလုပ်တာဝန်မှာ “မြန်မာတပ်မတော်ကြီးအတွက် ပညာအရည်အချင်းမြင့်မားသော ဘက်စုံတွင် ထူးချွန်ထက်မြက်ပြီး နိုင်ငံတော်ကြီးကို ဦးဆောင်နိုင်သည့် အနာဂါတ်အရာရှိလောင်းများ ပေါ်ထွက်လာရေး” ပင်ဖြစ်သည်။ ထိုစစ်တက္ကသိုလ်ကြီးသည် ပညာရေးသင်ရိုးညွှန်းတမ်းများနှင့်အတူ စစ်ရေးလေ့ကျင့်ခန်းများကိုတွဲ၍ သင်ကြားပေးပြီး အဓိကရည်ရွယ်ချက်မှာ တစ်ဦးချင်းအနေနှင့် တိုင်းပြည်တစ်ခုလုံးကို အုပ်ချုပ်နိုင်စွမ်းရှိသော အရာရှိများ ဖြစ်လာရေးကို ဦးတည်ထားသည်။
စစ်တက္ကသိုလ်ကျောင်းဆင်းများသည် တိုင်းပြည်တစ်ခုလုံးကို အုပ်ချုပ်နိုင်စွမ်းရှိရမည်ဆိုသည့် အတွေးအခေါ်သည် စစ်အာဏာရှင်လောင်းများကို မွေးဖွားပေးနေခြင်းပင် ဖြစ်သည်။ စစ်တက္ကသိုလ်ကျောင်းဆင်းများသည် နင်ပြီးလျှင် ငါ့အလှည့်ဆိုသည့်မူဖြင့် တိုင်းပြည်ကို လက်ပြောင်းလက်လှဲနှင့် အုပ်ချုပ်ပြီး ပြည်သူများ၏ဆန္ဒသဘောထားများကို ဂရုမစိုက်ကြတော့ဘဲ ကိုယ်ကျိုးအမြတ်ရှာသူများ ဖြစ်လာကြသည်မှာ ဤအတွေးအခေါ်ကြောင့်ပင် ဖြစ်သည်။ အဓိကရည်ရွယ်ချက်သည် “တိုင်းပြည်တွင်းရှိ ပြည်သူများကို ပြည်တွင်းပြည်ပရန်မှ ကာကွယ်ရန်အတွက် တိုက်စွမ်းရည်မြင့်သော စစ်သားကောင်းများ (Professional Soldiers)” မွေးထုတ်ပေးရန် ရည်ရွယ်သည်ဆိုလျှင် တော်ပေသေးသည်။ စစ်တက္ကသိုလ်သည် တိုင်းပြည်အုပ်ချုပ်ရန်မဟုတ် ကာကွယ်ရန်သာ ဖြစ်သည်ဟု သင်ကြားမှုမရှိဘဲ တစ်တိုင်းပြည်လုံးကို အုပ်ချုပ်ရန်ဟု သင်ကြားသည့်အခါ တစ်တိုင်းပြည်လုံးကို အတင်းအဓမ္မ သေနတ်မိုး၍ အုပ်ချုပ်သူများ ဖြစ်လာခဲ့ကြသည်။
မေမြို့စစ်တက္ကသိုလ်တွင် လေးနှစ်တက်ရောက်သင်ကြားပြီးမှ ဘွဲ့လက်မှတ်ရယူရသည့် အစီအစဉ်ရှိသည်။ ထိုသင်ရိုးထဲတွင် ဝိဇ္ဇာဘာသာရပ်များနှင့် သိပ္ပံဘာသာရပ်များ (အထူးပြုသင်ကြားပေးသည့် ဓါတုဗေဒ၊ ရူပဗေဒ၊ သင်္ချာ၊ ဘူမိဗေဒ) ဘာသာရပ်တို့နှင့် ကွန်ပျူတာသိပ္ပံတို့ ပါဝင်သည်။ ဘွဲ့ကြိုသင်တန်းများကို ၄ နှစ် သတ်မှတ်ထားရှိသော်လည်း အပတ်စဉ် ၄၂ မှစတင်၍ ၃ နှစ်သင်တန်းသို့ လျော့ချခဲ့သည်။ DSA တွင် အဓိကအတန်းနှစ်ခုရှိသည်။ ပညာသင်ကြားမှုအကယ်ဒမီကျောင်းနှင့် စစ်ရေးလေ့ကျင့်ရေးကျောင်း တို့ဖြစ်သည်။
ပညာရေး ဌာနများ။
၁။ မြန်မာစာဌာန ၂။ အင်္ဂလိပ်စာဌာန  ၃။ သင်္ချာဌာန ၄။ အသုံးချသင်္ချာဌာန ၅။ ဓါတုဗေဒဌာန ၆။ နူကလီးယား ဓါတုဗေဒဌာန ၇။ ရုပဗေဒဌာန ၈။ နူကလီးယားရုပဗေဒဌာန။ ၉။ အီလက်ထရောနစ်ဌာန ၁၀။ ပထဝီဌာန ၁၁။ သမိုင်း ဌာန ၁၂။ စီးပွါးရေးဌာန ၁၃။ ကွန်ပျူတာသိပ္ပံဌာန  ၁၄။ ကွန်ပျူတာနည်းပညာဌာန ၁၅။ သုတေသနဌာန စုစုပေါင်းဌာန ၁၅ ခုဖြင့် သင်ကြားပေးလျက်ရှိသည်။

စစ်ပညာသင်ကြားရေး
သင်တန်းသားဗိုလ်လောင်းကဒက်များသည် အခြားတက္ကသိုလ်များနည်းတူ ဝိဇ္ဇာနှင့် သိပ္ပံဘာသာရပ်များအပြင်၊ စစ်ရေးသင်တန်းကို မဖြစ်မနေယူရသည်။ မေမြို့စစ်အကယ်ဒမီသည် ဗြိတိသျှစနစ်နှင့် အမေရိကန်စနစ် နှစ်ခုကို အခြေခံတည်ဆောက်ထားခြင်းဖြစ်သည်။ (ဆင်းဟတ်စ်စစ်တက္ကသိုလ်နှင့် ဝက်စ်ပွိုင့် တည်ဆောက်ပုံကို ယူထားသည်)။ ထိုတက္ကသိုလ်နှစ်ခု၏ စစ်ရေးလေ့ကျင့်ပုံများနှင့် မိမိပြည်တွင်းရှိစနစ်များကို ပူးတွဲလေ့ကျင့် သင်ကြားပေးသည်။

ကျောင်းတွင်ရှိပိုင်ဆိုင်မှုများ
မြန်မာနိုင်ငံတွင်ရှိသည့် နက္ခတ်တာရာများကို လေ့လာသော ပြတိုက်နှစ်ခုထဲမှ တစ်ခုသည် မေမြို့စစ်တက္ကသိုလ် တွင်ရှိသည်။
စာကြည့်တိုက်၊ ကွန်ပျူတာလက်တွေ့စမ်းသပ်ခန်း၊ ဆော့ဖဝဲလ်အင်ဂျင်နီယာနှင့် ကွန်ပျူတာ စနစ်များ လေ့လာရေးခန်း။ ကွန်ပျူတာ အစိတ်အပိုင်းများ လေ့လာခြင်းဓါတ်ခွဲခန်း၊ ကွန်ပျူတာ ထောက်ပံ့မှုဖြင့် နိုင်ငံခြားဘာသာများကို လေ့လာခြင်း ကရိယာများထားသည့် ဓါတ်ခွဲခန်း၊ အဏုကြည့် မှန်ပြောင်း ကရိယာများရှိသည့် ဓါတ်ခွဲခန်း၊ ဓါတုဗေဒနှင့် ဘူမိဗေဒဘာသာရပ်များ သင်ကြားသည့် ဓါတ်ခွဲခန်းများ၊ ရူပဗေဒဓါတ်ကြွခြင်းဆိုင်ရာသုတေသနပြုသည့်ဓါတ်ခွဲခန်း၊ သန့်ရှင်းစွာထားသော အီလက်ထရောနစ် ဓါတ်ခွဲခန်း၊ အိုလံပစ် အရွယ်အစားရှိ ရေကူးကန်ကြီး၊ အခြားအားကစားကွင်းများနှင့် ဘောလုံးကွင်း၊ တင်းနစ်ကွင်းများ၊ ဂျွမ်းဘားအားကစားရုံတို့ ရှိသည်။
ထိုမေမြို့စစ်တက္ကသိုလ်တွင်ရှိသည့် ကျောင်းအသုံးအဆောင် ဓါတ်ခွဲခန်းများ၊ စာသင်ကြားရာတွင် သင်ကြားမှု အထောက်အကူ ပစ္စည်းများမှာ ရန်ကုန်တက္ကသိုလ်ကြီးနှင့် ဆီနှင့်ရေပမာ ကွာခြားလှပေသည်။ အရပ်သား တက္ကသိုလ်များတွင် မရှိသည့် ခေတ်မှီ သင်ကြားမှုအထောက်အကူပစ္စည်းများကို မေမြို့စစ်တက္ကသိုလ်တွင် တွေ့မြင်နိုင်သည်။ ဒေါ်အောင်ဆန်းစုကြည်အပါအဝင် လွှတ်တော်ကိုယ်စားလှယ်ကြီးများ မေမြို့စစ်တက္ကသိုလ် သို့ လေ့လာရေးခရီးသွားသင့်သလို အုပ်စုလိုက် ရန်ကုန်ဝိဇ္ဇာနှင့်သိပ္ပံတက္ကသိုလ်ကြီးသို့ သွားရောက်လေ့လာပြီး ထိုတက္ကသိုလ်နှစ်ခု၏ ကွာခြားချက်များကို နှိုင်းယှဉ်ပြီး မိမိတို့အမြင်များကို တိုင်းပြည်သို့ တင်ပြသင့်သည်။ ပြည်သူရွေးချယ်ထားသော လွှတ်တော်ကိုယ်စားလှယ်များကို စစ်တက္ကသိုလ် ကျောင်းအုပ်ကြီးမှ တားဆီးမည်ဟု မထင်ပါ။ ထိုသို့ အရပ်သားပညာရေးနှင့် စစ်ပညာရေးကို မျက်ဝါးထင်ထင်မြင်သည့်အခါမှ အမြင်ကျဉ်းမြောင်းစွာ အရပ်သား ပညာရေးကို နှိမ့်ချထားပြီး စစ်ကျောင်းဆင်းများကိုသာ စောင်းပေးထားသော ပညာရေးစနစ်ဆိုးကို အချိန်မှီ ပြုပြင်နိုင်မည်ဖြစ်သည်။
မြန်မာနိုင်ငံတွင်စစ်အာဏာရှင်စနစ်ပေါ်ပေါက်လာခြင်း၏အကြောင်းရင်းများကိုလေ့လာသုံးသပ်ရလျှင်-
၁။ လွတ်လပ်ရေးရခါစ နိုင်ငံငယ်တခုအနေနှင့် ပြည်တွင်းစစ်ကြီးကို တာထွက်ချိန်မှစ၍ ဖြေရှင်းနေရသဖြင့် စစ်တပ်ကိုအားကိုးရင်း စစ်တပ်သည်ကျေးဇူးရှင်ကြီးများဘဝမှ သခင်ကြီးများစစ်ဘုရင်များအသွင်ပြောင်းလဲလာပြီး ပြည်သူတို့က ယုံကြည်၍ အပ်နှံထားသောလက်နက်ကိုင်တပ်ဖွဲ့ကိုအသုံးပြု၍ ဂုတ်သွေးစုပ်သူများဖြစ်လာခဲ့ခြင်း။
၂။ စစ်တက္ကသိုလ်မိန့်ခွန်းတွင် ဦးနုကပြည်တွင်းစစ်ကို ဦးဆောင်တိုက်နေသော ဗိုလ်ချုပ်နေဝင်းနှင့် တပ်မတော်ကိုချီး ကြူးဂုဏ်ပြုခဲ့ခြင်းနှင့် တပ်မတော်သည် ဒီမိုကရေစီကျင့်စဉ်များကို ကျင့်သုံးနေကြောင်း ပြောကြားခဲ့သော်လည်း ဗိုလ်ချုပ်နေဝင်းမှ ယုံကြည်မှုကိုဖေါက်ဖျက်၍ တည်ဆဲအခြေခံဥပဒေကို သစ္စာဖေါက်ဖျက်ပြီး စစ်အာဏာသ်ိမ်းခါ ပြည်သူတင်မြောက်ထားသော အစိုးရကိုဖြုတ်ချခဲ့သည်။  ထို့အတူထိုစဉ်က ပထမပတ် ဗိုလ်လောင်း အဖြစ် တက်ရောက်ခဲ့သော ဗိုလ်လောင်းလေးမောင်အေးသည်လည်း ဒီမိုကရေစီအခြေခံကို သိသော်လည်း ဗိုလ်ချုပ်မှူးကြီး မောင်အေးအဖြစ် စစ်အာဏာရှင် ခေါင်းဆောင်တဦးဖြစ်လာခဲ့သည်။ ထိုကဲ့သို့ဖြစ်ရခြင်းမှာစစ်တပ်တွင်း ကြည်း၊ရေ၊လေအပြန်အလှန်အာဏာထိန်းကျောင်းမှုမရှိခြင်းနှင့် လက်နက်ကိုင်ထားလျှင် ထင်သလိုလုပ်နိုင်သည်ဟု လက်ဦးဆရာကြီးများက နမူနာပြခဲ့ကြ၍ဖြစ်သည်။ တိုင်းပြည်တခုတွင် တရားစီရင်ရေးမဏ္ဍိုင်၊ ဥပဒေပြုရေးမဏ္ဍိုင်၊ အုပ်ချုပ်ရေးမဏ္ဍိုင်တို့သည် သီးခြားလွတ်လပ်သော အဆောက်အအုံများအဖြစ် တည်ရှိနေခဲ့လျှင် အစိုးရအုပ်ချုပ်ရေးမဏ္ဍိုင် မှထင်သလိုချယ်လှယ်ခွင့်မရှိဘဲ အာဏာရှင်လမ်းကြောင်းသို့မရောက်ရန်ထိမ်းညှိနိုင်သည်။ မြန်မာနိုင်ငံတွင်တရားစီရင်ရေးသည်အစိုးရလက်အောက်တွင်ပေါ်ပေါ်ထင်ထင်ရှိနေသည်။ လွှတ်တော်သည်လည်း အာဏာရပါတီ၏ လက်ထဲတွင်ရှိသည်။ ထိုဌာနနှစ်ခုသည် သီးခြားလွတ်လပ် မနေခဲ့သော ကြောင့်ဖြစ်သည်။
၃။ စစ်တက္ကသိုလ်သည်လည်း ကြည်း၊ရေ၊လေ ဟူ၍ သီးခြားခွဲခြားထားခြင်းမရှိဘဲ တပေါင်းတည်း ပြုလုပ်ထားသဖြင့် သုံးပွင်ဆိုင်ထိန်းထားခြင်းမရှိဘဲ  ကြည်းတပ်ကသာ အရာရာကို ထိန်းချုပ်ထားသည့် အတွက်ကြောင့် စစ်အာဏာရှင် စနစ်သက်ဇိုးရှည်နေခြင်းဖြစ်သည်။
နိဂုံးအားဖြင့်  နိုင်ငံရေးလုပ်ချင်သော စစ်ခေါင်းဆောင်များ  စစ်တပ်မှထွက်ပြီး လုပ်ကြပါ။ သာဓကအားဖြင့် ဦးရွှေမန်း၊ ဦးသိန်းစိန်တို့သည် လူဝတ်ချွတ်ပြီး နိုင်ငံရေးလောကသို့ ဝင်နေပြီ ဖြစ်သည်။ သို့ရာတွင် အာဏာရရန် ကျိန်းသေးပြီးမှ ထွက်၍ နေရာယူခဲ့ကြခြင်းသည် ရိုးသားစွာရယူခြင်းတော့ မဟုတ်ချေ။ ထိုကဲ့သို့ တပ်ကို ကျောထောက်နောက်ခံထားပြီး အာဏာရယူခြင်းမျိုးမဟုတ်ဘဲ မိမိအရည်အချင်းနှင့် တပ်မှထွက်ပြီး နိုင်ငံရေးကို ဝင်လုပ်ကြစေချင်သည်။
ထို့အတူ  စီးပွားရေး လုပ်ချင်သလား။ တပ်မှပြတ်ပြတ်သားသားထွက်ပြီး လုပ်ကြပါ။ တစ်ဖက်တွင်တပ်ကို ကိုင်ထားပြီး တစ်ဖက်တွင် နိုင်ငံရေးလုပ်၍ နေရာယူခြင်း၊ စီးပွားရေးလုပ်ပြီး  ဥစ္စာဓန စုစည်းခြင်းသည် လက်နက်အားကိုး ဗိုလ်ကျသည့် လုပ်ရပ်သာ ဖြစ်သည်။ ထို့ကြောင့် သတ္တိရှိကြပါ၊ ရိုးသားကြပါ။ ပြည်သူ့ဆန္ဒကို လေးစားပါက ပြည်သူတို့က လိုလိုလားလား ရွေးချယ်ပါလိမ့်မည်ဟု ဆိုချင်သည်။

ထွန်းအောင်ကျော် (၇၄ မျိုးဆက်)

No comments:

Post a Comment

Related Posts Plugin for WordPress, Blogger...