Tuesday, May 27, 2014

နှလုံးသားဒိုင်ယာရီ (၂၄)

May 25, 2014 at 4:53pm


၂၀-၅-၂၀၀၃
နေခြည်လှုပ်နှိုးမှုကြောင့် အိပ်ယာထက်မှလူးလဲထလိုက်မိသည့်ကျနော် ညကကောင်းစွာအိပ်မရ။ အတွေးများနှင့်နပမ်းလုံးရင်း ညဥ့်အတော်နက်ခဲ့ရသည်။ ယခုလည်း မဟာမိတ်တပ်မတော်တွင် ဖမ်းဆီးချုပ်နှောင်ထားသော အကျဉ်းသားတစ်ဦးအား သွားရောက်စစ်ဆေးပေးရအုံးမည်။ အကျဉ်းသားကား မည်သူမည်ဝါရယ်မသိရသေးပေ။
မဟာမိတ် တပ်မတော်ဌာနချုပ်နှင့် ကျနော်တို့တပ်မှာ အတော်လေးအလှမ်းဝေးသည်ဟုဆိုရမည်။ စစ်သားခြေ ထောက် ပြင်းပြင်းနှင့်ပင် မိနစ်လေးဆယ်ခန့်ခရီးနှင်ရသည်။

တပ်စခန်းနှစ်ခုအကြားတွင်တော့ မြို့နယ် တပ်တစ်ခုနှင့် လက်နက်ကြီးတပ်ခွဲတစ်ခုကို ဖြတ်သန်းသွားရသည်။ အကျဉ်းသားစစ်ဆေးရန်အတွက် ရဲဘော်(၄)ဦးကို ရွေးချယ်လိုက်သည်။ ထိုရဲဘော်များမှာ လျင် မြန်ဖြတ်လတ်ပြီး အတွေ့အကြုံရှိပြီးသူများလည်းဖြစ်သည်။ လိုအပ်သည့်စာရွက်စာတမ်းအချို့ကို ယူ ဆောင်ပြီးသည်နှင့် လက်နက်အပြည့်အစုံဖြင့် ရဲဘော်(၄)ဦးမှာလည်း ကျနော်ဦးဆောင်၍ အကျဉ်းသား ချုပ်နှောင်ထားရာ မဟာမိတ်တပ်မတော်ဌာနချုပ်အောက်ရှိ အကျဉ်းထောင်သို့ဦးတည်ချီတက်ခဲ့ကြ သည်။

ထိုသို့ချီတက်လာကြစဉ် တောင်ကြောလေးတစ်ခုအရောက် နှာခေါင်းဝသို့ စူးရှပြင်းထန်သော အပုပ်နံ့တို့က ဆီးကြိုနှုတ်ဆက်ခြင်းခံလိုက်ရသည်။ ညာဖက်လျှိုထဲသို့လှမ်းကြည့်လိုက်ရာ ယင်စိမ်း အုပ်ကြီးများ ကူးလူးပျံသန်းနေကြသည်။ ရှေ့မလှမ်းမကမ်းတွင်လည်း ခါချဉ်တပ်မကြီးချီတက်နေသည် မှာ အတွဲလိုက်။ ထိုခါချဉ်တပ်မကြီးမည်သည့်အရပ်ဒေသသို့ဦးတည်ချီတက်နေကြောင်း ကျနော် ကောင်းစွာ သိနေခဲ့သည်။

တပ်စခန်းတွင်ဟင်းစားရရန်အတွက် တောပစ်ထွက်လေ့ရှိသလို တစ်ခါတစ်ရံ ခါချဉ်သိုက်များကို လည်း သွားရောက်ဖေါက်ယူပြီး ဥနှင့်အကောင်ပေါက်ကလေးများကိုသုပ်၍တစ်မျိုး၊ကြော်၍တစ်ဖုံ စား သောက်တတ်ကြသည်။ ထိုခါချဉ်အသိုက်များအတွင်းမှ လူ့သွားနှင့်ဆံပင်များမကြာခဏတွေ့ရ တတ်သည်။ ယခုဦးတည်ချီတက်နေသော ခါချဉ်များမှာလည်း သူတို့အတွက် ရိက္ခာအပြည့် အ၀ရရှိမည့် လူသေကောင်များရှိရာသို့ ညီညီညာညာ ချီတက်နေကြခြင်းပင်ဖြစ်သည်။ လူသေ အလောင်းများမှာ ခါချဉ်ဒဏ်ကြောင့် ငါးများကိုငါးဆားနယ်သိပ်ရန်အတွက် မွှန်းထားသကဲ့သို့ အစင်းကြောင်းများကြား အတွဲ လိုက်ဝင်ရောက်မွှေနှောက်စားသောက်ခြင်း ခံနေကြရပေတော့သည်။ ခါချဉ်တပ်မကြီးက လူသေအလောင်းများကို အနီရောင်လွှမ်းခြုံထားလိုက်တော့သည်။ ညဦးပိုင်း ရောက်လျှင် လူသေကောင်နှင့်မနီးမဝေး၌ သားကောင်လာစောင့်ပစ်လျှင် မုချရမည်မှာသေချာသည်။ အဘယ်ကြောင့်ဆိုသော် ကြွင်းကျန်သော အရိုးများကို ဖြူများကလာရောက်စားသုံးတတ်သလို ပုပ်ပွနေသော ၀မ်းတွင်းကလီစာများကိုတော့ ၀က်ဝံများက စားသောက်လေ့ရှိသောကြောင့်ဖြစ်သည်။

ထိုသို့သေဆုံးနေသောသူများမှာ အပြစ်သားများရှိနိုင်သလို အပြစ်မဲ့သူများလည်းစတေးခံလိုက် ရသည်ကို မည်သူငြင်းဆိုနိုင်မည်နည်း။ ကျနော်တို့ဆက်လက်ထွက်ခွာလာရာ အကျဉ်းထောင်အနီး တောင်စောင်းကလေးသို့ပင်ရောက်ရှိလာခဲ့သည်။ ပျဉ်းကတိုးအပင်တွင် ချိတ်ဆွဲထားသောစာတမ်း လေးကိုလှမ်း၍ တွေ့မြင်လိုက်ရသည်။ “ အကျဉ်းထောင်သို့ တာဝန်မှအပ ဖြတ်သန်းသွားလာခွင့်မပြု” ဟူ၍ ဖြစ်သည်။ တောင်ကြောလေးအောက်သို့ တရွေ့ရွေ့ဆင်းသွားခဲ့ကြသည်။ မလှမ်းမကမ်းတွင် တာဝန်ကျနေသော ရဲဘော်မှ “ ဆရာတို့ပါလား၊ စစ်ဆေးရေးအဖွဲ့က မဟုတ်လား၊ ဒီလမ်းအတိုင်း ညာဖက်လှမ်းလိုက်တာနဲ့ အကျဉ်းထောင်ကိုရောက်ပြီ” ဟု ညွှန်လိုက်သည်။ “ အေးကွ၊ သွားလိုက်အုံး မယ်” ဟုပြန်လည်နှုတ်ဆက်ရင်း အကျဉ်းထောင်ရှိရာသို့ ဆင်းလာခဲ့တော့သည်။ အချုပ်ထောင်ကား ကြီးကြီးမားမားမဟုတ်၊ ၁၅ပေ၊၇ ပေ၊အခန်းကျဉ်းလေးဖြစ်သည်။ သစ်တိုင် များနှင့်အခိုင်အမာတည်ဆောက်ထားသောကြောင့် ထွက်ပြေးရန်မလွယ်ကူသလို အစောင့်များက လည်း မျက်ခြေမပြတ်ကြည့်ရှုနေတတ်သည်။ ထိုအခန်းလေးထဲတွင် အကျဉ်းသားဟူ၍ တစ်ဦးတည်း သာ ရှိနေသည်။

အကျဉ်းသား၏ အရပ်အမောင်းမှာ ၅ပေ၊၇လက္မခန့်ရှိပြီး အသားဖြူဖြူ၊မျက်နှာသွယ်သွယ် ကျစ်လျစ် ခိုင်မာသော ခန္ဓာကိုယ်ပိုင်ရှင်တစ်ယောက်ဖြစ်လေသည်။ ခန္ဓာကိုယ်ချက်အောက်ပိုင်းတွင်တော့ ဆင် များထူးခတ်ရာတွင်အသုံးပြုသော သံကြိုးကြီးဖြင့် ခါးကိုစည်းနှောင်၍ အာမခံသော့ကြီးဖြင့် ထပ်မံခတ် ထားသည်ကို တွေ့လိုက်ရသည်။ တစ်နေရာမှတစ်နေရာသို့ ပြောင်းရွှေ့ထသွားရန်မလွယ်ကူနိုင်။ အပေါ့အလေးသွားလိုလျှင် အစောင့်ရဲဘော်နှစ်ဦးမှာ ထိုသံကြိုးကြီးကို မ၍ အပြင်သို့ သယ်ထုတ်ပေးရ သည်။ အိပ်လျှင်မည်မျှဒုက္ခရောက်မည်ကို မတွေးတတ်ပေ။ သို့သော်ထိုသူမှာ စည်းစနစ်ရှိကြောင်း မြင်ယုံနှင့်သိခွင့်ရလိုက်သည်။ အိပ်ယာများကို စနစ်တကျ ခေါက်သိမ်းထားတတ်သလို တံတွေးများကို လည်း ပစ္စလက္ခတ်မထွေး၊ ၀ါးဘူးလေးအတွင်းသို့ စနစ်တကျထွေးထည့်ပြီးမှ သွန်ပစ်လေ့ရှိသည်။ ကျနော် ရောက်ရှိချိန်တွင် ဘုရားဝတ်ပြုနေသောကြောင့် အနှောင့်အယှက်မပေးပဲ ထိုင်စောင့်ရင်းလေ့ လာကြည့်မိနေခြင်းဖြစ်သည်။

ဘုရားရှိခိုးအမျှအတန်းဝေပြီးသည်နှင့် ကျနော်သူ့အားမေးမြန်းရန်ရှိကြောင်း အသိပေးလိုက်ရ သည်။ အခန်းကျဉ်းလေးထဲသို့ ၀င်သွားပြီးနောက် ကျနော့ကိုကျနော် စတင်မိတ်ဆက်ပေးလိုက်သည်။ “ ကျနော့်နာမည်က --------- ပါ၊ ခင်ဗျားကိုလာရောက်စစ်ဆေးဖို့တာဝန်ပေးချက်အရ လာစစ်ရတာပါ၊ ခင်ဗျားအနေနဲ့ အမှန်ကိုအမှန်အတိုင်း ၀န်ခံဖို့လိုအပ်သလို လိမ်ညာလှည့်ဖြားနေမယ်ဆိုရင်တော့ ခင်ဗျားပဲဒုက္ခရောက်လိမ့်မယ်ဆိုတာ နားလည်ထားစေချင်တယ်” ဟုဆိုလိုက်ရသည်။ “ ဟုတ်ကဲ့၊ မေး ချင်တာကို မေးပါ၊ အကောင်းဆုံးနဲ့ အမှန်ဆုံးဖြစ်အောင် ကျနော်ဖြေပါ့မယ် ” ဟု ဖြေဆိုရင်း ကျနော့် မျက်နှာကို တစိုက်မတ်မတ်စိုက်ကြည့်နေတော့သည်။

နာမည် အသက် (၂၉)နှစ် မိဘအမည် နေရပ်လိပ်စာ ရန်ကင်း အိမ်ယာ၊ ရန်ကုန်မြို့ ပညာအရည်အချင်း ၀ိဇ္ဇာဘွဲ့( စိတ်ပညာ )….
“ ဘာကြောင့် အခုလိုအဖမ်းခံရတာလဲ၊ မသင်္ကာမှုနဲ့အဖမ်းခံရတာပါ။”
“ လက်ရှိဘာအလုပ် လုပ်လဲ”
 “ ကျောက်အရောင်းအ၀ယ်ပါ”
 “ နယ်စပ်ကိုဘာ့ကြောင့်ရောက်လာရတာလဲ”
“ ကျနော့ ကျောက်တွေလိမ်သွားတဲ့လူကို ရှာရင်းရောက်လာတာပါ”
 “ အခြားအကြောင်းအရာတွေ ရှိသေးလား”
 “ ဘာမှမရှိပါဘူး၊ အခုဖြေဆိုချက်တွေက မှန်တွေပါဘဲ”
 “ ကောင်းပြီ၊ ခင်ဗျားစိတ်အေးအေးထားပြီး ဆက်ဖြေကြည့်ပါအုံး၊လွဲနေတယ်လို့ကျနော်ထင် တယ်၊ ကျနော်တို့ရထားတဲ့ သတင်းအရဆိုရင် ခင်ဗျားဖြေဆိုချက်တွေဟာ အတော့်ကိုကွာခြားနေ တယ်” ဟု ကျနော်ဆိုလိုက်ရာ “ အော်၊ ကျနော်မေ့သွားလို့.. အရင်ကတော့ ဦးနေ၀င်း ရဲ့မြေးတွေဖြစ် တဲ့ အေးနေ၀င်း၊ဇွဲနေ၀င်း တို့ ဦးဆောင်တဲ့ scorpion အဖွဲ့မှာတော့ ပါခဲ့ဖူးပါတယ်။ အခု သူတို့ကို နိုင်ငံတော် ပုံကန်မှုနဲ့ဖမ်းလိုက်တော့ ကျနော်တို့လည်းလွတ်ရာလွတ်ကြောင်းအဖြစ် နယ်စပ်ကိုထွက် ပြေးခိုလှုံလာတာပါ။ တခြား ဘာအမှုမှတော့ မရှိပါဘူးဗျာ” ဟု ဆိုလာပြန်သည်။
“ အေးလေ ခင်ဗျားက ဘာမှမဟုတ်ဘူးလို့ဆိုပေမယ့် သတင်းပေးတဲ့သူတွေက အတိကျဆုံးသတင်းပေးပြီးကြပြီ။ ဘာကြောင့် ရောက်လာတယ်၊ ရည်ရွယ်ချက်ကဘာ၊ လက်ရှိဘယ်မှာနေတယ်၊ မဲ့ဟောင်ဆောင်ကို ဘယ်တုန်းက စရောက်တယ် ကအစ အကုန်သိထားတယ်၊ ခင်ဗျားမဖြေချင်ရင်လည်း မဖြေလို့ရပါတယ်၊နောက် ဆက်တွဲဖြစ်လာမယ့်အကျိုးဆက်ကို ဘယ်သူကမှတာဝန်ယူနိုင်မှာမဟုတ်ဘူး” ဟု ကျနော်ဆိုလိုက် သည်နှင့်တပြိုင်နက် ရဲဘော်လေးများမှာတဖြောင်းဖြောင်းနှင့်သေနတ်များကျည်ထိုး၍ အခန်းတွင်းသို့ ၀င်လာကြတော့သည်။ ကြမ်းကြ ရမ်းကြတော့မည့်ပုံရိပ်ကိုတွေ့လိုက်သည်နှင့် ထိုသူမှာ အတော်လေး တုန်လှုပ်ခြောက်ခြားသွားပုံရသည်။

“ ကဲ..ကဲ၊ အားလုံးငြိမ်ငြိမ်နေကြ၊ ဒီကိစ္စကိုငါဆက်ရှင်းမယ်၊ဒီတော့ခင်ဗျားလည်း ဒီနေ့နား လိုက်ပါ၊ သေချာစဉ်းစားပြီး နောက်နေ့အမှန်အတိုင်းထွက်ဆိုပေးပါ၊ခင်ဗျားစဉ်းစားထားရမှာက ဥပဒေ ဆိုတာနေရာတကာမှာမရှိဘူးဆိုတဲ့အချက်ပဲ” ဟုဆိုလိုက်သည်နှင့် သူလည်း ခေါင်းစိုက်ကျသွားတော့ သည်။ တာဝန်အရမေးမြန်းစစ်ဆေးနေရသော်လည်း စိတ်မသက်မသာရှိလှကြောင်း ကျနော်မှတစ်ပါး မည်သူကသိရှိနိုင်မည်နည်း။

ဆက်ပါအုံးမည်။


အုပ်ကြီးဖေ
၂၅-၅-၂၀၁၄။

No comments:

Post a Comment

Related Posts Plugin for WordPress, Blogger...