Sunday, March 9, 2014

ဒီမိုကရေစီအတွက် နိုင်ငံရေးပါတီကောင်း တည်ရှိရေး

March 6, 2014 at 8:46pm


 ဇန်န၀ါရီလထုတ် ဒီမိုကရေစီဂျာနယ် (JOD) မှာ အသွင်ကူးပြောင်းရေး ပါရာဒိုင်းနဲ့ ပတ်သက်ပြီး ကမ္ဘာ့ထိပ်တန်း နိုင်ငံရေးသိပံပညာရှင်တွေ ၀ိုင်းဆွေးနွေးထားပါတယ်။ အဲဒီမှာ ဖရန်စစ် ဖူကူယားမားက “ကျွန်တော်တို့ဟာ အရပ်ဘက်လူ့အဖွဲ့အစည်းကိုပဲ အာရုံစိုက်လွန်းပြီး၊ နိုင်ငံရေးပါတီတွေအပေါ်မှာ သိပ်အလေးအနက်မထားကြဘူး၊
ဒီမိုကရေစီလိုလားတဲ့ အတိုက်အခံအုပ်စုတွေကို စနစ်တကျအုပ်ချုပ်မှုနည်းလမ်းတွေ တတ်ကျွမ်းလာအောင် ကျွန်တော်တို့ များများ မကူညီနိုင်သေးဘူး” လို့ ပြောထားပါတယ်။
နောက် ဖူကူယားမားက ဒီမိုကရေစီကို ရချင်ရင်၊ မဖြစ်မနေ ဖြတ်သန်းရမယ့် အဆင့် သုံးဆင့် ရှိတယ်လို့ ဆိုပါတယ်။ “ပထမ၊ အာဏာရှင်အစိုးရဟောင်းကို ဖယ်ရှားပစ်ဖို့ ကနဦး လူထုလှုပ်ရှားမှုတွေ (initial mobilization) လိုပါတယ်။ ဒုတိယ၊ လွတ်လပ်မျှတတဲ့ ရွေးကောက်ပွဲ ကျင်းပနိုင်ပြီး၊ အဲဒီကနေ နိုင်ငံရေးပါတီ ဘယ်လို စည်းရုံးတည်ထောင်မလဲ ဆိုတာ သင်ယူရမယ်။ ရွေးကောက်ပွဲလှုပ်ရှားဆောင်ရွက်မှုတွေကို လုပ်နိုင်တာဟာ နိုင်ငံရေးပါတီတွေပဲ ဖြစ်တယ်။ ဒါကြောင့် နိုင်ငံရေးပါတီတွေ တည်ရှိနေရတာဖြစ်ပြီး၊ အဲဒီလုပ်ငန်းဆောင်တာကို အရပ်ဘက်လူ့အဖွဲ့အစည်းတွေက အစားထိုး မယူနိုင်ဘူး။

တတိယ၊ ရွေးကောက်ပွဲကို ဖြတ်ပြီးနောက် ဒီမိုကရေစီနည်းကျ ရွေးချယ်ခံ အစိုးရသစ်ဖြစ်ပြီ ဆိုရင်၊ ပြည်သူ့ဝန်ဆောင်မှုလုပ်ငန်းတွေ (public services and public goods) လုပ်ပေးနိုင်စွမ်းရှိရမယ်။ အဲဒါဟာ ပြည်သူတွေ ဒီမိုကရေစီစနစ်ကနေ မျှော်လင့်ထားတဲ့ အရာတွေ။ သို့သော် ဒီမိုကရေစီအရေး လှုပ်ရှားကြသူတွေဟာ ပထမအဆင့်ကို စွမ်းနိုင်ပေမဲ့၊ ဒုတိယနဲ့ တတိယအဆင့်ရောက်ရင် ရှုတ်ထွေးအူလည်သွားကြတယ်” လို့ သူက ပြောပါတယ်။

ပါမောက္ခ ဆင်မျူရယ် ဟန်တင်တန် ကလည်း “ကျောင်းသားတွေနဲ့ လူငယ်တွေဟာ အဖွဲ့အစည်းဆိုင်ရာ လုပ်ငန်း တာဝန်တွေကို စိုးရွံ့ကြတယ်။ သူတို့ဟာ ဆန္ဒပြပွဲတွေ၊ လမ်းပေါ်လှုပ်ရှားမှုတွေကို စုစည်းလှုပ်ရှားနိုင်ပေမဲ့၊ နိုင်ငံရေး ပါတီတစ်ခု ဖွဲ့စည်းတည်ထောင်ဖို့ ထိတ်လန့်နေတတ်တယ်”လို့ ပြောခဲ့ဖူးပါတယ်။

ပညာရှင်နှစ်ဦးရဲ့ စကားတွေမှာ ဒီမိုကရေစီဖြစ်ထွန်းဖို့ဆိုရင် နိုင်ငံရေးပါတီတွေက အရပ်ဘက်အဖွဲ့အစည်းတွေထက် ပိုအခရာကျလို့ နိုင်ငံရေးပါတီ တည်ဆောက်ရေးကို ပိုအာရုံထားသင့်တယ်၊ ကျောင်းသား နိုင်ငံရေးသမားတွေနဲ့ ဆန္ဒပြသမားတွေဟာ ခေတ်မီ နိုင်ငံရေးပါတီတစ်ခု တည်ထောင်ဖို့ တွေဝေတာဟာ ဒီမိုကရေစီအသွင်ကူးပြောင်းဖို့ ကြိုးစားတဲ့ နိုင်ငံတိုင်းမှာ တွေ့ကြုံနေရတဲ့ ပြဿနာဖြစ်တယ်လို့ ပြောထားပါတယ်။

မြန်မာနိုင်ငံမှာလည်း ဒီမိုကရေစီနိုင်ငံရေးပါတီတည်ကောင်းတွေ ပေါ်ထွက်လာဖို့ အခက်အခဲရှိနေတာ တွေ့ကြရမှာ ဖြစ်ပါတယ်။ လွတ်လပ်ရေးအကြိုပါတီတွေကစပြီး အကွဲအပြဲတွေ၊ ချေမှုန်းခံရမှုတွေ၊ ပါတီကြံခိုင်မှု အားနည်းမှုတွေ၊ သက်တမ်းမရှည်မှုတွေကို ယနေ့ထိ ရင်ဆိုင်နေရဆဲပါ။

တကယ်တော့ ဒီမိုကရေစီရဲ့ အဓိကမောင်းနှင်အားဟာ နိုင်ငံရေးပါတီတွေ ဖြစ်တယ်။ ဒီမိုကရေစီကို ချစ်ရင် နိုင်ငံရေးပါတီကို တန်ဖိုးထား တည်ဆောက်ရပါမယ်။ ပါတီမဲ့ ဒီမိုကရေစီ (partyless democracy) ဆိုတာ မျက်မှောက်ခေတ်မှာ မဖြစ်နိုင်တဲ့ အခြေအနေပါ။ ပါတီမရှိ နိုင်ငံဟာ ပဒေသရာဇ်နဲ့ အာဏရှင်စနစ်လွှမ်းမိုးခံရမြဲပါ။ အပြိုင်အဆိုင် ပါတီတွေမရှိတဲ့ နိုင်ငံဟာ လူ့အဖွဲ့အစည်းအတွင်း အင်စတီကျူးရှင်းဆိုင်ရာ နည်းလမ်းတွေကတဆင့် အပြောင်းအလဲ မလုပ်ယူနိုင်တဲ့ နိုင်ငံဖြစ်တယ်။ ဒါကြောင့် ဒီမိုကရေစီ တော်လှန်ရေးသမားတိုင်းဟာ နိုင်ငံရေးပါတီ တည်ဆောက်ရေးကို အမြဲအာရုံစိုက်ဖို့ လိုအပ်ပါတယ်။

အနာဂတ် မြန်မာ့နိုင်ငံရေးပါတီတွေဟာ အိန္ဒိယက ကွန်ဂရက်ပါတီ၊ ဗြိတိန်က လစ်ဘာပါတီနဲ့ ကွန်ဆာဗေးတစ်ပါတီ၊ အမေရိကန် ဒီမိုကရက်နဲ့ ရီပတ်ဗလစ်ကန်တို့လို့ ဆယ်စု ရာစုတိုင်အောင် တည်ဆောက်ထားနိုင်တဲ့ ပါတီတွေ ဖြစ်ဖို့ လိုပါတယ်။ မျိုးဆက်ချီတည်တံ့တဲ့ ပါတီတွေရှိပါမှ နိုင်ငံမှာ ဒီမိုကရေစီ ခြေကုပ်မြဲပါလိမ့်မယ်။ ဒီမိုကရေစီ လိုလားသူ တော်လှန်ရေးသမားတိုင်း၊ ကျောင်းသားနိုင်ငံရေးသမားတိုင်းက ဒီမိုကရက်တစ်ပါတီတည်ဆောက်ရေး လုပ်ငန်းကို ဗျာဒိတ်ထားဆောင်ရွက်ဖို့ လိုအပ်ပါတယ်။  အင်စတီကျူးရှင်း အားကောင်းတဲ့ ပါတီတွေရှိပါမှ အရပ်ဘက်အပေါ် စစ်ဘက်ရဲ့ ၀င်ရောက်စွက်ဖက်မှုတွေကို လျှော့ချနိုင်မှာပါလိမ့်မယ်။

ဆိုရှယ်လစ်နဲ့ ကွန်မြူနစ်စနစ်တို့ဟာ ပြိုင်ဘက်နိုင်ငံရေးပါတီ၊ အတိုက်အခံတွေနဲ့ အရပ်ဘက် လူ့အဖွဲ့အစည်းတို့ကို ချေမှုန်းပစ်ပါတယ်။ စစ်အာဏာရှင်စနစ်က နိုင်ငံရေးပါတီမှန်သမျှ ရန်သူအဖြစ်သတ်မှတ်ပါတယ်။ သို့သော် ဘယ်လို အခြေအနေရှိရှိ နိုင်ငံရေးသမားတွေက မျိုးဆက်တိုင်းအတွက် ရေရှည်ခံမယ့် ဒီမိုကရေစီပါတီ တည်ဆောက်ရေးကို အမြဲဦးတည်ကြရမှာ ဖြစ်ပါတယ်။ ရှိနှင့်ပြီးသား နိုင်ငံရေးပါတီကိုလည်း အင်စတီကျူးရှင်းဆိုင်ရာ အားကောင်းအောင် ၀ိုင်းဝန်းကြိုးပမ်းကြရပါမယ်။ နိုင်ငံရေးပါတီကသာ ကျောင်းသား နိုင်ငံရေးသမားတွေနဲ့ တော်လှန်ရေး
သမားတွေကို ပီပြင်တဲ့နိုင်ငံရေးသမားနဲ့ ခေါင်းဆောင်ကောင်းတွေဖြစ်အောင် လုပ်ပေးနိုင်မယ်။ အင်စတီကျူးရှင်း အားကောင်းတဲ့ နိုင်ငံရေးပါတီတွေရှိမှသာ မြန်မာ့မြေမှာ ဒီမိုကရေစီ အစစ်အမှန် ဖြစ်ထွန်းလာပါလိမ့်မယ်။

ဒါကြောင့် မြန်မာပြည်သူတွေအတွက် နှစ်ပေါင်း ရာချီခံမယ့် နိုင်ငံရေးပါတီတစ်ခု နှစ်ခု အမွေချန်ထားပေးနိုင်ရေးဟာ ယနေ့ခေတ်ရဲ့ တောင်းဆိုမှုနဲ့ လိုအပ်ချက်ဖြစ်ပါတယ်။ မျက်မှောက်ခေတ် နိုင်ငံရေးသမားတွေနဲ့ ခေါင်းဆောင်တွေရဲ့ သမိုင်းတန်ဖိုးကိုလည်း၊ နှောင်းမျိုးဆက်တွေက တိုင်းပြည်မှာ ဒီမိုကရေစီပါတီကောင်း တစ်ခု တည်ဆောက်ပေးနိုင်မှု ရှိမရှိနဲ့ ဆုံးဖြတ်ကြပါလိမ့်မယ်။

ရဲမြင့်ကျော်

မဇ္ဈိမ နေ့စဉ်သတင်းစာ၊ အတွဲ ၃၊ အမှတ် ၃ (၃ ၊ ၃၊ ၂၀၁၄)

No comments:

Post a Comment

Related Posts Plugin for WordPress, Blogger...