Friday, January 31, 2014

အဖိနှိပ်ခံ ပြည်သူအချင်းချင်းကြား အပြန်အလှန် စာနာထောက်ခံကြ



လက်တွေ့နိုင်ငံရေးအတွင်း အတွေးအခေါ် အမှားရော အမှန်ရော ပေါ်ပေါက်တတ်တာ သဘာဝပဲ။ တော်လှန်တဲ့ ဒါမှမဟုတ် မှန်ကန်တဲ့ အတွေးအခေါ်ကို အများစုက ဆုပ်ကိုင်နိုင်မှ ပြည်တွင်း နိုင်ငံရေးအခြေအနေ ရှေ့တလှမ်းတိုးမယ် ထင်မိတယ်။
ကချင် တိုင်းရင်းသားခေါင်းဆောင်တဦးက တော်လှန်ရေးလုပ်တာ မိမိလူမျိုးအခွင့်အရေးအတွက် စနစ်ကို တော်လှန်တာပဲ။ လူမျိုးကို တော်လှန်တာ မဟုတ်ဘူးလို့ ပြောဆိုတာဟာ ယေဘုယျ မျှတသင့်လျော်တဲ့ ပြောကြားချက်ပါ။
ဒီလိုတော့လည်း ရှိတာပေါ့။ တော်လှန်ရေးလုပ်တာ တိုင်းရင်းသား လူမျိုးတမျိုးအတွက် မဟုတ်ဘဲ အလုပ်သမား၊ လယ်သမား၊ မြို့နေဆင်းရဲသားဆိုတဲ့ အဖိနှိပ်ခံ ပြည်သူလူထုတရပ်လုံးအတွက် ဆိုတဲ့ ယုံကြည်ချက်နဲ့ တိုက်တဲ့ တော်လှန်ရေးအဖွဲ့အစည်းတွေလည်း ရှိကြပါတယ်။


ဒါပေမဲ့ ဘုံဦးတည်ချက်အနေနဲ့ ဗမာလူမျိုးကြီးဝါဒကို အဓိက ကျင့်သုံးနေတဲ့ စစ်အာဏာ ရှင်စနစ်တိုက်ရေးကို ဒီအဖွဲ့အားလုံးက တညီတည်း ညီညီညွတ်ညွတ် ဆုပ်ကိုင်နိုင်မယ်ဆိုရင် တော်လှန်ရေး ရှေ့ခြေတလှမ်းတက်မှာ မုချပဲ။
ကိုယ့်တိုင်းရင်းသား လူမျိုးအတွက် တိုက်နေတဲ့ တိုင်းရင်းသား လက်နက်ကိုင် တော်လှန် ရေးအဖွဲ့အစည်းတွေကြား တသားတည်း ညီညွတ်ရေးကို အနှစ်လေးငါးဆယ် သမိုင်းအတွင်း ခိုင်မာ ကြီးထွားအောင်၊ သိပ်သည်းကျစ်လျစ်အောင် မတည်ဆောက်နိုင်ခဲ့ကြတာ အားနည်းချက်ပဲ။ စစ်အစိုး ရအဆက်ဆက်က ဒီအဖွဲ့အစည်းတွေ အားလုံးကို သပ်လျှိုသွေးခွဲတာလည်း ခံခဲ့ကြရတယ်။ ဒါကြောင့် တိုင်းရင်းသားလူမျိုးတခုတည်းရဲ့ တော်လှန်ရေးအတွင်းမှာတောင်မှ ကွဲတာ ပြဲတာတွေ ဖြစ်ကြရတယ်။ ဒီလို အဖြစ်အပျက်မျိုး အရင်ကလည်း ရှိခဲ့တယ်။ ခုလည်း ရှိတယ်။
တိုင်းရင်းသား လက်နက်ကိုင်တော်လှန်ရေးအဖွဲ့အစည်းတွေရော၊ လူတန်းစားဖိနှိပ်မှုကို တော်လှန် တဲ့ လက်နက်ကိုင်အဖွဲ့အစည်းတွေရော ပေါင်းစည်းညီညွတ်ကြဖို့လိုတယ်။
တိုင်းရင်းသားလက်နက်ကိုင်အဖွဲ့အစည်းတွေအနေနဲ့ ဗမာလူမျိုးကြီးဝါဒကို(အဓိက) ကျင့်သုံးပြီး အန္တရယ်ပေးနေတဲ့ စစ်အာဏာရှင်စနစ်နဲ့စစ်အုပ်စုကို တိုက်နေတဲ့ တချိန်တည်းမှာ ဗမာ လက်နက်ကိုင်တော်လှန်ရေးတပ်ဖွဲ့တွေ အပါအ၀င် တပြည်လုံးက ပြည်သူတွေနဲ့ ပေါင်းစည်းညီညွတ် ရေး လုပ်သင့်တယ်။ အပြန်အလှန် စာနာ နားလည်တာ၊ ထောက်ခံအားပေးတာတွေ လုပ်သွားသင့်တယ်။ ဖေ့ဘွတ်ပေါ်မှာ မခွန်ဂျာ ပြောဆိုဖော်ပြတာ မှန်တယ်။ ဗမာပြည်ထဲက တိုင်းရင်းသားပြည်သူလူထု အများစု ထောက်ခံအားပေးတာ၊ ပါဝင်တာ မရှိဘဲ ဘယ် တော်လှန်ရေးမှ မအောင်နိုင်ဘူး။
ဗမာလူမျိုးကြီးဝါဒ ဆိုတာ ကျန်တဲ့ ဗမာနိုင်ငံရေးအဖွဲ့အစည်း ( လက်နက်ကိုင်ရော၊ လက်နက် မကိုင် သူတွေအပါ) ထဲမှာလည်း ရှိနိုင်တယ်။ ဒါပေမဲ့ ဗမာလူမျိုးကြီးဝါဒကို (အဓိက) ကိုင်စွဲကျင့်သုံးပြီး တပြည်လုံးကို တလျှောက်လုံး အန္တရယ်ပြုနေတာကတော့ စစ်အုပ်စုနဲ့ စစ်အစိုးရပဲ။ ဒါကြောင့် (အဓိက) ဆိုတာ ထည့်သုံးနေတာ ဖြစ်တယ်။
တိုင်းရင်းသား လက်နက်ကိုင်အဖွဲ့အစည်းတွေကြားမှာလည်း ကျဉ်းမြောင်းတဲ့ အမျိုးသားရေးဝါဒ အနည်းနဲ့ အများဆိုသလို ရှိတတ်ပါတယ်။ ဒါပေမဲ့ တိုင်းပြည်ရဲ့ အမျိုးသားညီညွတ်ရေး ပြိုကွဲနေရတာမှာ ဗမာလူမျိုးကြီးဝါဒကျင့်သုံးတဲ့ဘက်က အဓိက တာဝန် ပိုရှိတယ်။ တိုင်းရင်းသားလူ မျိုးတွေအနေနဲ့ ဗမာလူမျိုးကြီးဝါဒ ကျင့်သုံးအကောင်အထည်ဖော်နေတဲ့ စစ်အုပ်စုနဲ့ အစိုးရကို ဦးတည်တိုက်ရာမှာ ဗမာလူမျိုး ပြည်သူလူထုကိုပါ လူမျိုးရေးမုန်းတီးမှုထားပြီး တိုက်ခိုက်ရန်ရှာတာ လုပ်နေတယ်ဆိုရင်တော့ ဒါဟာ မှားယွင်းမှုပဲ။ ဗမာပြည်သူတွေက စစ်အစိုးရကြောင့် ဒုက္ခဆင်းရဲ ရောက်နေတဲ့ ပြည်တွင်းစစ်ကြားက တိုင်းရင်းသားပြည်သူတွေကို စာနာထောက်ခံနမှု ပေးနေကြတယ် ဆိုတဲ့ အချက်ကိုလည်း သတိပြုသင့်တယ်။
နောက်တချက်ကတော့ တိုင်းရင်းသားလူမျိုးစုအဖွဲ့အစည်းတွေအနေနဲ့ ကိုယ့်ပြည်နယ် အတွင်းမှာကျ ကိုယ့်လူမျိုးက လူများစုဖြစ်ပြီး လူမျိုးကြီးဝါဒ ကျင့်သုံးမိတတ်တဲ့ အချက်ကိုလည်း မမေ့လျော့သင့်ဘူး။ ပြည်နယ်တခုအတွင်း လူမျိုးကြီးဖြစ်နေတဲ့ တိုင်းရင်းသားနဲ့ အဲဒီပြည်နယ်မှာ လူနည်းစုဖြစ်နေတဲ့ တိုင်းရင်းသားလူမျိုးအကြား ပြဿနာပေါ်တတ်တာ၊ ပေါ်နေတာကို လက်တွေ့ နိုင်ငံရေးအတွင်း တွေ့နေရတယ်။ ချိန်ချိန်ဆဆ သိမ်သိမ်မွေ့မွေ့ကိုင်တွယ်ဖို့ လိုတဲ့ ပြဿနာ ဖြစ်ပါတယ်။
ဒီကနေ့ ဗမာပြည်မှာ ကချင်၊ ကရင်၊ ရှမ်း…အစရှိတဲ့ တိုင်းရင်းသား ပြည်သူတွေ စစ်အာဏာရှင်စနစ်ရဲ့ အဖိနှိပ်ခံနေရသလို ဗမာလူမျိုးတွေလည်း ဆိုးဆိုးဝါးဝါး အဖိနှိပ်ခံနေရတာ လက်တွေ့ပဲ။ ဗမာအဖိနှိပ်ခံ ပြည်သူနဲ့ တိုင်းရင်းသာအဖိနှိပ်ခံ ပြည်သူဆိုတဲ့ အဖိနှိပ်ခံ ပြည်သူအချင်းချင်း အပြန်အလှန် စာနာထောက်ခံကြရမယ်။ အလုပ်သမားတိုက်ပွဲဝင်ပြည်သူနဲ့ လယ်သမားတိုက်ပွဲဝင်ပြည်သူ အပြန်အလှန် ထောက်ခံအားပေးသွားရမယ်။ တိုက်ပွဲဝင်သွေးစည်းညီ ညွတ်မှု ကို တည်ဆောက်ရမယ်။ ဒီလိုတည်ဆောက်ပြီး ပြည်သူလူထုကို တကယ်တမ်း မှီခိုအားထားပြီး တိုက်ပွဲဝင်မယ်ဆိုရင် ပြည်ပက တော်လှန်ရေးစာနာမှုရှိတဲ့ စိတ်ဓာတ်အကူအညီက လွဲလို့ ဘယ်ပြည်ပမှ အားကိုးနေစရာ မလိုဘူး။ ။
(ရွှေကြာ)

No comments:

Post a Comment

Related Posts Plugin for WordPress, Blogger...