Sunday, December 8, 2013

“Political Agenda in Sasana”

By Athenian Ahnyarthar

- ဗုဒ္ဓဘာသာတွင် လူ့ ဘ၀ လူ့ အဖြစ်ဟူသည်ကို ပဒေသာပင်ပေါက်သည်နှင့် ခိုင်းနှိုင်းလေ့ရှိ၏။ ကြိုးစားလျှင်ကြိုးစားသလောက် အမြင့်ဆုံးတရားထူးတရားမြတ်ကိုပင်ရရှိနိုင်သော ရခဲလှသည့်အခွင့်ထူးအဖြစ် ဆိုလိုရင်းဖြစ်၏။ ထို့ ကြောင့်ပင် “မနုဿတ္တဘာဝေါဒုလ္လဘော” ဟူ၍ဟောတော်မူခြင်းဖြစ်၏။ ဤသို့ ရခဲလှသော လူ့ အဖြစ်တွင်ပင် သံသရာတလျှောက် တွေ့ ကြုံရန်ခဲယဉ်းလှသည့် သာသနာပွင့်ထွန်းသည့် အခိုက်နှင့်ကြုံရပြန်သော် ထပ်ဆင့် ဒုလ္လဘဖြစ်၏။ ဤ ကြုံခဲလှသော သာသနာတွင်ပင် ပြုနိုင်ခဲလှသော ရဟန်းအဖြစ် ကိုရထားလျှင်ကား ဆိုဖွယ်မရှိပြီ။ ဒုလ္လဘ တို့ ၏ အထွတ်အထိပ် ဒုလ္လဘ အစစ်ပင်ဖြစ်တော့၏။


- သို့ ပင်ဖြစ်လင့်ကစား သံသာရာဝဋ္ဋ်ဆင်းရဲမှထွက်မြောက်ကြောင်းအကျင့်မှ သွေဖည်သော် ဤဒုလ္လဘတရားတို့ ဟူသည်ကား အချည်းနှီးသာဖြစ်ဖို့ ရှိ၏။ ရွှေခွက်အား ပဲလှော်နှင့်လဲစားသည့်အဖြစ်သာ။ သူတော်ကောင်းတရားကိုကျင့်သောသူသည် ရွာသူတို့ ကဲ့သို့ များမြောင်လှသော အမှုကိစ္စများဖြင့် လုံးထွေးရစ်ပတ်နေ၍မရ။ သို့ သော် ဤသို့ သော နိုင်ငံရေး၊လူမှုရေး အစရှိသည့် အမယ်ဘုတ်ချည်ခင်ကြီးများဖြင့် လုံးထွေးရစ်ပတ် လာသည့် ရဟန်းတော်များကိုမူ ဒီမိုကရေစီခေတ်မရောက်မှီပင်များစွာ တွေ့ မြင်လာနေရပေပြီ။

- ဤလမ်းကြောင်းကို ရေလာမြောင်းပေး စတင်ဖေါက်လုပ်သောသူများမှာလည်း ရဟန်းတော်များမဟုတ်။ အစိုးရနှင့်အတိုက်အခံ ၂ ဘက်စလုံးမှ လူဝတ်ကြောင်များဖြစ်၏။ ဘုန်းကြီးရူးနှင့် လှေလူး တွေ့ ကြခြင်းပင်။ “အမျိုးသားရေး၊ လူ့ အခွင့်အရေး၊ ဒီမိုကရေစီအရေး” စသဖြင့် မည်သည့် ခေါင်းစဉ်ပင်တပ်တပ် အနှီခါတော်မှီ ဒကာ၊ဒကာမများ၏ ရည်ရွယ်ချက်မှာ ၎င်းတို့ ၏ လုပ်ငန်းများအောင်မြင်ရေးအတွက် လှုပ်ရှားဆောင်ရွက်ကြရာတွင် သံယာ၏ အားကို ယူလိုရင်းသာဖြစ်၏။ ဘာသာရေးအား နိုင်ငံရေးအတွက် အသုံးချခြင်း (သို့ မဟုတ်) နဂိုနေ သန့် ရှင်းပြီးသားဖြစ်သည့် မြန်မာ့ထေရ၀ါဒ အပေါ်တွင် နိုင်ငံရေးအတွေးအခေါ် အနံ့ အသက်တစ်ခုခုကို ဆွတ်ဖျန်းလိုခြင်း။

- အမှန်စင်စစ် မြန်မာတို့ ၏ ထေရ၀ါဒသည် တိုးတက်လှပါသည်ဆိုသော အနောက်ကမ္ဘာ၏ လောကီသီးသန့် ဝါဒ (secularism) မပေါ်ထွန်းမှီ ရှေးအတီတေကတည်းကပင် အာဏာနှင့်အလျင်းမပတ်သက်စေရေးကို သွန်သင်ဆုံးမသော ဘာသာတရားဖြစ်၏။ ၀ိနည်းပိဋ္ဋကတ်ရှိ သိက္ခာပုဒ် အသီးသီးတို့ ကိုဆန်းစစ်ကြည့်လျှင် သံယာများအား လူဝတ်ကြောင်တို့ နှင့် ရောရောထွေးထွေး မရှိစေရန် ကန့် သတ်ပေးထားသော ရည်ရွယ်ချက်ပါစမြဲဖြစ်သည်ကိုတွေ့ ရမည်ဖြစ်၏။

- ရင်ဝတွင် လှံစူးနေသော သူကဲ့သို့  တရားကိုကျင့်ရမည်ဟု ဆုံးမသော သာသနာတွင် လူ့ သက်တမ်းဟူသည် ဘင်အစွန်းမရောက်မှီ ရေပွက်မျှသာဖြစ်သည်ကို အမှတ်မထား၊ အမှုကိစ္စများလှသော နိုင်ငံရေး၊လူမှုရေး အစရှိသည့် အမယ်ဘုတ်၏ချည်ခင်ကြီးများကို တင်သွင်းလာနေကြသော အလုပ်လောက် မိုက်မဲသော အမှုကိစ္စမရှိ။ သာမညဖလ သုတ်လာ ရဟန်းအကျိုးတရားများကို ဖေါ်ဆောင်လိုသော် သံယာ့ဂုဏ်တော်ကိုးပါး၏ ရနံ့ ကို သင်းပျံ့ စေလိုသော် မည်သို့ သော နိုင်ငံရေးသဘောတရားကိုမျှ သံယာထုအတွင်း မထဲ့သွင်းအပ်ပေ။ မုလေးပန်းဟူသည် ပေါက်ဖက်နှင့် ထုပ်အပ်သောအရာမဟုတ်။

- သို့ သော်…သူ့ ကျွန်ဘ၀ လွတ်လပ်ရေးရုန်းကန်လှုပ်ရှားသည့်ခေတ်မှအစပြု၍ ခေတ်အဆက်ဆက်တွင် နိုင်ငံရေးသမားတို့ သည် သံယာဟူသည့်အင်စတီကျူးရှင်းကြီး၏ အားကို ယူရန် အမျိုးမျိုးလုံလစိုက်ထုတ်လာကြသည်ကိုတွေ့ ရမည်ဖြစ်၏။ မြန်မာတို့ ၏ သန့် စင်ပြီးသား သမရိုးကျထေရ၀ါဒ ဗုဒ္ဓဘာသာကို အစစ်အမှန်ကျင့်သုံးသည်ထက် မိမိတို့ ၏ နိုင်ငံရေးဝါဒများ၊ သွန်သင်ချက်များအား အထောက်အကူပြုစေရေးအတွက် လိုသလို ဆွဲယူပုံဖေါ်လာခဲ့ကြသည်မှာ “သံယာများမဲပေးခွင့်ရှိသည်ဟု” အသံထွက်လာသည်အထိဖြစ်၏။

- ဤသို့ သံယာထုအတွင်း နိုင်ငံရေးအာဂျင်ဒါ ကို သွတ်သွင်းခြင်း၏ ရလဒ်မှာ အသို့ ရှိမည်နည်း။ ရဟန်းတစ်ပါး အတွက်မူ ပါရာဇိက ကျခြင်းသာလျှင်လမ်းဆုံးရှိပေ၏။ “သမန်းမြက်သည်ပင်လျှင် အမှုမဲ့ကိုင်တွယ်က လက်ကို ရှ စေနိုင်သကဲ့သို့ သေးသယ်သော ၀ိနည်းသိက္ခာပုဒ်ပင်ဖြစ်သော်လည်း အမှုမဲ့ နေပါက ပါရာဇိကကျ၍ ရဟန်းအဖြစ်ကို ဆုံးရှုံးနိုင်သည်” ဟူသော အဆုံးအမကို မမေ့အပ်။ ထိုမှတဆင့်တက်သော်….ဘုန်းကြီးတွေ လူအလုပ်ကို လုပ်ကြလျှင် လူတွေ ဘီလူးဖြစ်လာဖို့ ပင်ရှိ၏။

- ဤသို့ နိုင်ငံရေးဘုန်းကြီးများအားဆရာတင်သော လူဝတ်ကြောင်များအတွက်မူ ရလဒ်ကားပိုဆိုးဖို့ ပင်။ ၎င်းတို့ အတွက် လမ်းဆုံးသည်လည်း ပါရာဇိကကျခြင်းသာ။ နိုင်ငံရေးဟူသည် အကွဲအပြဲကိုဖန်းတီးပေးနိုင်ဆုံးသော စေ့ဆော်မှုဖြစ်၍ သူ့ ဘုန်းကြီး ငါ့ဘုန်းကြီးကွဲကြမည်ဖြစ်သောကြောင့် ဆရာကွဲမှစကာ တပည့်များပါ ကွဲကြမည်ဖြစ်သောကြောင့်ပင်။
ယခုပင်လျှင် "ရှင်ဝီရသူလော်ဘီ" မျိုးချစ်များနှင့် "ဒယ်အိုးဆရာတော်လော်ဘီ" အမေ့သားများ၏ အပြိုင်အဆိုင် စည်းရုံးလှုံ့ ဆော်ရေးများ ဖြစ်ထွန်းလာနေသည်ကို တွေ့  နေရပြီဖြစ်၏။

- အမှန်တော့ ကာယကံရှင် ဘုန်းကြီး ၂ ပါးအကြားမည်သို့ သဘောထားရှိကြမည်မသိသော်လည်း…ကိုယ်ကြိုက်သော ပါတီကို ဝေဖန်သော ဘုန်းကြီးနှင့် ၎င်း ဘုန်းကြီးကို ဘုန်းကြီးချင်း ပြန်တိုက်ရန် ဆရာမွေးလာကြသော အုပ်စုတိုက်ပွဲများသာဖြစ်၏။ ဤသို့ ဘုန်းကြီးအချင်းချင်းကွဲကြသောအမှု တနည်းအားဖြင့် သံယာကွဲခြင်းအမှုကို အားပေးအားမြှောက်ပြုလုပ်ခြင်းသည် စင်စစ် “သံယဘေဒက” ဟုခေါ်သည့် “ညီညွတ်သော သံယာကို သွေးခွဲမှု” ကံထိုက်နိုင်သည်ကိုလည်း သိကြသည့်ပုံမပေါ်ပေ။

- ရဟန်းတို့ တွင် ပါရာဇိက လေးပါးတွင် တစ်ခုခုကိုကျူးလွန်သော် ကျူးလွန်သည့် ခဏတွင်ပင် ရဟန်းအဖြစ်ဆုံးရှုံး၍ လူထွက်ရ၏။ ယခုမျက်မှောက်ဘ၀တွင် တဖန်ပြန်၍ ရဟန်းပြုခွင့်မရပြီ။ သို့ သော်လူဝတ်ကြောင်ဘ၀ဖြင့် ကြိုးစားသော် အရဟတ္တမဂ်ထိ ရနိုင်သေး၏။

- လူဝတ်ကြောင်တို့ တွင်ကား… လူပါရာဇိက ဟုခေါ်သည့် ကံကြီးငါးပါးဟူသည်ရှိ၏။ အဖေကိုသတ်ခြင်း၊ အမေကို သတ်ခြင်း၊ ဘုရားရှင်ကိုသွေးစိမ်းတည်စေခြင်း၊ ရဟန္တာကိုသတ်ခြင်းနှင့် သံယာကို သင်းခွဲခြင်းဟူသော အကြီးဆုံးသော အကုသိုလ်အပြစ်များ။ သို့ ဖြင့် နိုင်ငံရေးကိုအကြောင်းပြုလျှက် သံယာနှင့်စပ်သော ကံကြီးငါးပါးတွင် သံယဘေဒက (သို့ ) သံယာသင်းခွဲမှုဟူသည့်အကုသိုလ်ကံကြီးတစ်ခုထိုက်နိုင်ပေတော့၏။ ဤ သံယဘေဒက အကုသိုလ်ကံသည်…့ မဂ်တားဖိုလ်တား ကံကြီးဖြစ်သည့်အပြင် ရှင်ဒေ၀ဒတ်သွားရာလမ်းသို့ မြန်းဖို့ ရာလမ်းလည်းဖြစ်၏။

- နိုင်ငံရေးကိုအကြောင်းပြုလျှက် သံယာထုတွင်လည်း သီတင်းသုံးဖေါ်ခြင်း အတူတကွ ဥပုသ်မပြုနိုင်။ အတူတကွ တရားတော်ကို လေ့လာအားထုတ်ခြင်းမပြုနိုင်သော်….သာသနာတော်သည်လည်းအဆုံးတွင် အကွဲအပြဲများဖြင့် အားအင်ချည့်နဲ့ ကာ စည်ပင်ကြီးပွားဖို့ မဖြစ်နိုင်။ တစတစ ပျောက်ကွယ်ဖို့ သာရှိတော့၏။

-အမှန်စင်စစ် မြတ်ဗုဒ္ဓ၏ သာသနာသည် “သီတဂူသာသနာ” ၊ “ရှင်ဝီရသူသာသနာ”၊ “ဒယ်အိုးဆရာတော်သာသနာ” စသဖြင့် ပါတီစုံဒီမိုကရေစီမဟုတ်။ ဖြစ်လည်းမဖြစ်သင့်။ “ဧကောမဂ္ဂေါ” တစ်ကြောင်းတည်းသောလမ်းသာရှိသည့် သာသနာတွင် “Agree to Disagree” လုပ်၍မရ။ ညီညွတ်သော သံယာအား နိုင်ငံရေးထည့်သွင်းလာခြင်းအားဖြင့် ပြိုကွဲစေခြင်းသည်သာ လာမည့် ဒီမိုကရေစီခေတ်၏ ကြီးစွာသော အန္တရာယ်ကြီးပင်ဖြစ်တော့၏။

No comments:

Post a Comment

Related Posts Plugin for WordPress, Blogger...