Monday, December 23, 2013

`` ဆက်ရန်...´´



ဆီးဂိမ်းပြိုင်ပွဲကြီးကတော့ ခြိမ့်ခြိမ့်သဲသဲ အောင်ပွဲများနှင့်အတူ ပြီးဆုံးခဲ့ပြီဖြစ်ပါသည်။
လှပဆန်းသစ်စွာ......
ခန့်ငြားထယ်ဝါစွာ.....
အစီအစဉ်ကျနစွာ...
ကျေနပ်ဂုဏ်ယူဖွယ်ရာ အောင်မြင်ပြီးမြောက်စွာ.... ကျင်းပနိုင်ခဲ့ပါသည်..



ကမ္ဘာ့ ထိပ်တန်းအဆင့် မဖြစ်သော်လည်း ( B+ ) ပြိုင်ပွဲကြီးအဖြစ် နိုင်ငံတကာတွင်ပင် ပြောစမတ်ဖြစ်ခဲ့ပါပြီ...။



အထင်သေးနေသူများလည်း အထင်မသေးနိုင်တော့သလို စေတနာထားသူများလည်း ကျေနပ်ခဲ့ကြသည်။

နိုင်ငံတကာပွဲတစ်ခုကို တင့်တင့်တယ်တယ် ညီညွတ်မျှတစွာ တာဝန်ယူဆောင်ရွက်နိုင်ခဲ့ပါသည်။

မြန်မာများ ဂုဏ်ယူစွာ ကျေနပ်နေခဲ့ကြပါသည်။
ပြိုင်ပွဲကြီး ဖြစ်မြောက်ရေးအတွက် စီစဉ်ရသူများ...၊ ပါဝင်ရသူများ... ယှဉ်ပြိုင်ကြသူများ... ကူညီရသူများ.... အားပေးကြသူများ.... အားလုံး... အားလုံး နွမ်းလျစွာ ပြုံးလျှက်ကျန်ရစ်ခဲ့ကြပါသည်။

အံ့သြလောက်စွာ.... အနှောင့်အယှက်နှင့် ပယောဂများ ကင်းခဲ့သည်။

မျိုးချစ်စိတ်ကြောင့် အားကစားပွဲများတွင် ဖြစ်လေ့ဖြစ်ထရှိသော မကျေနပ်မှု အနည်းကတော့ဖြင့် ခေတ်မီကြောင်းကို ၀င်ရောက်အားဖြည့်ပေးခဲ့ပါသေးသည်။ ဤသည်လည်း ဂိမ်းတစ်ခု၏ လက္ခဏာတစ်ရပ်ပင် ဖြစ်ပါသည်။

ဤ ပြိုင်ပွဲကြီးအား အားလုံး အမှတ်ရနေကြမည်.... ဂုဏ်ယူနေကြမည်... အခြားပွဲများနှင့်လည်း အမြဲပင် ချိန်ထိုးနေကြမည်သာ ဖြစ်ပါသည်။

မြန်မာများ လုပ်နိုင်သည် ဆိုသည်ကို ပြဆိုလိုက်ပြီဖြစ်ပါသည်။

=====================================

ယခု နောက်ထပ် ပြိုင်ပွဲများကိုလည်း ဆက်လက် ယှဉ်ပြိုင်ကြပါဦးမည်....။

မည်သည့် ပြိုင်ပွဲပါနည်း ??????

ကွင်းလယ်ဒိုင်.... စည်းကြပ်ဒိုင်.... အကူဒိုင်.... မှတ်တမ်းဒိုင်များ ခန့်အပ်ရခြင်း မရှိသေးသော.....


`` 2015 - Internal President Challenge Cup ´´ (ခ) ``ဖိတ်ခေါ် ပြည်တွင်း သမ္မတဖလား ပြိုင်ပွဲ´´ ဖြစ်ပါသည်။

ပြိုင်ပွဲတွင် ကစားနည်း ( ၅ )မျိုး ထည့်သွင်း ယှဉ်ပြိုင်မည် ဖြစ်ပါသည်...

(က) အခြေခံဥပဒေ ပြင်ဆင်ရေး ပြိုင်ပွဲ။
(ခ) ပြည်နယ် ခွဲထွက်ရေး ပြိုင်ပွဲ။
(ဂ) နိုင်ငံသား ပြုခွင့်ရရှိရေးပြိုင်ပွဲ။
(ဃ) ပြည်ထောင်စု တပ်မတော်ပြိုင်ပွဲ။
(င) အမျိုးသားရေးဆိုင်ရာ ဘာသာရေး ပြိုင်ပွဲတို့ဖြစ်ကြပါသည်။

ပထမ ပြိုင်ပွဲသည် တစ်ဦးချင်း ယှဉ်ပြိုင်ရမည့် ပြိုင်ပွဲဖြစ်ပြီး လက်ရှိချန်ပီယံမှ ၀င်ရောက်ယှဉ်ပြိုင်ခြင်း ရှိ/မရှိ မသိရသေးသော်လည်း အခြားပြိုင်ဘက်များမှ အကြီးအကျယ် လေ့ကျင့် ပြင်ဆင်နေပြီဖြစ်သော ပြိုင်ပွဲ တစ်ရပ်ဖြစ်ပါသည်။ ပရိသတ်များ အထူးစိတ်ဝင်စား သကဲ့သို့ အသင်းများမှလည်း သည်းသည်းလှုပ်မျှ စည်းရုံးလှုံ့ ဆော်နေသော ပြိုင်ပွဲ အကြိုကာလ ဖြစ်ပါသည်။

ဒုတိယ ပြိုင်ပွဲမှာကား အင်အားချင်း မမျှသော ပြိုင်ပွဲဖြစ်ပါသည်... အသင်းငယ် နှစ်သင်းနှင့် ထိပ်တန်းအသင်းကြီး တစ်သင်း ယှဉ်ပြိုင်ရမည့် ပွဲဖြစ်သဖြင့် လေ့လာသူနှင့် ကျွမ်းကျင်သူများမှ ဤ ပြိုင်ပွဲအား ထည့်သွင်းယှဉ်ပြိုင်စေလိုခြင်း မရှိသော်လည်း ပထမပြိုင်ပွဲမှ ပြိုင်ဘက်အသင်းအချို့ကတော့ဖြင့် ဤပြိုင်ပွဲ၏ ရလာဒ်အား ဖမ်းယူဆုပ်ကိုင်နိုင်ရန် ပြင်ဆင်နေကြပါသည်။

တတိယ၊ စတုတ္ထနှင့် ပဉ္စမပြိုင်ပွဲများကား ပထမပြိုင်ပွဲကိုသာမက `` 2015 - Internal President Challenge Cup ´´ ပြိုင်ပွဲကြီး တစ်ခုလုံးကိုပင် ပျက်စီးသွားစေနိုင်သော ကြိုတင်ပြင်ဆင် လေ့ကျင့်မှုဖြစ်နေပါသည်.. ပြည်ပဒိုင်များ ကျွမ်းကျင်မှုများနှင့် နည်းပညာများ၏ အကူအညီဖြင့် ပြိုင်ဘက် အသင်းအချို့ မှ အနိုင်ယူရန် စီစဉ်နေပြီ ဖြစ်ပါသည်။

======================================

ယနေ့ ကမ္ဘာကြီးတွင် အားကစားပြိုင်ပွဲ အသီးသီး၌ သဘာဝအားဖြင့် မကျေနပ်မှုများ.... မတရားမှုများ... အကြမ်းဖက်မှုများ... လာဒ်စားမှုများ.... အရေးယူမှုများ.... အပြစ်ပေးမှုများ....လုပ်ပွဲများ ဖြစ်ပေါ်နေကြပါသည်။ လွန်ကျူးသော... စံချိန်တင်လောက်သော... စက်ဆုပ်ဖွယ်ကောင်းသော ဖြစ်ရပ်များတော့ဖြင့် မဟုတ်ပါ...။

`` 2015 - Internal President Challenge Cup ´´ ပြိုင်ပွဲကြီး မတိုင်မီ လေ့ကျင့်ရေးကာလတွင် ခေတ်မီယုံမျှမက ခေတ်လွန် အားပေးမှုများသည် မကြာမီ အသက်ဝင်လာတော့မည် ဖြစ်ပါသည်။

ဆုကြေးအနေဖြင့်လည်း အလွန်ပင် မြင့်မားပါသည်....
နိုင်ငံတော်၏ အနာဂတ်... သန်း ၆၀ ကျော်၏ ဘ၀များနှင့် ဘာသာတရားတို့ကို စီရင်နိုင်ခွင့် ဖြစ်ပါသည်။ ( ဤဆုကို ရရှိခဲ့ပါက မည်သို့ စီရင်မည်ကိုတော့ဖြင့် တိကျသော ပြဆိုချက်များအား အသင်း အသီးသီးမှ မထုတ်ပြန်ကြသေးပါ...။) ထိုသို့ ဆုကြေး အလွန်အမင်းမြင့်မားခြင်းကြောင့်လည်း ဤပြိုင်ပွဲတွင် အသည်းအသန် အနိုင်ရယူလိုခြင်းဖြစ်ဟန် တူပါသည်....။

ထိုသို့သော ခေတ်လွန်အားပေးမှုများကြားတွင် မီးတောက်များ.... သွေးကွက်များ... မျက်ရည်စက်များ... ကိုယ်အင်္ဂါ အပိုင်းအစများနှင့် ချို့ ငဲ့ ကြောက်လန့်နေသော အနိဌာရုံ မြင်ကွင်းများကို မမြင်မတွေ့လိုပါ...။

ထို့ကြောင့် မကြာမီ ဆက်လက် ကျင်းပမည့် `` 2015 - Internal President Challenge Cup ´´ (ခ) ``ဖိတ်ခေါ် ပြည်တွင်း သမ္မတဖလား ပြိုင်ပွဲ´´ကြီးတွင်လည်း မည်သည့်အသင်းကပင် ရွှေတံဆိပ်ရယူသွားပါစေ... ညှီနံ့ကင်းစွာ ဆီးဂိမ်းပြိုင်ပွဲကြီး ကဲ့သို့ပင် အပြုံးပန်းများ... အောင်မြင်မှုများဖြင့် ဝေဆာနေစေကြောင်း ဆုတောင်းလျှက်.... Fair Play ဖြစ်ပါစေကြောင်း ဆန္ဒ ပြုအပ်ပါသည်။

(ကွန်ဆူးမား)(၂၂-၁၂-၂၀၁၃)

No comments:

Post a Comment

Related Posts Plugin for WordPress, Blogger...