Monday, October 7, 2013

ဦးပိုင် ဘယ်လောက်ပိုင်အုန်းမလဲ


မုံရွာမြို က ဒေသခံများနှင့် အချင်းများနေသည့် လက်ပံတောင်းတောင်ကြေးနီ စီမံကိန်း စာချူပ်ကို အစိုးရက အသစ်ပြန်လည်ချုပ်ဆိုလိုက်ပြီဖြစ်ပါသည်။ အသစ်ပြန်လည်ချုပ်ဆိုချက်အရ လက်ပံတောင်းတောင်ကြေးနီ စီမံကိန်း၏ အကျိုးအမြတ်ပိုင်ဆိုင်မှုများကို အစိုးရက ၅၁ရာခိုင်နှုန်း တာဝန်ယူလုပ်ကိုင်နေသာ စစ်တပ်၏ ဦးပိုင်ကုမ္ပဏီက ၁၉ ရာခိုင်နှုန်းနှင့် တရုတ်ဝမ်ပေါင်ကုမ္ပဏီက ၃၀ ရာခိုင်နှုန်းဘဲ ရရှိမည်ဖြစ်ပါသည်။

မူလသဘောတူညီချက်စာချူပ်တွင်မှူကြေးနီစီမံကိန်း၏ အကျိုးအမြတ်များကို ၀မ်ပေါင်က ၅၁ ရာခိုင်နှုန်းယူပြီး ဦးပိုင်က ၄၅ ရာခိုင်နှုန်းရရှိခဲ့ပါသည်။ ဆန္ဒပြမှုမကျေနပ်မှူများကြောင့် မူလစာချုပ်ကိုပြင်ဆင်လိုက်ရသောကြောင့်စစ်တပ်ကုမ္ပဏီဖြစ်သောဦးပိုင်က ဒေသခံနှင့်ပြည်သူလူထုပိုင် သယံဇာတများကို မည်မျှအကျိုးအမြတ်ရယူထားသလဲဆိုတာ ဖော်ပြလိုက်သကဲ့ သို့ ရှိသည်။

နိုင်ငံရေးအခြေအနေနှင့် မိမိပိုင်အခွင့်အရေးကို ဖော်ထုတ်ချင်းငှာ မစွမ်းသာသည့် ဒေသခံများနှင့် မြန်မာပြည်သူတို့ ၏ အကျိုးခံစားခွင့်များကို တရုတ်ကုမ္ပဏီ နှင့်ပူးပေါင်းပြီး ဦးပိုင်က ခံစားရယူနေခဲ့ သည်ကိုလည်း ပြသလိုက်သကဲ့ သို့ ရှိသည်။

လက်ပံတောင်းတောင်ကြေးနီစီမံကိန်းက ဦးပိုင်၏ များပြားလှစွာသောစီးပွားရေးလုပ်ငန်းများထဲက တခုသာဖြစ်ပါသည်။ မြန်မာနိုင်ငံက အခွင့်ထူးခံ စီးပွားရေးလုပ်ငန်းများမှာ ဦးပိုင်က သိသိသာသာပိုင်ဆိုင်လုပ်ကိုင်မှုများရှိသလို အနောက်က ကျောထောက်နောက်ခံ ပေးထားသောလုပ်ငန်းများလည်း အများအပြားရှိသည်။

ဦးပိုင်ခေါ် ပြည်ထောင်စု မြန်မာနိုင်ငံစီးပွားရေးဦးပိုင်လီမီတက်ကို ၁၉၉၀ ဖေဖော်ဝါရီလတွင် မြန်မာစစ်တပ်၏ စီးပွားရေးလုပ်ငန်းအဖြစ် အထူးကုမ္ပဏီဥပဒေဖြင့်တည်ထောင်ခဲ့ ပါသည်။ ထိုအချိန်တွင် ဦးနေ၀င်း၏ ဆိုရှယ်လစ်စီးပွားရေးစနစ်မှ အသွင်ကူးပြောင်းခါစ အချိန်ဖြစ်ပါသည်။ စတင်တည်ထောင်ခဲ့ စဉ်က ဦးပိုင်၏ မတည်ငွေရင်းမှာ အမေရိကန်ဒေါ်လာ ၁.၆ ဘီလီယံရှိခဲ့ ၏
၂၀၀၀ခုနှစ်များတွင်တော့ သကြားစက်ရုံအပါအ၀င် အစိုးရပိုင်လုပ်ငန်းအများအပြားကို ဦးပိုင်ကရယူလုပ်ကိုင်ခဲ့ သည်။


ဦးပိုင်ကို မြန်မာစစ်တပ်၏ ဌာနနှစ်ခုက စီမံခန့်ခွဲပိုင်ဆိုင်ပါသည်။ဦးပိုင်၏ ကုမ္ပဏီရှယ်ယာ ၄၀ ရာခိုင်နှုန်းကို စစ်တပ်ကာကွယ်ရေးအ၀ယ်ဌာနက ပိုင်ဆိုင်ပြီး ၆၀ ရာခိုင်နှုန်းကို စစ်တပ်အငြိမ်းစားနှင့် လက်ရှိစစ်ဗိုလ်ချုပ်များက ပိုင်ဆိုင်ထားပါသည်။ အထူးသဖြင့် စစ်တပ်အစိုးရအတွင်းတွင် ရာထူးကြီးကြီးရခဲ့ သောစစ်ဗိုလ်ချူပ်ကြီးများက အစုရှယ်ယာများပါဝင်ထားပါသည်။ စတင်တည်ထောင်ခဲ့ သည့် ၁၉၉၀ မှ ၂၀၁၂ ခုနှစ်အထိ လုပ်ငန်းလုပ်သည့်ကိစ္စအ၀၀နှင့်ပတ်သတ်ပြီး အခွန်ကင်းလွတ်ခွင့်အခွင့်အရေးကို ရရှိထားသည့် စီးပွားရေးအဖွဲ့ အစည်းလည်းဖြစ်ပါသည်။

မြန်မာနိုင်ငံ၏ ဘဏ်လုပ်ငန်း၊ ခရီးသွားလုပ်ငန်း၊ အိမ်ခြံမြေ၊ ဆက်သွယ်ရေးနှင့် သထ္ထူတွင်းလုပ်ငန်းများ စသော အကျိူးအမြတ်ကြီးသည့် လုပ်ငန်းအားလုံးတွင် ဦးပိုင်က ပါဝင်လုပ်ကိုင်နေသည်။ ထို့ အပြင် မြန်မာနိုင်ငံတွင် လာရောက်ရင်းနှီးမြုပ်နှံသည့် နိုင်ငံခြားရင်းနှီးမြုပ်မှန်သမျှကလည်းတရုတ်ဝမ်ပေါင်ကုမ္ပဏီကဲ့ သို့  ဦးပိုင်နှင့် မလုပ်မဖြစ်ဖက်စပ်လုပ်ကိုင်ရလေ့ရှိသည်

မြ၀တီဘဏ်။ပါရမီဘတ်စ်ကားများ။ ကချင်ပြည်နယ်နယ်က ကျောက်စိမ်းတွင်းများ။ ရှမ်းပြည်နယ်က ပတ္တမြားနှင့်ကျောက်မျက်တူးဖော်မှူများ တိုက်ဂါးဘီယာကဲ့ သို့ အရက်ချက်လုပ်ငန်းများစသည်ဖြင့် ဦးပိုင်၏ အကျိုးအမြတ်ကြီးသောစီးပွားရေးလုပ်ငန်းများက မြန်မာနိုင်ငံတွင် လက်ညိုးထိုးမလွဲအောင်ရှိပါသည်။ ဒါတင်မက ကမ္ဘာက ဘိန်းရာဇာဟုသတ်မှတ်ထားသော ကွယ်လွန်သူလောစစ်ဟန်ပိုင် စီးပွားရေးလုပ်ငန်းအချို့ မှာလည်းဦးပိုင်က ပါဝင်ပတ်သတ်နေသေး၏

ယခုအခါဂျပန်အစိုးရနှင့်ဖက်စပ်လုပ်ကိုင်ရန်ပြင်ဆင်နေသည့်ရန်ကုန် သီလ၀ါစက်မှုဇုန်တွင်လည်း ဦးပိုင်က ဖက်စပ်လုပ်ကိုင်သူအဖြစ်ပါဝင်ပါသေးသည်။
ကမ္ဘာတွင်အဆင်းရဲဆုံးနိုင်ငံတခုဖြစ်သည့်


မြန်မာနိုင်ငံတွင်ဦးပိုင်ကုမ္ပဏီဒါရိုက်တာ အဖွဲ့ ဝင်များ၏ ချမ်းသာကြွယ်ဝပိုင်ဆိုင်မှူများကလည်း အံမခန်းဖြစ်ပါသည်။ သို့ သော်လည်း လူ့ အခွင့်အရေးချိုးဖောက်ခဲ့ သည်မြန်မာစစ်တပ်ကြောင့် ဦးပိုင်ကုမ္ပဏီအကြီးအကဲများအပါအ၀င် ဦးပိုင်ကုမ္ပဏီက အမေရိကန်ပြည်ထောင်စု၏ စီးပွားရေးအရေးယူပိတ်ဆို မှုစာရင်းတွင် ဆက်လက်ရှိနေပါသည်။



ထို့ ကြောင့် မြန်မာနိုင်ငံရေးအနေအထားပြောင်းလဲလာရသည့်အချိန်တွင် မြန်မာနိုင်ငံကိုစီးပွားရေးလုပ်ကိုင်ရန်ရောက်ရှိလာသည့် နိုင်ငံတကာကုမ္ပဏီများနှင့် အမေရိကန်၏ နာမည်ပျက်စာရင်းမှာရှိသည့် ဦးပိုင်က စီးပွားရေးပူးပေါင်းလုပ်ကိုင်ခွင့်မရခဲ့ပါ။ ထို့ အပြင် မြန်မာနိုင်ငံ၏ လက်တလောပြောင်းလဲလာသောနိုင်ငံရေးစီးပွားရေးအနေအထားက ဦးပိုင်၏ အခွင့်ထူးခံစနစ်ကို ထိပါးလာပါသည်။

အဘယ်ကြောင့်ဆိုသော် လက်ရှိအစိုးရကလည်း ဦးပိုင်ကို ဖိအားများစတင်ပေးလာခဲ့ ၏၂၀၁၂ ဘဏ္ဍာရေးနှစ်ကစပြီး သမ္မတဦးသိန်းစိန်အစိုးရက ဦးပိုင်ကုမ္ပဏီများကို အခွန်ပေးဆောင်ရန်နှင့် တခြားစီးပွားရေးလုပ်ငန်းများနှင့်တန်းတူလုပ်ရမည်ဟု သတ်မှတ်လိုက်ပါသည်။ ထို့အတွက် ယခင်ကအခွင့်ထူးခံဖြစ်သော စစ်ဗိုလ်ချုပ်ကြီးများအတွက် အသက်ရှူကျပ်လာစရာဖြစ်လာသည်ဟု အမေရိကန်ပြည်ထောင်စု ၀ါရှင်တန်တက္ကသိုလ်က မြန်မာအရေးကျွမ်းကျင်သူ မာရီကလယ်ဟန်က ထောက်ပြခဲ့ပါသည်။

ပြီးခဲ့သည့်ခြောက်လအတွင်း မြန်မာစစ်တပ်က လက်ဝါးကြီးအုပ်ထားသည့်ဘီယာနှင့် စီးကရက်လုပ်ငန်းများတွင် ဟန်နီကင်၊ကာလ်ဘက် ဘီယာများ၊ ဂျပန်ဆေးလိပ်ကုမ္ပဏီနှင့် လန်ဒန်စီးကရက်ထုတ်လုပ်သည့် ဘီအေတီကုမ္ပဏီများဝင်ရောက်လာခြင်းသည် ဦးပိုင်၏ စီးပွားရေးလုပ်ငန်းများကို ပေါ်တင်စိန်ခေါ်လိုက်တာဘဲဖြစ်သည်

ထို့ အပြင် လက်ပံတောာင်းဒေသခံများ၏ မကျေနပ်မှူများကြောင့် မုံရွာလက်ပံတောင်းတောင် စီမံကိန်းအတွက် ဦးပိုင်၏အကျိုးခံစားခွင့်များကို ၄၅ ရာခိုင်နှုန်းရယူရာမှ ၁၉ရာခိုင်နှုန်းအထိလျှော့ ပေးလိုက်ရပြန်ပါသည်။
ထိုအရာများက အစသာရှိပါသေးသည်။

မြန်မာ၏နိုင်ငံရေးပြောင်းလဲမှုနှင့်အညီဒီမိုကရေစီစနစ်အရ စီးပွားရေးလုပ်ငန်းများမှာ ပွင့်လင်းမြင်သာမှုရှိရမည်။ နေရာတကာအခွင့်ထူးခံနှင့်လက်ဝါးကြီးအုပ်စနစ်များ လျှော့ကျ ပြောင်းလဲလာရန်ရှိသည့်အတွက် ဦးပိုင်အတွက်
အသက်ရှုကျပ်စရာအခြေအနေများ ရှေဆက်ဖြစ်ပေါ်လာရန်သာရှိပါသည်။

ထားထားမြင့်
ဓာတ်ပုံ Getty images

No comments:

Post a Comment

Related Posts Plugin for WordPress, Blogger...