Wednesday, October 9, 2013

အခြေခံဥပဒေ ပြင်ဆင်ရေးဆိုတာ ထိပ်တိုက်ရင်ဆိုင်နေတာ မဟုတ်ပါ

လက်ရှိ ဖွဲ့စည်းပုံ အခြေခံ ဥပဒေကို ပြင်ဆင် ရေးဆွဲဖို့ အတွက် အမျိုးသား ဒီမိုကရေစီ အဖွဲ့ချုပ်၏ ခြေလှမ်းများကို သုံးသပ်ပြီး၊ အမျိုးသား ဒီမိုကရေစီ အဖွဲ့ချုပ်နှင့် ဒေါ်အောင်ဆန်းစုကြည်တို့က တပ်မတော်နှင့်၊ အစိုးရနှင့် ထိပ်တိုက် ရင်ဆိုင်ရေးကို ရှေးရှုနေသည် ဆိုသော ဝေဖန်ချက်အချို့ကို ကြားလိုက်ရပါသည်။ သည်အခါမှာ မေးခွန်းတစ်ခု ပေါ်လာပါသည်။ အမျိုးသား ဒီမိုကရေစီ အဖွဲ့ချုပ်နှင့် ဒေါ်အောင်ဆန်းစုကြည် တို့က ထိပ်တိုက် ရင်ဆိုင်ရေးလမ်းကြောင်းကို ရွေးချယ်စရာ ဘာအကြောင်းများ ရှိပါသလဲ။ နောက်ကြောင်းကို အနည်းငယ် ပြန်ကြည့်ဖို့ လိုပါမည်။
မြန်မာနိုင်ငံ အမျိုးသား ခေါင်းဆောင်ကြီး ဗိုလ်ချုပ်အောင်ဆန်း၏ သမီးဖြစ်သူ နိုဘယ် ငြိမ်းချမ်းရေးဆုရှင်၊ ၁၉၉၀ အထွေထွေ ရွေးကောက်ပွဲတွင် အပြတ်အသတ် အနိုင်ရရှိထား သော အမျိုးသား ဒီမိုကရေစီ အဖွဲ့ချုပ် ခေါင်းဆောင်၊ နေအိမ်မှာ နှစ်ပေါင်းများစွာ အကျယ်ချုပ်ချခံထားရသည့် ဒေါ်အောင်ဆန်း စုကြည်ကို ၁၃ နိုဝင်ဘာ ၂၀၁၀ ညနေ ၅း၀၀ နာရီက လွှတ်ပေး လိုက်ပါသည်။ လွှတ်မိန့်ကို ရဲမှူးချုပ်က ဖတ်ပြပါသည်။ လွတ်လပ်စွာ နေထိုင် လှုပ်ရှားနိုင်ကြောင်း၊ ဘာအနှောင်အဖွဲ့မှ ဆက်လက် ရှိမနေကြောင်း တို့ကိုလည်း ပြောပါသည်။


နောက်တစ်နေ့ ၁၄ နိုဝင်ဘာ ၂၀၁၀ နံနက် ၁၂ နာရီ လောက်မှာ ရန်ကုန်မြို့ ဗဟန်းမြို့နယ် အနောက် ရွှေဂုံတိုင် လမ်းပေါ်က အမျိုးသား ဒီမိုကရေစီ အဖွဲ့ချုပ်၊ ဌာနချုပ် ရုံးစိုက်ရာ နေရာကနေ ဒေါ်အောင်ဆန်းစုကြည် မိန့်ခွန်း ပြောကြားခဲ့ပါသည်။ အဓိက ပြောသွားခဲ့သည်မှာ အာဃာတ မထားကြောင်းနှင့် အမျိုးသား ရင်ကြားစေ့ရေး နည်းလမ်းကို ယုံကြည်ကြောင်း ဖြစ်ပါသည်။
ဒေါ်အောင်ဆန်းစုကြည်က-
“...အမျိုးသား ရင်ကြားစေ့ရေးကိစ်္စကို ဆက်ပြီးတော့ လုပ်သွားမှာပါ၊ ဒါဟာ အရေးကြီးတယ်၊ ကျွန်မ စိတ်ထဲမှာတော့ ဘယ်သူပဲ၊ ဘာဖြစ်လို့၊ ဘယ်သူနဲ့တော့ဖြင့် အဆင်ပြေအောင် လုပ်လို့ မရဘူး၊ ဘယ်သူနဲ့တော့ဖြင့် စကားပြောလို့ မရဘူး ဆိုတာ လုံးဝ မရှိဘူး၊ ဘယ်သူပဲဖြစ်ဖြစ် အဆင်ပြေအောင် လုပ်ချင်တဲ့စိတ်ရှိရင် လုပ်လို့ ရရမယ်၊ စကားပြောချင်တဲ့စိတ်ရှိရင် စကားပြောလို့ ရရမယ်၊ ကျွန်မကတော့ ဒီလမ်းအတိုင်း သွားမှာပဲ၊ ဒီလမ်းအတိုင်း သွားတဲ့အခါမှာတော့ ကျွန်မတို့ဘက်က ပြည်သူ့ အင်အားတွေ လိုပါတယ်ဆိုတာ အခုဒီမှာ ပြောပြီးတော့ အသိပေး ကြေညာလိုက်ပါပြီ၊ ကျွန်မတို့ ဒီမိုကရေစီအတွက် လုပ်နေတဲ့ အစုအဖွဲ့တွေ အားလုံးနဲ့ ကျွန်မတွဲပြီး လုပ်ချင်တယ်၊ ကျွန်မ ယုံကြည်တာ၊ လူ့အခွင့်အရေးကို ယုံကြည်တယ်၊ တရား ဥပဒေ စိုးမိုးရေးကို ယုံကြည်တယ်၊ အဲဒါတွေ အတွက်တော့ ကျွန်မ အမြဲတမ်း လုပ်ဆောင်သွားမှာပါ၊ ပုဂ်္ဂိုလ်ရေးအရ ဘယ်သူ့ကို မုန်းလို့ ဘယ်ဝါ့ကို မုန်းလို့ဆိုပြီးတော့ လုပ်နေတာ မဟုတ်ဘူး၊ အဲဒီစိတ်တွေ ကျွန်မမှာ မရှိဘူး၊ အချိန်လည်း မရှိဘူး” ဟု ပြောခဲ့ သည်။ အမျိုးသား ဒီမိုကရေစီ အဖွဲ့ချုပ် ခေါင်းဆောင်၏ တစ်သမတ် တည်း ရှိခဲ့သော သဘောထားဖြစ်ပါသည်။ ယခုထိလည်း ဒီသဘောထား ဖြစ်သည်ကို ရှစ်လေးလုံး ငွေရတု အထိမ်းအမှတ် ပွဲမှာ အတိအလင်း ထပ်မံ ပြောဆိုခဲ့သည်။ ဒီသဘောထားက ပြည်သူ့ သဘောထားပဲ ဖြစ်သည်။
ပြည်သူလူထုက ဒူးထောက် အညံ့ခံ အလျှော့ပေးပြီး ဒီမိုကရေစီ နင်းချေခံရတာကိုတော့ ဘယ်သောအခါမှ လက်ခံမှာ မဟုတ်။ သို့သော်လည်း တစ်ဖက်နှင့်တစ်ဖက် အပြုတ်တိုက်၊ အပြတ်ရှင်းဖို့ဆိုသည့်နည်းကို စိတ်ပျက်လှပြီ။ အင်အားစုဝင်များ အသက်သွေးတွေ စတေးနေရတာကိုလည်း စိတ်မချမ်းမြေ့တော့ ပြီ။ သေနတ်သံများ၊ သွေးသံရဲရဲများကိုလည်း မကြည့်လို၊ မမြင် လိုကြတော့ပြီ။
မကျေနပ်မှုအချို့ ရှိကောင်းရှိမည်၊ အားမရတာတွေလည်း ရှိကောင်းရှိမည်၊ စိတ်ပျက်ရတာအချို့လည်း ရှိကောင်းရှိမည်၊ သို့သော်လည်း မြန်မာ ပြည်သူလူထု အများစုက ၈၈ ဒီမိုကရေစီ အရေးတော်ပုံ ကာလ ကတည်းက ယနေ့အချိန် အထိ ဒေါ်အောင်ဆန်းစုကြည်၊ အမျိုးသား ဒီမိုကရေစီ အဖွဲ့ချုပ်နှင့် မင်းကိုနိုင်၊ ကိုကိုကြီးစသည့် ၈၈ မျိုးဆက် ကျောင်းသားခေါင်းဆောင် များအပေါ် အင်တိုက်အားတိုက် ယုံကြည်မှု ရှိနေဆဲဖြစ်သည်။ ပြည်သူလူထုက ဒီလို ယုံကြည်မှုမျိုး ရှိနေသည်မှာ ပုဂ်္ဂိုလ်ရေး မဟုတ်။ နိုင်ငံရေး ခေါင်းဆောင်များ၏ ခေါင်းဆောင်မှုနှင့် လမ်းစဉ်ကို ယုံကြည်တာ ဖြစ်သည်။ ပြည်သူလူထုကို အထင်သေးလို့ မရပါ။ အထူးသဖြင့် ယနေ့ မြန်မာ ပြည်သူလူထုကြီးမှာ မိမိတို့၏ ဘ၀တစ်လျှောက်လုံး နိုင်ငံရေး အကျပ်အတည်းများကြားမှာ နေခဲ့ကြရပြီး၊ နိုင်ငံရေးကြောင့် အထွေထွေ ပြဿနာများ ကြီးထွား နေသည် ဆိုတာကို လွန်စွာမှ နားလည်ကြသည်။ ဒီလို နိုင်ငံရေး ရင့်ကျက်သည့် အမြင် ရှိနေသည့်အတွက် ခေါင်းဆောင်များ အပေါ် ယုံကြည်ကြတာဖြစ်သည်။ မြန်မာပြည်သူလူထုကြီးက ၁၉၈၈ ပြည်သူ့ ဒီမိုကရေစီ အရေးတော်ပုံကြီးမှာ အာဏာရှင် အစိုးရကို အင်နှင့်အားနှင့် ထွက်တိုက်ခဲ့ကြသော်လည်း အစိုးရ ဘာလုပ်လုပ် ဆန့်ကျင်နေတာ မဟုတ်။ အစိုးရသစ် ဆိုတာ ယခင် တပ်မတော် အာဏာသိမ်း အစိုးရကို အခြေခံပြီး ပေါ်ပေါက် လာတာကို ပြည်သူက သိပါသည်။ အစိုးရအဖွဲ့မှာ စစ်ရာထူးရှိသူ အနည်းငယ်ရှိပြီး၊ အများစုမှာ အငြိမ်းစား တပ်မတော် ခေါင်းဆောင် များ ဆိုတာကို မသိတာ မဟုတ်။ ဒါနဲ့ပဲ အစိုးရ တက်လာတာနှင့် ဆန့်ကျင်ကြစို့ ဆိုသည့် ပြည်သူလူထု မဟုတ်။
အစိုးရသစ် ပေါ်လာပြီးသည့်နောက် သမ်္မတဦးသိန်းစိန်နှင့် သူ၏ အစိုးရအဖွဲ့၊ ပြည်ထောင်စု လွှတ်တော် နာယက၊ ပြည်သူ့ လွှတ်တော် ဥက်္ကဋ္ဌ သူရ ဦးရွှေမန်းနှင့် အမျိုးသား လွှတ်တော် ဥက်္ကဋ္ဌ ဦးခင်အောင်မြင့်နှင့် အမျိုးသား လွှတ်တော်၊ တပ်မတော် ကာကွယ်ရေး ဦးစီးချုပ်နှင့် မြန်မာ့ တပ်မတော်တို့ ဘာတွေကို ဘယ်လို ကိုင်တွယ်ပြီး၊ ဘယ်လို ဖြေရှင်း ဆောင်ရွက်နေကြ သည်ဆိုတာကို မသိလိုက် မသိဘာသာ နေကြတာ မဟုတ်။ သိအောင် ကြိုးစားပြီး၊ လက်ခံစရာများကို လက်ခံပြီးနေတတ် သော ပြည်သူလူထု ဖြစ်သည်။ မည်းမည်း မြင်တိုင်း ဆန့်ကျင် နေကြတာ မဟုတ်။ အဆင်သင့်တိုင်း၊ အခွင့် ကြုံတိုင်း ဆန့်ကျင် တိုက်ခိုက်နေတာ မဟုတ်။ နိုင်ငံရေးအရ ဖြစ်စေ၊ မူအရ ဖြစ်စေ၊ ဆန့်ကျင်စရာအကြောင်း ပေါ်လျှင်သော်မှ အချိန်အဆနှင့် နေတတ်သော ပြည်သူလူထု ဖြစ်သည်။ ပြည်သူ လူထုက ဒီလောက် မညံ့။
အမျိုးသား ရင်ကြားစေ့ရေးမှာ ဒီမိုကရေစီ အင်အားစုများ၊ အစိုးရ၊ တပ်မတော်၊ တိုင်းရင်းသား အဖွဲ့အစည်းများနှင့် အခြား သော လက်နက်ကိုင် အင်အားစုများ ရှိသည်။ ဒီလို အနေအထား တွင်းမှာ နိုင်ငံရေးအင်အားစု အားလုံးက ပြည်တွင်းငြိမ်းချမ်းရေးနှင့် နိုင်ငံရေး တည်ငြိမ်မှုတို့အတွက် အမျိုးသား ရင်ကြားစေ့ရေးမူကို ကိုင်စွဲပြီး ညှိနှိုင်း ဆွေးနွေး ဆောင်ရွက်ကြရမှာ ဖြစ်သည်။ ဒါကိုပဲ ပြည်သူလူထုက အားပေးရင်း စောင့်မျှော်နေကြတာ ဖြစ်သည်။ ဒါဟာ လွှတ်တော်တွင်း နိုင်ငံရေးသက်သက်မျှ မကဘဲ လွှတ်တော် ပြင်ပမှာ ရှိနေသော နိုင်ငံရေး အင်အားစုများနဲ့ပါ ဆွေးနွေးရမှာ ဖြစ်သည်။ ဒါဟာ နိုင်ငံရေးအင်အားစု အားလုံးအတွက် ရဲရင့်သော ခြေလှမ်းသစ်တစ်ရပ် ဖြစ်လာမှာပဲ ဟု ပြည်သူလူထုက မျှော်လင့် ယုံကြည်နေကြတာ ဖြစ်သည်။
ဤသို့သော အနေအထားတွင်းမှာ မြန်မာနိုင်ငံ၏ နိုင်ငံရေး အခြေအနေ တိုးမြင့်လာရေး၊ ဒါမှမဟုတ် ဒီမိုကရေစီ ပြည့်ဝ ခိုင်မာရေးနှင့် ပြည်တွင်း ငြိမ်းချမ်းရေး တည်ဆောက်ရေးတို့ ဖော်ဆောင်ရာမှာ ၂၀၀၈ ဖွဲ့စည်းပုံ အခြေခံ ဥပဒေ ပြင်ဆင်ရေးက အခရာကျသည့် အရေးတစ်ခုဖြစ်နေပါသည်။ ဒါက အညှာဖြစ် သည်။ တိုင်းပြည် ပြန်လည် ထူထောင်ရေးကို ဆန်စဉ်ရာ ကျည်ပွေ့ လိုက် ဖြေရှင်းနေလို့ မရ။ အရင်းအမြစ်ကို ကိုင်တွယ်ရမည်။ ဒါကို ကိုင်တွယ် ဖြေရှင်းရမည်မှာ အမှန်ပဲဖြစ်သည်။ ဒါကို ကိုင်တွယ် ဆောင်ရွက်ခြင်းကို ထိပ်တိုက်ရင်ဆိုင်ခြင်းဟု ရှုမြင်လို့ မရနိုင်။ ဘယ်သူကများ ဘယ်သူ့ကို ထိပ်တိုက် ရင်ဆိုင်ချင်ပါမည် နည်း။
စိုးရိမ်ပူပန်ရမည်က ဒီမိုကရေစီ အင်အားစုများကို မဟုတ်။ စိုးရိမ်ပူပန်ရမည်က ပြည်သူလူထုကို မဟုတ်။ စိုးရိမ်ပူပန်ရမည်က ပြည်သူလူထု၏ ဥာဏ်ရည်ဉာဏ်သွေးနှင့် ပြည်သူလူထု၏ နိုင်ငံရေးအမြင် ရင့်သန်မှုကို မဟုတ်။

ပြည်သူ့ခေတ် အယ်ဒီတာ
၅ အောက်တိုဘာ ၂၀၁၃
(ပြည်သူ့ခေတ် ဂျာနယ် အတွဲ - ၄၊ အမှတ် - ၁၆၆ အယ်ဒီတာ့အာဘော် ...)

No comments:

Post a Comment

Related Posts Plugin for WordPress, Blogger...