Monday, July 22, 2013

"ဒေါ်စုဟာ အရင် ဒေါ်စုမဟုတ်တော့ပါဘူး"


ခင်ဗျားတို့ ကျွန်တော်တို့တွေ တိုင်းပြည်မှာ ပြသနာတစ်ခုခုဖြစ်တိုင်း ဒေါ်စု ဒီကိစ္စဘာပြောမလဲ ဘာထင်မြင်ချက်ပေးမလဲ ဘာတွေများ ညွှန်ကြားမလဲဆိုပြီး အမြဲမျှော်နေတတ်ကြပါတယ်။
ဒါပေမယ့်လည်း ဘယ်လောက်ဘဲ မျှော်မျှော် ဒေါ်စုဟာ အမြဲလိုလို ဝင်ပါခြင်းမလုပ်ဘဲ နှုတ်ဆိတ်နေတာ များပါတယ်။အဲလိုလုပ်တာများတော့ ကျွန်တော်ကိုယ်တိုင် သူ့အပေါ်အရင်လောက် အားမရတော့တာ အမှန်ပါဘဲ။

ဒါပေမယ့် တချက်ပြန်စဉ်းစားကြည့်တော့ သူမ အနေအထားဟာ အရင်လိုမဟုတ်တော့ဘူးဆိုတာ တွေ့ရပါတယ်။ အရင်က ပါတီရဲ့ အကြီးအကဲဖြစ်ပြီး သူ့အထက်မှာ ဘယ်သူမှရှိမနေတော့ မြန်မာပြည် ပြသနာဖြစ်တိုင်း လွတ်လပ်စွာပြောနိုင်ဆိုနိုင်ပြီး အစိုးရရဲ့ မှားယွင်းမှုတွေကိုလည်း ပွင့်လင်းစွာ ထောက်ပြဝေဖန်နိုင်ပါတယ်။

ဒါပေမယ့် ခုကျတော့ သူမဟာ အစိုးရအဖွဲ့ဝင်ထဲ ပါဝင်နေသူတဦးဖြစ်လာတော့ သမ္မတက မပြောတဲ့ကိစ္စတွေ မဖြေရှင်းတဲ့ ပြသနာတွေကို အရင်လို ကျော်ပြီး လုပ်လို့မရတော့ပါဘူး။

ခနခန ကျွန်တော်တို့တွေက သူမနဲ့ သမ္မတကို နှိုင်းယှဉ်ပြောဆိုနေကြ တန်းညှိနေကြပေမယ့် တကယ်တန်း လက်တွေ့မှာတော့ ဒေါ်စုဟာ လွတ်တော်အမတ်တစ်ဦးသာဖြစ်ပြီး ဦးသိန်းစိန်ကတော့ သူမထက် အာဏာပိုကြီးတဲ့ သမ္မတတစ်ဦးပါ။

သူတို့ ၂ ယောက်ကြားမှာ ဒုသမ္မတ၊ ဗိုလ်ချုပ်မှုးကြီး၊ ဗိုလ်မှုးကြီး၊ ဝန်ကြီးစတဲ့ အဆင့်တွေအများကြီး ခြားနားနေပါသေးတယ်။ နောက်ပြီး အမတ်ထဲမှာတောင် ဒေါ်စုဟာ လွတ်တော်ထဲမှာ နေရာအများဆုံးရထားတဲ့ အမတ်မဟုတ်ပါဘူး။ ကြံ့ခိုင်ရေးက အများဆုံးပါ။ အဲလောက်ခြားနားနေရင် သမ္မတထက် လုပ်ပိုင်ခွင့်အာဏာ ဘယ်လောက် နိမ့်မလည်းဆိုတာ တွေးကြည့်ယုံနဲ့ သိနိုင်ပါတယ်။

ဒီမိုကရေစီ နိုင်ငံတစ်ခုဖြစ်တဲ့ အမေရိကန်နိုင်ငံကို ကြည့်ပါ။ သူတို့နိုင်ငံမှာ ဗုံးပေါက်သည်ဖြစ်စေ၊ လေဆင်နှာမောင်း တိုက်သည်ဖြစ်စေ၊ မီးလောင်သည်ဖြစ်စေ ဘယ်လိုပြသနာဖြစ်ဖြစ် ဖြစ်ပြီး နာရီပိုင်းအလိုမှာ သမ္မတကိုယ်တိုင် ဒါမှမဟုတ် သမ္မတရဲ့ ပြောရေးဆိုခွင့်ရှိသူ(သူတောင်မှ သူ့သဘောအတိုင်း သတင်းထုတ်ပြန်ခွင့်မရှိဘဲ သမ္မတရဲ့ စကားကို အငှားပြောရတာပါ)က အမြဲလိုလို သတင်းထုတ်ပြန်ခြင်း ဖြေရှင်းခြင်းတွေ လုပ်လေ့ရှိပါတယ်။ ပြသနာကြီးရင် ကြီးသလို ပြသနာဖြစ်ပွားတဲ့နေရာကို သမ္မတကိုယ်တိုင် သွားရောက် ကြည့်ရှုတာ ပြည်သူကို နှစ်သိမ့်တာမျိုးတွေ လုပ်ပါတယ်။

အဲမှာပြသနာဖြစ်တိုင်း သမ္မတကိုကျော်ပြီး (ဝါ) သမ္မတအမိန့်မရဘဲ လွတ်တော် ကိုယ်စားလှယ်အမတ်တယောက်က သတင်းစာရှင်းလင်းပွဲလုပ် သူတို့ အစိုးရက ဒီကိစ္စကို ဘယ်လို အရေးယူမယ် ဘယ်လိုဆောင်ရွယ်မယ် ဆိုပြီး ပြောတာများတွေ့ဖူးကြပါသလား။မတွေ့ဖူးသလို လုပ်လို့လဲ မရပါဘူးဗျာ။ လွတ်တော်အမတ်တွေ ဘယ်လိုဘဲ သဘောထားရှိရှိ သမ္မတရဲ့ သဘောထားမှ အတည်ဖြစ်ပါတယ်။ သမ္မတကို လုံးဝကျော်လုပ်လို့မရပါ။

ခုတော့ မြန်မာပြည်ကျမှ ပြသနာတစ်ခုဖြစ်တိုင်း လူတွေက သမ္မတရဲ့ သဘောထား သမ္မတ ဘယ်လိုဆောင်ရွက်မှာလည်းဆိုတာထက် လွတ်တော်ကိုယ်စားလှယ်တစ်ဦးဖြစ်တဲ့ ဒေါ်စုကို ဘယ်လိုဖြေရှင်းပေးမှာလဲ ဘယ်လိုတာဝန်ယူပေးမှာလည်းဆိုတာ ပိုသိချင်နေကြပါတယ်။ ဒေါ်စုဘာမှ မပြောရင် ဒေါ်စုက တာဝန်ယူစိတ်မရှိဘူး အရင်က အဲလိုမဟုတ်ပါဘူးဆိုပြီး လက်ညိုးဝိုင်းထိုးခံရတော့တာပါဘဲ။

(ဒါပေမယ့် သူမရဲ့ ကိုယ်ပိုင် သဘောထားကိုတော့ ပြောလို့ရပါတယ်။ အဲလိုပြောလို့ရတာကလည်း သူမက စပြောရမှာမဟုတ်ဘဲ သတင်းထောက်တွေက ပြသနာအပေါ်ဘယ်လို သဘောရလဲလို့ မေးမြန်းမှသာ သူ့သဘောထားကို ပြောလို့ရတာပါ။ ဒါပေမယ့် အလွန်အကျွံစည်းကျော်ပြီး ပြောလို့မရပါ။)

အရှင်းဆုံး ဥပမာတစ်ခုပြောရရင် ကျွန်တော်က ဘောလုံးအားကစား ဝါသနာပါသူပီပီ ဘောလုံးလောကနဲ့ ဥပမာပေးပြီးပြောပါ့မယ်။ ဘောလုံးအသင်းတစ်သင်းမှာ အသင်း ရှုံးသည်ဖြစ်စေ နိုင်သည်ဖြစ်စေ သူတို့အသင်းရဲ့ တာဝန်အရှိဆုံးဖြစ်တဲ့ မန်နေဂျာက သတင်းစာရှင်းလင်းပွဲလုပ်ရပါတယ်။

အသင်းရဲ့ ကိစ္စကို သတင်းထုတ်ပြန်ရပါတယ်။ အဲလိုကိစ္စမျိုးကို မန်နေဂျာဘဲ လုပ်ရတာပါ။ အသင်းရဲ့ ဆေးအဖွဲ့ဝင်ကတစ်ယောက်က မန်နေဂျာကို ကျော်ပြီး အသင်းရဲ့ ရှုံးနိမ့်မှုအတွက် တောင်းပန်ကြောင်း နောက်ပွဲတွေ ဘယ်လိုကျိုးစားသွားမှာဖြစ်ကြောင်း သတင်းစာရှင်းလင်းပွဲလုပ်လို့ မရပါဘူး။

ထို့အတူ company မှာလည်း အနာဂတ်ရေးရာ လုပ်ဆောင်ချက် မှုဝါဒတွေ၊ ပြသနာတွေကို ဖြေရှင်းဖို့အတွက် ဆုံးဖြတ်ချက်တွေကို ချမှတ်ရတာ ဒါရိုက်တာက ချမှတ်ရတာပါ။ စာရေးတစ်ယောက်က ဒါရိုက်တာကို ကျော်ပြီး ချမှတ်လို့မရပါဘူး။

အဲလိုဘဲ ဒေါ်အောင်ဆန်းစုကြည်ဟာလည်း သမ္မတတစ်ဦးတည်း လုပ်လို့ရတဲ့ ကိစ္စတွေကို သူ့အနေနဲ့ ဝင်စွက်ဖက်လို့မရပါဘူး။ သူသာ သမ္မတကိုကျော်ပြီး ဒီကိစ္စကို ဒီလိုလုပ်ပါမယ် ဟိုကိစ္စကို ဟိုလိုဖြေရှင်းပါမယ်ဆိုပြီး ပြောနေမယ်ဆိုရင် စည်းကျော်ရာကျသလို သမ္မတကို မလေးစားရာလည်း ကျပါမယ်။

သမ္မတလုပ်ချင်ပါတယ်လို့ ပြောတဲ့သူတစ်ယောက်က အဲလိုစည်းဖောက်နေရင် သူသာသမ္မတ တစ်ယောက်ဖြစ်လာရင် လက်အောက်ငယ်သားတွေ ဘယ်လိုတုံ့ပြန်ကြလိမ့်မလဲ။ သူတောင်လုပ်သေးတာဘဲ ငါတို့လည်း သူ့ကိုကျော်ပြီး လုပ်မယ်ကွာလို့ဖြစ်လာရင် ဘယ်လိုလုပ်ကြမလဲ။

ဒါကြောင့် သူမကိုယ်တိုင်ပြောပါတယ်။ ၂ ခါလည်းရှိပါပြီ။ သူမ သမ္မတတယောက်ဖြစ်ချင်တယ်လို့။ အဲတော့ လူတွေက ဘာလောက်လောက်လားလား လုပ်ပေးနိုင်လို့ သမ္မတဖြစ်ချင် ရတာလည်းဆိုပြီး ဝေဖန်လာကြပါတယ်။

ဟုတ်ပါတယ် သူမ ဘာမှ လောက်လောက်လားလား လုပ်လို့ မရလို့ သမ္မတဖြစ်ချင်တာပါ။ လုပ်ပေးချင်ပေမယ့် စည်းကျော်လို့မရ ပြောချင်ပေမယ့်လည်း ပြောလို့ မရလို့ သမ္မတဖြစ်ချင်တာပါ။ ဒါကြောင့် ကျွန်တော်ကတော့ သူမသာ သမ္မတဖြစ်ခဲ့မယ်ဆိုရင် ခုလို ပြသနာတစ်ခု ဖြစ်တိုင်း ပြည်သူတွေ ဘယ်သူ့အဖေခေါ်လို့ ခေါ်ရမှန်းမသိ မဖြစ်တော့တာကတော့ သေချာတယ်လို့ ပြောပါရစေ။

Ryo Miyaichan

မူရင်းရေးသားသူအား Credit ပေးပါသည်။

No comments:

Post a Comment

Related Posts Plugin for WordPress, Blogger...