Friday, June 7, 2013

“အစိုးရမတွေးပေးသော အမှန်တရားနှင့် လူ့ဂုဏ်သိက္ခာ”

 
ခါးပိုက်နှိုက်ကနေ ABSDF ဖြစ်သွားပုံက ဒီလို။ ရထားပေါ်တွင် သူတို့နှိုက်လိုက်သည့်အိတ်မှာ ABSDF စာရွက်စာတမ်းပါသော အိတ်ဖြစ်နေခြင်းပင်။ သူတို့အိတ်ကိုမပြီး နောက်ဘူတာအဆင်းတွင် ရဲက မသင်္ကာသဖြင့် ဖမ်းစစ်လိုက်ရာမှ အချုပ်ထဲရောက်သွားခြင်းဖြစ်သည်။

“အစိုးရမတွေးပေးသော အမှန်တရားနှင့် လူ့ဂုဏ်သိက္ခာ”

(၆၊ဇွန်၊၂၀၁၃ထုတ် ပြည်သူ့ခေတ်ဂျာနယ်တွင် ဖော်ပြထားသော လွှမ်းရုံ၏ကလောင်ခွဲ မျိုးညွန့်(popular news)ရေးသားထားသည့်ဆောင်းပါး)
(၁)
နိုင်ငံရေးအကျဉ်းသားဆိုသည့်ဝေါဟာရကို မီဒီယာများ၌ စတင်သုံးစွဲခွင့်ရသည်မှာ သိပ်တော့ မကြာ လှသေး။ အစိုးရသစ်တက်ပြီးသည့်အချိန်မှာတောင် နိုင်ငံရေးအကျဉ်းသားဆိုသည့် ဝေါဟာရကို သုံးစွဲခွင့်မရ။ ယုံကြည် ချက်အကျဉ်းသားဟုသာ သုံးနှုန်းခွင့်ပြုသည်။ အာဏာရှင်စနစ်ကို ဆန့်ကျင်၍ ထောင်သွင်းအကျဉ်းချခံရသူ များကို အာဏာရှင်များက နိုင်ငံရေးအကျဉ်းသားဟု မသတ်မှတ်ခြင်းဖြစ်သည်။
စာပေစိစစ်ရေးလွန်ကာလကိုရောက်တော့ အစိုးရက နိုင်ငံရေးအကျဉ်းသားဟု မသတ်မှတ်သေးသော်ငြား မီဒီယာများတွင်တော့ ပြည်သူက သတ်မှတ်ခေါ်တွင်သည့်အတိုင်း နိုင်ငံရေးအကျဉ်းသားဟု ခေါ်တွင်ရေး သား လာကြသည်။ အစိုးရအနေနှင့် အဘယ်ကြောင့် နိုင်ငံရေးအကျဉ်းသားဟု မသတ်မှတ်နိုင်သလဲတော့မသိ။ ယခင်အစိုးရ၏ အမြင်အပေါ် အမွေဆက်ခံပုံရသည်။

နိုင်ငံရေးအကျဉ်းသားဆိုသည်မှာ ယခင်အစိုးရလက်ထက်က နိုင်ငံတကာဖိအားများကို အလျှော့အတင်း ပြုလုပ်ရာ အသုံးချခံခဲ့ရသည်။ ယနေ့အစိုးရသစ်လက်ထက်တွင်လည်း မြင်ရတွေ့ရ ပုံစံက သိပ်တော့မထူး။ ထင်ထင်ရှားရှားပင် အပေးအယူဆန်လွန်းလှပေသည်။ ယနေ့တိုင် ပြည်သူသတ်မှတ်ထားသော နိုင်ငံရေးအ ကျဉ်းသားများ ထောင်ထဲတွင် ကျန်ရှိနေသေးသည်ဆိုတော့ နောက်ထပ်မည်သို့သော အပေးအယူဆက်ရှိဦး မလဲဟု စောင့်ကြည့်ရပေဦးတော့မည်။

မည်သို့ပင်ဆိုစေ၊ အာဏာရှင်စနစ်ကို ဆန့်ကျင်၍ထောင်သွင်းအကျဉ်းချခံရသူများကို နိုင်ငံရေးအကျဉ်း သားဟု လက်ရှိအစိုးရက သတ်မှတ်ခေါ်တွင်လိုက်ခြင်းကိုမူ အသိအမှတ်ပြုရပါသည်။ အစိုးရသစ်သည် ပြည်သူ မြင်သလို မြင်ရဲလာပြီဟုဆိုရမည်။

နိုင်/ကျဉ်း စိစစ်ရေးကော်မတီကို အစိုးရဦးဆောင်၍ ဖွဲ့စည်းသည်။ နောက်ထပ် နိုင်/ကျဉ်းစိစစ်ရေးကော် မတီသစ်ကို တိုးချဲ့ဖွဲ့စည်းသည်။ အစိုးရအကြီးအကဲများနှင့် ဒီမိုကရက်တစ်များပါဝင်သောအဖွဲ့။ အမျိုးသား ရင်ကြားစေ့ရေးအတွက် သင်္ကေတတစ်ခုဟု မှတ်ယူမိသည်။

အဘယ်ကြောင့် နိုင်/ကျဉ်းစိစစ်ရေးကော်မတီဖွဲ့ရသနည်းဆိုတော့ အာဏာရှင်စနစ်ကို ဆန့်ကျင်သူအချို့ အား နိုင်ငံရေးဆိုင်ရာပုဒ်မ မတပ်ဘဲ ရာဇဝတ်ပုဒ်မများတပ်ကာ သိက္ခာချထောင်ချပစ်ခြင်းခံခဲ့ရသောကြောင့် ဖြစ်သည်။

အာဏာရှင်အစိုးရလက်ထက်တွင် တရားဥပဒေဆိုသည်မှာ ရစရာမရှိအောင် ပျက်စီးခဲ့သည်။ ဘယ်သူ့ ကို ထောင်ဘယ်လောက်ချဆိုသည်မှာ တရားဥပဒေနှင့်မဆိုင် အာဏာရှင်တို့၏ ပါးစပ်သည် တရားဥပဒေ ဖြစ်သည်။ ထောက်လှမ်းရေး၏ စစ်ကြောရေးစခန်းမှ ထွက်လာသည်နှင့် ထောင်ဘယ်နှနှစ်ဆိုသည့် စီရင်ချက် မှာ တွဲပါလာပြီးဖြစ်သည်။ အမှန်တကယ် ရာဇဝတ်သားတစ်ယောက်ကို နိုင်ငံရေးပုဒ်မနှင့် ထောင်ချနိုင်သလို နိုင်ငံရေးလုပ်သူတစ်ယောက်သည်လည်း ရာဇဝတ်သားဖြစ်သွားနိုင်ပါသည်။

(၂)
၁၉၉၁ ခုနှစ်၊ ကျွန်တော် မန္တလေးထောင်၌ အကျဉ်းခံနေစဉ်ကာလက ခါးပိုက်နှိုက်ကို ခါးပိုက်နှိုက်မှန်းသိလျက် ၁၇ (၁) (၂) ပုဒ်မဖြင့် ထောင် ၇ နှစ်အချခံရသူ ၂ ဦးနှင့် ဆုံတွေ့ခဲ့ဖူးသည်။ သူတို့ ၂ ဦးမှာ မန္တ လေး-မြစ်ကြီးနားရထားပေါ်တွင် ကျက်စားနေသော၊ ထောင်ထဲသို့ ဝင်လိုက်ထွက်လိုက်ခါးပိုက်နှိုက်များဖြစ် သည်။ သို့သော် သူတို့ကျင်လည်နေသည်မှာ မြစ်ကြီးနားဝန်းကျင်မြို့များတွင်။ ပြီးတော့ ခါးပိုက်နှိုက်မှုကလည်း ထောင်နှစ်ရှည်မကျလေတော့ သူတို့ထောင်သက်တမ်းတစ်လျှောက် မန္တလေးထောင်သို့ မရောက်ဖူးပေ။
ထို့ကြောင့် မန္တလေးထောင်တွင်း၌ သူတို့ ၂ဦးကို ခါးပိုက်နှိုက်မှန်းမသိကြ။ သူတို့ ၂ ဦးကလည်း မန္တလေး ထောင်သို့မရောက်မီ နယ်ထောင်မှာကတည်းက မန်းထောင်ထဲတွင် အနေအစားချောင်ရန်အတွက် ခါးပိုက်နှိုက် ဟု လုံးဝမပြောရန် တစ်ဦးနှင့်တစ်ဦး စာချုပ်ချုပ်လာကြသည်။

မန္တလေးထောင်ထဲတွင် ကျွန်တော်တို့နှင့်ဆုံတော့ သူတို့ကိုယ်သူတို့ ABSDF (မြောက်ပိုင်း)မှ တစ်ဦးက တပ်ကြပ်ကြီး၊ နောက်တစ်ဦးက ရဲဘော်ဟု ဆိုသည်။ တပ်ကြပ်ကြီးဆိုသူ၏ အမည်က ကိုအေးနိုင်၊ ရဲဘော် အမည်ကိုတော့ မမှတ်မိတော့။ မန္တလေးထောင်ရောက် နိုင်ငံရေးအကျဉ်းသားများက ABSDF ရဲဘော်များဟု ထင်ကာ ကြိုဆိုနေရာပေးကြသည်။ သူတို့ ၂ ဦးမှာ ထောင်ဝင်စာလည်းမရှိသဖြင့် နိုင်ငံရေးအကျဉ်းသားများ က စားအိုးတွဲလိုက်ကာ မျှတကျွေးကြသည်။

သူတို့က ABSDF (မြောက်ပိုင်း)မှ တာဝန်ပေးချက်အရ ထိုင်းသို့ ရှမ်းပြည်နယ်ကို ဖြတ်၍အသွား အဖမ်း ခံရခြင်းဟုဆိုသည်။ သူတို့၏ ရှမ်းပြည်နယ်ဘက်သွားသောခရီးစဉ်မှာ လျှို့ဝှက်သည်းဖိုဝတ္ထုတစ်ပုဒ်လို သည်း ထိတ်ရင်ဖိုအပြည့်။ သို့သော် စိတ်ကူးတည့်ရာလိမ်စဉ်များဖြစ်သဖြင့် တစ်ခေါက်နှင့်တစ်ခေါက် ဇာတ်လမ်းက မတူ။

ကျွန်တော်တို့က အထင်ကြီးအောင် အပိုပြောတာဟုသာ သံသယဖြစ်ကြသည်။ မန္တလေးထောင်တွင်း ရောက်ပြီး တစ်လကျော်လောက်ကြာမှ လူလည်တပ်ကြပ်ကြီးက ရဲဘော်ကို ခပ်နှိမ်နှိမ်ဆက်ဆံလွန်းသဖြင့် အဆင်မပြေဖြစ်ကာ ရဲဘော်လုပ်သူက ဖော်ကောင်လုပ်၍ 'ခါး' မှန်းသိရတော့သည်။

ခါးပိုက်နှိုက်ကနေ ABSDF ဖြစ်သွားပုံက ဒီလို။ ရထားပေါ်တွင် သူတို့နှိုက်လိုက်သည့်အိတ်မှာ ABSDF စာရွက်စာတမ်းပါသော အိတ်ဖြစ်နေခြင်းပင်။ သူတို့အိတ်ကိုမပြီး နောက်ဘူတာအဆင်းတွင် ရဲကမသင်္ကာသဖြင့် ဖမ်းစစ်လိုက်ရာမှ အချုပ်ထဲရောက်သွားခြင်းဖြစ်သည်။

ထောင်ထဲဝင်လိုက်ထွက်လိုက်သူတို့ ၂ ဦးကို ရဲက ခါးပိုက်နှိုက်မှန်းသိသည်။ သိ၍လည်း မသင်္ကာ၍ စစ်ခြင်းဖြစ်သည်။ 'ခါး'အမှုနှင့်သာဆို ထောင်သိပ်မကျ။ ရဲက ထောင်နှစ်များများကျစေလို၍ 'ခါး'မှန်းသိသော် လည်း ABSDF စာရွက်စာတမ်းများကို ရုံးတင်လိုက်သဖြင့် ၁၇ (၁) (၂) ဖြစ်ကာ ထောင် ၇ နှစ်ကျခြင်းဖြစ် သည်။

သူတို့ကို 'ခါး'မှန်းသိသွားသော်လည်း နိုင်ငံရေးအကျဉ်းသားမျာက ပစ်ပစ်ခါခါမလုပ်။ သူတို့ကိုယ်သူတို့ 'ခါး'ဟုဝန်ခံသော်လည်း ၁၇ (၁) (၂) နှင့်ကျလာသူများမို့ ထောင်တွင်းအနေအထိုင်ပစ်စလက်ခတ်မဖြစ်အောင် ဖေးမကြသည်။

(၃)
ကျွန်တော်ပြောချင်တာက ပျက်ယွင်းနေသော ခေတ်တစ်ခေတ်ထဲတွင် ထိုခါးပိုက်နှိုက်တို့၏ လိမ်လည်မှု အပေါ် အပြစ်ဆိုနေခြင်းမဟုတ်ပါ။ စစ်အစိုးရလက်ထက်တွင် ခါးသည်လည်း ၁၇ (၁) (၂) ဖြစ်သွားသလို အစိုးရဆန့်ကျင် သူသည်လည်း ရာဇဝတ်ပုဒ်မမျိုး အတပ်ခံရသည်မှာ မထူးဆန်းဟု ဥပမာထုတ်ပြခြင်းဖြစ်သည်။
နိုင်/ကျဉ်း စိစစ်ရေးကော်မတီသစ်အတွင်းရေးမှူးသမ္မတရုံး ဒုဝန်ကြီး ဦးအောင်သိမ်းက နိုင်ငံရေး အကျဉ်းသားများကို လွှတ်ပေးပြီးဖြစ်ကြောင်း ကျန်ရှိသည်မှာ ဖောက်ခွဲ၊ လူသတ်တို့သာဖြစ်ကြောင်း၊ ၄င်းတို့ ကို လွှတ်ပေးဖို့ ပြောနေလျှင် ပြောသည့်လူ၊ ပြောသည့်အဖွဲ့အစည်းက နိုင်ငံရေးသမားဖြစ်သည်ဟု တာဝန်ခံ ပေးရမည်ဖြစ်ကြောင်း ပြည်ပသတင်းဌာနတစ်ခုကို ပြောကြားခဲ့သည်။

''ကျန်တာတွေက ဖောက်ခွဲ၊ လူသတ် ....'' ဟုဆိုသည်။ သူတို့ကို တာဝန်ခံပေးရဦးမည်ဟုဆိုသည်။ အာဏာရှင်ဆန့်ကျင်ခြင်းအပေါ် သိက္ခာမမဲ့မဲ့အောင် အလုပ်ခံထားရခြင်းအပြင် နိုင်ငံရေးသမားဖြစ်ကြောင်း အာမခံသူရှိမှသာ လွတ်မည့်ကိန်းဖြစ်သည်။ ဘယ်လောက် ရင်နာစရာကောင်းလိုက်ပါသနည်း။
တကယ်တမ်းဖြစ်သင့်တာက သူတို့ကို မြန်မြန်အာမခံ၊ မြန်မြန်လွှတ်ပေးရုံတင်မက သူတို့၏ ဂုဏ် သိက္ခာအတွက် သူတို့သည် ရာဇဝတ်သားများမဟုတ်။ ရာဇဝတ်ပုဒ်မ မတရားအတပ်ခံရသော နိုင်ငံရေးသမား ဖြစ်ကြောင်း အများသိအောင် တရားဝင်ကြေငြာပေးရန်လည်း လိုပေသည်။

ထို့အတူ တစ်ဆက်တည်း ဆက်ပြောလိုသည့်ကိစ္စမှာ ၂ဝ၁ဝ ဧပြီ ၁၅ တွင်ဖြစ်ပွားခဲ့သော X2O ဗုံးခွဲမှု နှင့်ပတ်သက်၍ သေဒဏ်ချခံရပြီး ၂ဝ၁၂ သြဂုတ်တွင် လွတ်ငြိမ်းခွင့်ရခဲ့သော ကိုဖြိုးဝေအောင်အရေးဖြစ်သည်။ ကိုဖြိုးဝေအောင်မှာ လွတ်ငြိမ်းခွင့်ရပြီး တစ်နှစ်ပင်မကြာ ၂ဝ၁၃ ဇန်နဝါရီ ၄ ရက်တွင် ကွယ်လွန်သွားခဲ့ပြီး ဖြစ်သည်။ သို့သော် သူ၏ အမှန်တရားကတော့ မသေ။

X2O ဗုံးခွဲမှုမှာ သင်္ကြန်တွင်း ပျော်ရွှင်စွာရေကစားနေကြသော အပြစ်မဲ့ပြည်သူများအား သတ်ဖြတ်မှုဖြစ် သည်။ အင်မတန်အကျည်းတန်သော လူသတ်မှု။ ထိုဗုံးခွဲမှုကို ကိုဖြိုးဝေအောင်ဟု မတရားစွပ်စွဲ ညှင်းပန်း ကာ သေဒဏ်ချခံရခြင်းဟုဆိုသည်။

ကိုဖြိုးဝေအောင် ကွယ်လွန်ပြီးနောက် ၂ဝ၁၃ ဖေဖော်ဝါရီ ၄ တွင် ဇနီးနှင့်ညီဖြစ်သူက အဖြစ်မှန်ပေါ် ပေါက်ရေးသတင်းစာရှင်းလင်းပွဲပြုလုပ်သည်။ X2O ဗုံးခွဲမှုတရားခံမှာ ကိုဖြိုးဝေအောင်မဟုတ်ဟု ပြတ်ပြတ် သားသား ငြင်းဆိုသည်။ ယခင်အစိုးရလက်ထက်က သက်ဆိုင်ရာသို့ တိုင်ကြားစာ အစောင် ၃ဝ၊ ယခုအစိုးရ လက်ထက်တွင် တိုင်ကြားစာ ၂ဝ ကျော် ပေးပို့ခဲ့သော်ငြား ဖြတ်ပိုင်းပြန်မလာဟု သိရသည်။ ကိုဖြိုးဝေအောင်၏ ဂုဏ်သိက္ခာနှင့် မိသားစုဂုဏ်သိက္ခာအတွက် သတင်းစာရှင်းရခြင်းဟုဆို၏။

ထိုကိစ္စနှင့်ပတ်သက်၍ ယနေ့တိုင် သက်ဆိုင်ရာမှ တစ်စုံတစ်ရာ ပြန်ကြားသည်ဟု မကြားရ။ ယခင် အစိုးရတုန်းကကိစ္စ ငါတို့နှင့်မဆိုင်ဟု သဘောထားလို့တော့မရ။ ယခင်အစိုးရနှင့် ယခုအစိုးရကြား ဆက်စပ်မှု ကြီးကြီးမားမားရှိသည်ကိုလည်း အများသိဖြစ်သည်။

လူသားတစ်ဦး၏ ဂုဏ်သိက္ခာ၊ သူ့မျိုးဆက်၏ ဂုဏ်သိက္ခာ။ မတရားစွပ်စွဲခံရသည်ဆိုလျှင် မည်မျှအရေး ကြီးပါသနည်း။ ထို့ကြောင့် ကိုဖြိုးဝေအောင်ကဲ့သို့သော် အမှုမျိုးကို ပြန်လည်စစ်ဆေး၍ တကယ့်အဖြစ်မှန် ပေါ်ပေါက်အောင် ဆောင်ရွက်ကာ အမှန်တရားကို တရားဝင်ပြန်ကြေညာပေးရပေမည်။
ကျွန်တော်ဆိုလိုတာက မတရားပြစ်ဒဏ်ဟု စစ်ဆေးတွေ့ရှိခဲ့လျှင် မတရားပြစ်ဒဏ်ချခဲ့သူများကို တရား သောပြစ်ဒဏ်ပြန်ပေးရန်မဟုတ်။ လူ့ဂုဏ်သိက္ခာအတွက် အမှန်တရားပေါ်ပေါက်ရေးသာဖြစ်သည်။

မျိုးညွန့်

No comments:

Post a Comment

Related Posts Plugin for WordPress, Blogger...